Leita í fréttum mbl.is

Bloggfærslur mánaðarins, maí 2007

,,Fréttaskýring RÚV ohf.": Talnakönnun réttlætir eyðingu Flateyrar

http://school.discovery.com/clipart/clip/skull.html

Í gær mátti heyra forstjóra Talnakönnunar réttlæta eyðingu Flateyrar með einhverjum hagfræðilegum rökum, þ.e. að meint hagræðing væri fólgin í íslenska kvótakerfinu. Það gerði hann á skrautlegan hátt og ekki með því að vísa í einhverjar hagtölur enda er það ekki hægt.

Staðreyndin er að virði sjávarafurða hefur staðið í stað eða dregist saman þrátt fyrir að miklar verðhækkanir hafi orðið á erlendum mörkuðum.

Forstjórinn tók skrautleg dæmi til að réttlæta kerfið, s.s. tækniþróun í íslenskum landbúnaði á Íslandi frá þjóðveldisöld, sömuleiðis tækniþróun í prentiðnaði. Hann kemur með fá dæmi úr íslenskum sjávarútvegi enda er togaraflotinn orðinn fjörgamall.

Benedikt virðist oftar en ekki fenginn í spilið þegar stjórnvöld þurfa að réttlæta erfið mál og grípur þá Talnakönnun til óvandaðra útreikninga. Er skemmst að minnast þess þegar eftirlaunalög ráðherra og alþingismanna voru fyrir allsherjarnefnd í desember 2003 og þá reiknaði Talnakönnun í snatri út að lögin leiddu jafnvel til lækkunar á útgjöldum vegna eftirlauna æðstu embættismanna þjóðarinnar.


Hvað gerir sonur Vestfjarða?

Össur Skarphéðinsson kennir sig af og til við Vestfirði þegar honum svo hentar, enda á hann ættir að rekja til Dýrafjarðar. Nú er svo komið að þessi afkomandi Vestfjarða er orðinn valdamikill ráðherra byggðamála og getur því auðveldlega komið byggðunum sínum til hjálpar, þ.e. ef hann hefur vilja og þor til.

Sjávarbyggðirnar fyrir vestan þurfa sárlega á aðstoð stjórnvalda að halda á næstu vikum. Á næstu dögum munu uppsagnir í rækjuvinnslu Bakkavíkur taka gildi og það stefnir sömuleiðis í algjört óefni á Flateyri þegar vinnsla og útgerð Kambs stöðvast. Vísasta leiðin fyrir Össur til að aðstoða frændur og vini á Vestfjörðum er að vinda ofan af kvótakerfinu sem er að brjóta niður byggðirnar.

Ég trúi því ekki fyrr en ég tek á því að jafnaðarmenn, s.s. sr. Karl Matthíasson sem fór um vestfirskar byggðir og boðaði breytingar á óréttlátu kvótakerfi, sætti sig við óbreytt ástand sem mélar byggðirnar.

Össur Skarphéðinsson, ráðherra byggðamála, er líffræðingur og veit því mætavel að núverandi fiskveiðistjórnunarkerfi hvílir á vafasamri líffræði sem gengur þvert gegn viðtekinni vistfræði og þess vegna ættu heimatök hans að vera hæg við að rökstyðja það að koma sínu fólki til hjálpar.


Morgunblaðið ruglar og bullar - Frjálslyndi flokkurinn misnotar Stöð 2!

Morgunblaðið okkar, allra landsmanna, getur stundum tekið léttgeggjaðar sveiflur og er ekkert við því að segja. Þetta er einfaldlega íslenskur veruleiki sem hefur endurspeglast í réttlætingu á olíusamráðssvindlinu, stuðningi Íslands við innrásina í Írak og skrifum blaðsins um Baugsmálið svo nokkur dæmi séu tekin. 

Nú í dag tók Morgunblaðið létt kast þegar það fann það upp hjá sér að Frjálslyndi flokkurinn hefði jafnvel misnotað fréttaskýringaþáttinn Kompás til þess að kasta rýrð á íslenska kvótakerfið.  Morgunblaðið ætti að vita að það er ekki hægt að kenna Frjálslynda flokknum einum um  óvinsældir kvótakerfisins þar sem kerfið heggur reglulega djúp skörð í byggðir landsins og skilar þjóðarbúinu á þriðja tug milljörðum króna minni verðmætum nú en útvegurinn skilaði fyrir áratug. 

Þetta er ekkert annað en bull og ómerkilegt þvaður og sýnir hversu röklausir menn eru í því að halda áfram með núverandi kvótakerfi. Tilgangur Morgunblaðsins er auðvitað sá að komast hjá því að fjalla um svindlið í sjávarútveginum sem Kompássþátturinn greindi frá og, jú, að sjálfur fiskistofustjóri játaði að svindlið væri árlega talið í milljörðum króna. 

Einn liður Morgunblaðsins í því að réttlæta kvótakerfið hefur verið að afflytja fréttir af færeyskum sjávarútvegi og fyrir þá sem ekki þekkja til mætti ætla að þar væri allt á vonarvöl. Það er ekki rétt enda voru útflutningsverðmæti sjávarfangs Færeyinga hærri á árinu 2006 en árið á undan. Ég ætla ekki að rekja tölur um mismunandi aflaverðmæti einstakra tegunda á milli ára en benda lesendum þessarar síðu á töflu Hagstofu Færeyinga þar sem þeir geta séð þessar tölur án gleraugna minna eða ritstjórnar Morgunblaðsins. 

Auðvitað er færeyska kerfið ekki gallalaust frekar en önnur mannanna verk en það hefur reynst miklum mun betur en íslenska kvótakerfið sem hvetur til svindls og skilar helmingi færri þorskum á land en fyrir daga þess.


Ekki ríkisstjórn almannahagsmuna - sr. Kalli Matt plataði kjósendur í Norðvesturkjördæmi

Hin nýja ríkisstjórn Sjálfstæðisflokksins og samstarfsflokksins byrjar ekki gæfulega þar sem Samfylkingin virðist ætla að skrifa upp á óbreytta fiskveiðistefnu sem stríðir gegn almannahagsmunum en þjónar ríkulega mjög þröngum sérhagsmunum. 

Það er ljót staða hjá nýjum þingmanni, s.s. sr. Karli V. Matthíassyni sem hefur farið um Norðvesturkjördæmið og platað fólk til fylgis við Samfylkinguna og gefið í skyn að hún muni stuðla að breytingum á fiskveiðistjórnunarkerfinu.

Ingibjörg Sólrún Gísladóttir virðist ætla að drepa málum á dreif með einhverju tali um úttekt á aflamarkskerfinu. Nokkrar úttektir hafa farið fram á þessu kerfi, s.s. úttekt Andrew Rosenberg frá árinu 2002 í kjölfar þess að uppbygging þorskstofnsins á 10. áratugnum hafði algerlega brugðist og mörg hundruð þúsund tonn tapast út úr fiskabókhaldi Hafró. Rosenberg þessi kemur úr sama skóla og sérfræðingar Hafró sem geta reiknað stærðir fiskistofna áratugi fram í tímann og síðan eru nýleg dæmi um reikninga fiskistofna allt aftur á þjóðveldisöld. 

Rosenberg gerðist sjálfur svo djarfur að reikna út stærð fiskistofna við strendur Ameríku á 19. öld og komst auðvitað að því að þeir voru ofveiddir þá.

Fleira sem stríðir gegn almannahagsmunum virðist vera í pípunum, s.s. að flytja allt matvælaeftirlit undir sameinuð atvinnumálaráðuneytin, landbúnaðar- og sjávarútvegsráðuneyti. Það er stórfurðuleg ráðstöfun að setja neytendavernd inn í atvinnumálaráðuneyti þar sem hagsmunir geta og munu skarast. Það eru allar líkur á því að við þá ráðstöfun muni hagsmunir neytenda verða fyrir borð bornir.

Það væri miklu nær að sameina matvælaeftirlitið og sömuleiðis vinnueftirlitið inn í stofnun sem heyrði undir umhverfis- eða félagsmálaráðuneytið. 

Þessar tillögur sýna svo að ekki verður um villst að ríkisstjórnin stefnir í að verða ríkisstjórn stórra hagsmunasamtaka en alls ekki neytenda og almennings.


Menn eru með óráði

Maður veltir enn fyrir sér gagnrýnisleysinu gagnvart íslenska kvótakerfinu, hvað menn fá að vaða uppi með miklar vitleysur, eins og Þorsteinn Pálsson í leiðara sínum þar sem hann talar um að kvótakerfið hafi hagrætt og leyst úr læðingi kraft fyrir íslenskt atvinnulíf.

Nýleg skýrsla Hagstofunnar sýnir að þjóðfélagið fær tugmilljörðum króna minna út úr greininni árlega þrátt fyrir meintan hagnað greinarinnar á ári og þorskafli er núna helmingi minni en fyrir daga kvótakerfisins.

Hver er stöðugleikinn? Hvar er stöðugleikinn?

Eini krafturinn sem hefur verið leystur í greininni er að hún hefur verið skuldsett fyrir nokkur hundruð milljarða króna á síðasta áratug. Það er eflaust sá kraftur sem Þorsteinn Pálsson vísar til í leiðara sínum en eftir stendur atvinnugrein sem er skuldugri og laðar alltaf minna og minna til sín ungt fólk eins og aðsókn að Fjöltækniskólanum ber með sér á umliðnum árum.

Maður furðar sig á því að bæði stjórnvöld og aðrir fjölmiðlar en Stöð tvö hafa lítið fylgt eftir svindlinu í sjávarútvegi sem að mati fiskistofustjóra eru margir milljarðar árlega.

Núna er ég staddur í Skotlandi á Fishing 2007 þar sem ég hitti marga forsvarsmenn í breskum og írskum sjávarútvegi. Jafnframt á ég von á að hitta nokkra blaðamenn í greininni og verður gott að fá tækifæri til að ræða ýmis mál, eins og t.d. ástandið á Íslandi. Það verður fróðlegt að hlera hljóðið í þeim og heyra hvað héðan er að frétta.


Samfylkingin svíkur sjávarbyggðirnar

Nú er búið að opinbera stjórnarsáttmálann og er rétt að óska Sjálfstæðismönnum innilega til hamingju með hann. 

Sjálfstæðisflokkurinn tekur við öllum mikilvægari málaflokkum á meðan samstarfsflokkurinn lætur í minni pokann. 

Samstarfsflokkurinn hefur gleymt öllum heitstrengingum um að koma Íslandi af lista yfir stríðsfúsar þjóðir sem styðja innrásina í Írak.  Sömu sögu er að segja um það fyrirheit að endurskipuleggja stjórnarráðið. Samfylkingin  ætlar einnig að svíkja fólkið í sjávarbyggðunum en Ingibjörg Sólrún Gísladóttir boðaði að hún ætlaði að viðhalda núverandi stöðugleika í sjávarútvegi!

 Hvaða stöðugleika er Ingibjörg Sólrún  að boða fyrir fólkið sem býr í sjávarbyggðunum s.s. Flateyri?

 


Dapurleg tíðindi fyrir sjávarútveginn

Ég vonaðist eftir því að ferskir vindar myndu blása um sjávarútveginn með nýrri ríkisstjórn og að menn á borð við Össur Skarphéðinsson fengju að koma að því að breyta núverandi stjórn fiskveiða sem hefur vaskað sjávarbyggðir landsins og atvinnugreinina í heild sinni.

Nýlegar tölur frá Hagstofunni sýna svart á hvítu að ef verðmætasköpun væri svipuð og fyrir 10 árum fengi íslenska þjóðarbúið á þriðja tug milljarða árlega meira í sinn hlut úr sjávarútveginum.

Kerfið hefur komið í veg fyrir nýliðun og hrundið af stað svindli og sóun þannig að allur þorri landsmanna tapar, en þó sér í lagi sjávarbyggðirnar sem eru svipur hjá sjón miðað við hvernig var fyrir daga kvótakerfisins.

Skv. skýrslum Hafró sem ég tek hæfilega mikið mark á hefur þessi eyðibyggðastefna ekki heldur orðið til hagsbóta fyrir þorskstofninn. Það er því löngu orðið tímabært að fram komi ný hugsun eða nýtt sjónarhorn á það hvernig þessum málum verði best fyrir komið.

Og Einar K. er með öllu laus við þann ferskleika.


Bæjarstjórinn á Ísafirði var í vor á móti byggðakvóta en nú segist hann vera með!

Halldór Halldórsson, bæjarstjóri á Ísafirði, hélt áfram í fréttum ríkissjónvarpsins ohf. að sneiða hjá því að ræða hina raunverulegu ástæðu þess hversu illa er komið fyrir atvinnulífinu á Vestfjörðum sem hvert mannsbarn sér að er auðvitað óstjórnin í sjávarútvegi. Ekki bólaði heldur á því að „kappinn“ kæmi fram með tillögu um að breyta kvótakerfinu sem er á góðri leið með að leggja Flateyri í eyði.  

Hann er greinilega ekki að vinna fyrir fólkið á Vestfjörðum - hann er miklu frekar að vinna fyrir flokkinn sem framfylgir miskunnarlausri eyðibyggðastefnu. 

Mér finnst sérkennilegt að líta yfir þann flokk manna sem fylgir honum á þessari aumu vegferð en þar eru menn á borð við Gísla H. Halldórsson sem ég hef haft mætur á hingað til.

Bæjarstjórinn Halldór Halldórsson óskaði eftir því að ný ríkisstjórn legði til byggðakvóta til þess að bjarga ástandinu. Þessi orð komu mér nokkuð á óvart þar sem bæjarstjórinn er nýkominn af landsfundi Sjálfstæðisflokksins þar sem hann samþykkti að draga úr sérstökum úthlutunum til byggðarlaga, s.s. þá Flateyrar.

Gera þarf sérstakt átak í að einfalda stjórnkerfi veiðanna og auka gegnsæi þess með því að draga úr sérstökum úthlutunum og skorðum og öðru því sem felur í sér mismunun. Sjávarútvegurinn er og verður um ókomin ár höfuðatvinnugrein landsbyggðarinnar. Til þess að leysa vanda einstakra byggðalaga þurfa stjórnvöld og fleiri atvinnugreinar að leggja sitt af mörkum. 

(Hér er vægast sagt sérkennileg ályktun Sjálfstæðisflokksins um sjávarútvegsmál í heild sinni.)

Það kæmi mér ekki á óvart að þessir snillingar í bæjarstjórn Ísafjarðar leiddu nú talið að allt öðru en sjávarútveginum sem er undirstaða byggðanna fyrir vestan - þá væri tilvalið að fara að ræða olíuhreinsistöðina.  

Eina vörn fólks er að láta í sér heyra og helst að ganga í Frjálslynda flokkinn sem hefur verið óþreytandi við að hamra á lausn vandans. Og lausnin sú felst ekki í endalausu hjali og hringlandahætti - þaðan af síður að setja upp undrunarsvip og segja: Mig óraði ekki fyrir þessu. Eru í alvörunni vandræði í rekstrinum?


Verðmæti sjávarafurða hefur dregist saman

Það eru talsverðar sveiflur innan ársins á verðmæti sjávarafurða og þess vegna segir samanburður á fyrstu 2 mánuðum hvers árs lítið sem ekki neitt.  

Nýleg skýrsla Hagstofunnar sýnir að verðmæti sjávarafurða dróst saman á árinu 2006 frá árinu á undan.  Þetta hefur verið verið framvinda síðasta áratugs þrátt fyrir að hundruðum milljóna af fé almennings hafi verið veitt í að auka virði sjávarafurða í gegnum AVS-sjóðinn. 

Það sem veldur sérstökum áhyggjum nú er auðvitað hversu stórskuldug fyrirtækin eru, s.s. Grandi, á meðan það berast fréttir af sölutregðu á frystum karfa.

Besta leiðin til þess að auka virði sjávarafurða er að aðskilja veiðar og vinnslu en það verður til þess að þeir sem geta gert mest verðmæti úr aflanum geti komist í hráefnið.  


 


mbl.is Aflaverðmætið var 15 milljarðar á fyrstu tveimur mánuðunum
Tilkynna um óviðeigandi tengingu við frétt

Mun Einar Kristinn Guðfinnsson spila á hörpu?

Þetta verður örugglega sérkennilegur fundur en ég hef setið þá nokkra um bágt atvinnuástand á Vestfjörðum og þeir hafa ekki skilað miklu hingað til en umræðu í fjölmiðlum um skamma hríð á eftir.

Það er þó aldrei að vita  nema að það verði tekin upp sú nýbreytni að sjávarútvegsráðherra sem kom ástandið algerlega í opna skjöldu, hafi með sér hörpu spili undir sönglinu í Einari Oddi og Sturlu um að ekki sé hægt að kenna kvótakerfinu um hörmungarástandið á Flateyri.  Það verður fróðlegt að fylgjast með því hvort að séra Karl Matt og Guðbjartur Hannesar taki undir þann brag að þessu sinni  

Það sem skiptir öllu máli nú er að fólkið á Vestfjörðum og þeim sem er annt um Flateyri fylgi þessu máli fast eftir og láti ekki vitleysuna vaða uppi.

 

 


mbl.is Jón Bjarnason óskar eftir fundi um um stöðuna á Flateyri
Tilkynna um óviðeigandi tengingu við frétt

Næsta síða »

Bloggvinir

Innskráning

Ath. Vinsamlegast kveikið á Javascript til að hefja innskráningu.

Hafðu samband