Leita í fréttum mbl.is

Bloggfærslur mánaðarins, maí 2010

Byggjum á traustum grunni

Frjálslynd og óháð eru skýr valkostur fyrir kjósendur í Skagafirði  sem vilja að sveitarfélaginu verði stjórnað af ábyrgð næstu fjögur árin. Í forystusveit Frjálslyndra er metnaðarfullt framsýnt ungt fólk, s.s. Hrefna Gerður Björnsdóttir lögfræðingur og Ingvar Björn Ingimundarson formaður skólafélags FNV, sem vill láta gott af sér leiða fyrir samfélagið.

Fjórflokkurinn leggur á borð fyrir kjósendur langa margendurunna  óskalista þar sem stefnt er að margra milljarða byggingum en skilaboð Frjálslyndra eru einföld og skýr. Í fyrsta lagi munu Frjálslynd og óháð tala hátt og snjallt fyrir hagsmunum Skagafjarðar. Á tímum minnkandi ríkisútgjalda mega sveitarstjórnarfulltrúar búast við að harðsóttara verði að verja fjárframlög til mikilvægra stofnana í Skagafirði, s.s. Heilbrigðisstofnunarinnar, Fjölbrautaskóla Norðurlands vestra, Háskólans á Hólum, Vegagerðarinnar og Veiðimálastofnunar. Það er gríðarlega mikilvægt að sveitarstjórnin skynji hlutverk sitt og vinni samhent að því að verja af hörku sameiginlega hagsmuni og störf.

Í öðru lagi munu Frjálslynd og óháð ná jafnvægi í fjárhag sveitarfélagsins áður en ráðist verður í stórframkvæmdir. Við viljum gera það í samvinnu við stjórnendur og íbúa sveitarfélagsins. Aukinn skilningur er á því að vísasta leiðin til að tryggja uppbyggingu og opinber störf sé að bæta rekstur sveitarfélagsins og treysta fjárhagslegan grunn.  

Tækifærin í Skagafirði til leiks og starfa eru óþrjótandi. Atvinnulíf er fjölbreytt. Má nefna öflugan landbúnað, sjávarútveg, fiskeldi og ferðaþjónustu, auk margvíslega stofnana og fræðslusetra sem fyrr var getið um. Skagafjörðurinn skartar blómlegum Sauðárkróki, búsældarlegum sveitum frá Fljótum í norðri og fram til dala og fallegu þéttbýli, Hofsósi, Hólum og Varmahlíð. Mikil áskorun og tækifæri felast í því að samræma og móta stefnu fyrir dreifbýlan og víðfeðman Skagfjörð.

Augljóst er að hægt er að efla ferðaþjónustuna  með aukinni samvinnu og bættri aðkomu og  upplýsingum þegar komið er inn í Skagfjörðinn.

Frumforsenda þess að sveitarfélagið verði kröftugt leiðandi afl til framfara og samvinnu er að það standi á traustum fjárhagslegum grunni.  

Í Skagafirði eru svo sannarlega tækifærin og það er kjósenda að velja fulltrúa Skagfirðinga til varnar og sóknar fyrir hagsmuni sína þann 29. maí næstkomandi. 

Skinhelgi Vinstri grænna

Skinhelgi Vinstri grænna á sér fá takmörk. Vg sagðist ætla að: tryggja eignarhald auðlinda, vera utan ESB og á móti AGS. Flokkurinn  hefur algerlega snúið við blaðinu og selt orkuauðlindir þjóðarinnar, sótt um aðild ESB og er orðinn bandingi AGS.

Íslenskufræðingurinn og menntamálaráðherrann Katrín Jakobsdóttir sem þóttist ætla að beita sér fyrir gagnsærri stjórnsýslu, hefur ekki enn haft fyrir því að þýða viljayfirlýsingu ríkisstjórnarinnar sem er grundvallarplagg fyrir framtíð landsins. Í plagginu kemur fram hvað AGS vilji að ríkisstjórnin geri og get ég ekki séð annað en að Steingrímur J sé farinn sinna skítverkum sjóðsins.

Óskiljanlegt er að flokksmenn Vg vilji binda trúss sitt við sjóðinn í stað þess að fara að ráðleggingum hagfræðingsins Lilju Mósesdóttur sem sér að leið AGS er ófæra.


Feykir í Skagafirði

Héraðsfréttablaðið Feykir og ekki síður vefsíða blaðsins eru mjög mikilvægir hlekkir fyrir Skagafjörð og Norðurland vestra. Miðlarnir efla samkennd og tengja saman íbúa Norðurlands vestra.  Staðbundnir fjölmiðlar í dreifbýlinu gegna æ mikilvægara  hlutverki þar sem stærri landsfjölmiðlar eru allir staðsettir á höfuðborgarsvæðinu og sjónarhorn þeirra hefur þrengst á liðnum árum og orðið staðbundnara.  Það heyrir til undantekninga ef blaðamenn eru staðsettir utan suðvesturhornsins en af og til er umfjöllun og kálfur um hinar dreifðu byggðir þegar blaðamenn eiga leið um svæðið og skrapaðar eru upp auglýsingar í leiðinni.
Ekki má vanmeta jákvæða fréttamennsku sem sneiðir hjá viðkvæmum málum þar sem hún eflir dug og þor íbúa.  Við getum verið ánægð með mjög margt í Skagafirði og mættum að ósekju vera hreyknari og auglýsa betur einstaka kosti svæðisins. Einn þeirra er Fjölbrautaskólinn á Sauðárkróki sem er einstaklega vel í sveit settur til þess að kenna náttúrufræði. Þá kemur upp í huga minn samanburður við minn gamla skóla, Menntaskólann í Reykjavík.  Í FNV eru nokkrir metrar í Sauðána, hann er í göngufæri við Áshildarholtsvatn og auðvelt má nálgast fisk og líffæri úr sláturdýrum. Auk þess er hér stutt í sérfræðinga á Náttúrustofunni og Háskólanum á Hólum. Í Reykjavíkinni, eins góð og hún er, eru framangreinda kostir fjær og fjarlægari í alla staði.

Aðsendar greinar eru síðan mjög mikilvægur vettvangur fyrir tjáningarfrelsið og skarpari skoðanaskipti sem ritstjórn Feykis blandar sér hæfilega mikið í.  Mér finnst rétt að hrósa ritstjórninni fyrir að gæta þess sérstaklega að jafnræði ríki hjá framboðum til sveitarstjórnar við að koma greinum áleiðis til lesenda blaðsins. Það er óhætt að segja að farið sé vel með fjórða valdið, fjölmiðlavaldið, í aðdraganda kosninga hér í Skagafirði.

Frjálslynd og óháð í Skagafirði hafa sett sér það stefnumið að efla Skagafjörð með nánari samvinnu við góða granna í austri og vestri.  Augljóst er að aukin samvinna á ýmsum sviðum,  s.s. ferðamennsku, kynningarstarfi og skólamálum, getur aukið ábata og styrkt Norðurland vestra.  Hafa ber hugfast að góður staðbundinn fjölmiðill gefur samfélaginu ákveðin sóknarfæri sem rétt er að huga að.

Jón Gnarr og Steingrímur J.

Margur þykist sjá að Jón Gnarr hafi haft Steingrím J. Sigfússon fjármálaráðherra  sem fyrirmynd persónusköpun sinni á Georgi Bjarnfreðarsyni í drepfyndnum sjónvarpsþáttum Fangavaktarinnar. 

Það er ekki einungis ýmislegt í fasi þeira Georgs og Steingríms J sem er líkt heldur sömuleiðis að þá gilda órjúfanleg og óvíkjanleg lögmál um alla aðra  nema þá sjálfa.

Steingrími J. hefði nær örugglega verið trylltur í þingsal þ.e.  í stjórnarandstöðu út í fjármálaráðherra, sem vildi greiða Icesave, lúta stjórn AGS, skipa kúlánalið í áhrifastöður, selja orkuauðlindir til útlendinga og sækja um aðild að ESB í þokkabót.

Ég er viss um að sigrar Jóns Gnarrs í skoðanakönnunum megi ekki síður rekja til furðulegs viðsnúnings fjármálaráðherra í flestum málum en  farsans í borgarstjórninni á kjörtímabilinu.

Flest er á huldu hvað varðar raunveruleg stefnumið Jóns Gnarrs og nokkuð erfitt að átta sig á því hvað er grín og hvað alvara, þó svo að hann hafi verið tíður gestur í stofum landsmanna að tjá lífsskoðanir sínar.

Í dag hefur blossað upp sá ótti meða Vg-liða að Jón sé Sjalli en ég tel ekki síður að þeir Vinstri grænu ættu ekki síður að óttast að Jón breyttist í Steingrím J..


Orkusölumennirnir í Vinstri grænum

Steingrímur J. lét í Kastljósi kvöldsins eins og hann vissi lítið af og væri í þokkabót alfarið á móti sölunni á HS til Magma Energy.

Meint fáfræði Steingríms J. um söluna verður að teljast harla ólíkleg, sértaklega í ljósi þess að fyrir rétt rúmum mánuði síðan voru orkubraskarar frá Magma Energy og AGS á ferð með viðskiptaráðherra að  ræða endurskoðun efnahagsáætlunar AGS fyrir landið.

Það má að líkum ráða að salan á HS sé í beinu framhaldi af bústjórn AGS.

 


mbl.is Vill banna fjárfestingar erlendra aðila í orkufyrirtækjum
Tilkynna um óviðeigandi tengingu við frétt

Hundrað milljarða spurningin

Stjórnvöld leita ýmissa leiða til þess að endar nái saman í ríkisfjármálum. Skattar eru hækkaðir upp úr öllu valdi. Ríkisstjórn Samfylkingar og Vg sveiflar blóðugum niðurskurðarhníf enn og aftur og búist er við að hann beri niður víðast í kerfinu. Helst er að vænta þess að pólitískt ráðnir aðstoðarmenn sem hlaðið hefur verið inn í ráðuneytin séu í öruggu skjóli. Alþingi hefur leitað vægast sagt óhefðbundinna leiða til þess að auka gjaldeyrstekjur, s.s. að semja við grunaða fjárglæframenn sem hafa komið óorði á þjóðina um sérstakan skattaafslátt til atvinnurekstrar. Ég leyfi mér að efast um að það séu til fordæmi fyrir því að nokkurt þjóðþing hafi farið þessa leið í að hygla grunuðum stórglæpamönnum.

Ólíklegustu leiðir hafa verið kannaðar eins og að framan greinir til þess að ná jafnvægi í opinberan rekstur en samt sem áður hefur algerlega verið hlaupið yfir þá spurningu hvort vert sé að ná meiri fiskafla úr hafinu sem gæti gefið þjóðinni tug ef ekki hundrað milljarða tekjur árlega. Óumdeilt er að upphafleg markmið núverandi fiskveiðiráðgjafar sem hefur gengið út á að geyma fiskinn í sjónum hefur alls ekki gengið upp.

Vísindalegar forsendur ráðgjafarinnar eru vægast sagt umdeildar, bæði meðal líffræðinga og sjómanna, en samt hefur ríkisstjórnin ekki varið einni krónu í að fara yfir vel rökstudda og málefnalega gagnrýni. Það er ljóst að ef efasemdamenn um ráðgjöf sem ekki hefur gengið upp hafa rétt fyrir sér myndi það skila þjóðinni milljarða gjaldeyristekjum. Oft var þörf en nú er nauðsyn.

Fyrir þá sem trúa í blindni á að veiðar mannsins stjórni í einu og öllu lífkeðjunni í hafinu er gott að hafa á bak við eyrað að sjófuglar, hvalir og selir taka tugfalt meiri næringu úr hafinu en maðurinn. Fiskarnir sjálfir eru miklu stærri lífmassi en framangreind dýr sem þurfa að næra sig. Oft er á matseðlinum hjá þeim smærri fiskur sem leiðir til að vöxtur og viðgangur þeirra sjálfra hlýtur að hafa úrslitaáhrif á stofnstærðarsveiflur.

Út frá framangreindum staðreyndum er út í hött að ætla að kenna veiðum um allar breytingar á stofnstærð fiska, sérstaklega í ljósi þess að hver og einn fiskur getur átt mergð afkvæma.

Og hundrað milljarða spurningin er: Er ekki tímabært að leita svara við öllum spurningum sem geta rétt hag þjóðarinnar, jafnvel þótt það kosti skotsilfur?



Verður að leita til alþjóðastofnanna?

Ísland hefur orðið fyrir miklum áföllum vegna samkrulls spilltrar stjórnmálastéttar og fjárglæframanna. Nú í kjölfar rannsóknarskýrslu Alþingis hefði maður haldið að stjórnmálamenn sem viðriðnir voru hrunið skiptu um takt og leituðust við að vanda vinnubrögð sín sem aldrei fyrr. 

Ekki er því að heilsa þegar borgarstjórinn Hanna Birna Kristjánsdóttir fer ekki að áliti æðra stjórnvalds frá því 4. febrúar og dregur að greiða fjárframlög til Frjálslynda flokksins í samræmi við álitið.  

Ljóst er að sanngjarnar lýðræðislegar leikreglur standa völtum fótum þegar stjórnmálamenn beita grímulausum bolabrögðum í aðdraganda kosninga.  

Mér finnst vera orðið fullt tilefni til þess að benda alþjóðastofnunum s.s. Evrópuráðinu á ástand mála en vinnubrögð Reykjavíkurborgar eru hvorki í samræmi við úrskurð sveitarstjórnarráðuneytisins né ráðleggingar ráðherranefndar Evrópuráðsins. 

 

 

 


Hanna Birna Kristjánsdóttir var samverkamaður Kjartans Gunnarssonar

Sumir hafa furðað sig á ósvífinni valdníðslu Hönnu Birnu Kristjánsdóttur með því að kom í veg fyrir að Frjálslynda flokknum berist fjárframlög.

Til að átta sig á ólýðræðislegum og spilltum vinnubrögðum Hönnu Birnu borgarstjóra, er rétt að rifja það upp að hún var samverkamaður Kjartans Gunnarssonar fyrrum  framkvæmdastjóra Sjálfstæðisflokksins. Kjartan Gunnarsson var innsti koppur í búri einkavinavæðingarinnar og spillingarinnar sem orsakið hrun íslensks fjármálalífs. Hanna Birna var sérstakur aðstoðarmaður Kjartans Gunnarssonar, sem bendlaður er við vafasama styrki frá útrásarhyskinu. Fyrrverandi formaður Frjálslynda flokksins benti strax á það árið 2006 að Kjartan Gunnarsson og samverkamenn hans hefðu rænt Landsbankann. Rannsóknarnefnd Alþingis hefur staðfest að ekkert var ofsagt um siðlaus myrkraverkin í Landsbankanum sem hafa haft mjög alvarlegar afleiðingar fyrir Íslendinga og skaðað orðspor þjóðarinnar.

Eflaust hræðist Hanna Birna mjög það stefnumið Frjálslynda flokksins í Reykjavík að það fari fram opinber rannsókn stjórnsýslu Reykjavíkur einkum í tengslum við Orkuveitu Reykjavíkur.


Þriðji geirinn í Skagafirði

 frjórri umræðu um stjórn Sveitarfélagsins Skagafjarðar nú í aðdraganda kosninga eru ræddar margar leiðir um hvernig bæta megi hag íbúanna. Tekist hefur verið á um hvort fjárhagur sveitarfélagsins leyfi frekari skuldsetningu til uppbyggingar á húsnæði utan um starf sem unnið er í Árskóla en niðurstöður samræmdra prófa gefa sterklega til kynna að í skólanum fái börnin mjög góða menntun.

Vitað er að Sveitarfélagið Skagafjörður situr ekki á digrum peningasjóðum en á hinn bóginn býr Skagafjörður yfir mikilli auðlegð sem felst ekki einungis í náttúruauðlindum og fegurð heldur gífurlegum félagsauði sem hægt væri að virkja í frekara mæli. Í Skagafirði eru margvísleg félagasamtök sem hafa ekki gróðasjónarmið að markmiði heldur að láta gott af sér leiða, s.s. kvenfélög, sjálfboðaliðasamtök, framfarafélög, íþróttafélög og umhverfissamtök svo eitthvað sé nefnt. Framangreind samtök eru oft nefnd þriðji geirinn til aðgreiningar frá einka- og opinberum rekstri. Skagfirðingar hafa verið öflugir og leiðandi í félagsmálum og stofnuðu m.a. fyrsta kvenfélagið að Ási í Hegranesi árið 1869.

Ég tel mikilvægt að ný sveitarstjórn í Skagafirði leiti í auknum mæli eftir samstarfi við frjáls félagasamtök og hlusti eftir því að hvaða verkefnum þau eru tilbúin að vinna. Sveitarstjórn getur beislað ómælda krafta með því að veita uppbyggilegu áhugastarfi brautargengi og stuðning. Ég er sannfærður um að hægt er að lyfta Grettistaki á fjölmörgum sviðum ef framangreint er haft að leiðarljósi og er vænlegri leið en að ætla að stjórna öllum að ofan.

Við ættum að hafa hugfast að í upphafi sjálfstæðisbaráttu þjóðarinnar ruddu frjáls félagasamtök leiðina í margvíslegum framfaramálum, s.s. kvenfélög, ungmennafélög og kaupfélög.

Núna þegar þjóðin þarf að rífa sig áfram eftir að spillt samkrull ráðandi stjórnmálaafla og fjárglæframanna hefur valdið þjóðinni tjóni og álitshnekki er rétt að leita í mann- og félagsauð til þess að efla samfélagið. Frjálslyndir og óháðir í Skagafirði munu leggja sérstaka áherslu á það á komandi kjörtímabili að efla tengsl og stuðning við þriðja geirann í Skagafirði og freista þess að leysa úr læðingi mikinn kraft, þor og bjartsýni.

 


Framboðslisti Frjálslyndra og óháðra í Skagafirði

Frjálslyndir og óháðir í Skagafirði bjóða fram krafta sína til að stjórna Sveitarfélaginu Skagafirði næstu fjögur árin.  Ekki er vanþörf á því að leysa Fjórflokkinn í Skagafirði af hólmi sem hefur sameinast um algerlega óábyrga skuldasöfnun.  Frjálslyndir munu forgangsraða af skynsemi og standa vörð um störf og verja grunnþjónustuna. Frjálslyndir í  Skagafirði munu beita sér fyrir innlendum innkaupum á vöru og þjónustu, til þess að efla íslenskt atvinnulíf.

Frjálslyndi flokkurinn hefur þá sérstöðu að hafa haft opið bókhald frá upphafi og er laus við fjárstyrki og sem draga heiðarleika hans í efa.  Frjálslyndi flokkurinn hefur ávallt staðið vörð um hagsmuni almennings í stað þröngra sérhagsmunahópa.

Framboðslisti Frjálslyndra og óháðra í Skagafirði:

1.         Sigurjón Þórðarson, líffræðingur.

2.         Hrefna Gerður Björnsdóttir, lögfræðingur.

3.         Ingvar Björn Ingimundarson,  nemi.

4.         M. Dögg Jónsdóttir, framhaldsskólakennari.

5.         Oddur Valsson, nemi.

6.         Guðný Kjartansdóttir, verslunarstjóri.

7.         Pálmi Sighvatz, bólstrari.

8.         Jón Ingi Halldórsson bifreiðastjóri.

9.         Gréta Dröfn Jónsdóttir,  húsmóðir.

10.       Guðbrandur Guðbrandsson, tónlistarkennari.

11.       Hafdís Elfa Ingimarsdóttir heilbrigðisstarfsmaður.

12.       Þórður G. Ingvason, athafnamaður.

13.       Ágústa Sigurbjörg Ingólfsdóttir, húsmóðir.

14.       Árni Björn Björnsson, veitingamaður.

15.       Benedikt Sigurðsson, útgefandi.

16.       Hans Birgir Friðriksson, veiðimaður.

17.       Hanna Þrúður Þórðardóttir, framkvæmdastjóri.

18.       Marin Sorinel Lazar, tónlistarkennari.


Næsta síða »

Bloggvinir

Innskráning

Ath. Vinsamlegast kveikið á Javascript til að hefja innskráningu.

Hafðu samband