Leita í fréttum mbl.is

Bloggfærslur mánaðarins, júlí 2008

Færeyska stjórnin fallin

Það hefur dregið til mikilla tíðinda í færeyskum stjórnmálum og nýjust tíðindi bera með sér að færeyska stjórnin sé fallin.  Það sem braut á voru samgöngumál en það hefur byggst upp gífurlega mikil spenna í færeyskri pólitík vegna algerlega óábyrgra niðurskurðartillagna stjórnarflokkanna á fiskveiðiheimildum. Jörgen Niclasen formaður Fólkaflokksins sagði tillögur stjórnarinnar vera óðs manns æði og höggva nærri efnahag eyjanna. 

Á sama tíma og efnahagsmál Íslands eru í uppnámi þá er óábyrgum niðurskurðartillögum í á Íslandsmiðum kyngt kinnroðalaust af öllum öðrum stjórnmálaöflum en Frjálslynda flokknum.


Háskóli Íslands í djúpum skít

Ef vel á að vera á háskóli sem stendur undir nafni að ástunda gagnrýna hugsun og vísindamenn sem þar starfa að draga ályktanir út frá hlutlægum rannsóknum.

Það skortir mjög mikið á að þegar svokallaðir fræðimenn félagsvísindadeildar Háskóla Íslands fjalla um Frjálslynda flokkinn séu framangreind vinnubrögð í hávegum höfð. Ég hef áður greint opinberlega frá vafasömum vinnubrögðum Baldurs Þórhallssonar en nú rakst ég á furðulegan fyrirlestur Guðmundar Hálfdánarsonar prófessors þar sem hann rangtúlkar málflutning þingmanna og forystumanna Frjálslynda flokksins og dregur fram einkennilegar og órökstuddar fullyrðingar, tekur orð algerlega úr samhengi og leggur út á versta veg. Þessi málflutningur og fræðimennska dæmir sig sjálf þar sem viðkomandi hafa aldrei sett sig í samband við forystumenn Frjálslynda flokksins og ekki hefur farið fram nokkur vitræn rannsókn, heldur virðist sem dregnir séu upp stimplar sem búnir eru til af pólitískum andstæðingum til að útiloka umræðu um mál sem eru einhverra hluta vegna viðkvæm fyrir flokk eins og Samfylkinguna.

Eitt af því sem Guðmundur Hálfdánarson dregur fram sem staðfestingu á aðdróttunum sínum í garð Frjálslynda flokksins er nafnlaus skrif eftir meinta stuðningsmenn flokksins sem er að finna á netinu, í athugasemdum hjá Magnúsi Þór.

Er þetta fræðimennska?

Ofangreindar áherslur Háskóla Íslands eru umhugsunarverðar í ljósi þess að allir fræðimenn Háskóla Íslands í lagadeild og félagsvísindadeild hafa með einni undantekningu - sem er Þorvaldur Gylfason - annaðhvort þagað yfir eða rökstutt áframhaldandi mannréttindabrot á íslenskum sjómönnum.


Að tjalda er góð skemmtun

Ég reikna með að slá niður tjaldi í Þorlákshöfn um næstu helgi, á unglingalandsmóti Ungmennafélags Íslands, og reikna fastlega með að það verði frábær skemmtun. Unglingalandsmót UMFÍ er ein af skrautfjöðrum ungmennahreyfingarinnar á Íslandi sem hefur í gegnum tíðina tekist mjög vel. Unglingalandsmót eru að vísu ekki fyrir alla, a.m.k. ekki þá sem vilja fá innvortis skúr. Þeir ættu frekar að drífa sig í stuðið í Eyjum.


Þarf að auka völd ráðherra?

Í dag varð ég þeirrar ánægju aðnjótandi að Kristján Möller, íbúi Fjallabyggðar, sló á þráðinn til mín.  Satt best að segja var ég feginn að heyra í Kristjáni en það gaf til kynna að eitthvert lífsmark væri með stjórnarþingmönnum og ráðherrum landsbyggðarinnar. Það er a.m.k. ekki að heyra að þeir hafi gert eitthvert veður yfir nýrri skýrslu Byggðastofnunar um byggðir í nauðvörn en fólksfækkunina má að stórum hluta rekja til alræmds kvótakerfis sem rænir byggðirnar atvinnuréttinum.

Erindi Kristjáns Möller var að koma á framfæri þeirri leiðréttingu, afar kurteislega þó, að skrif mín um að samgönguráðherra hefði eitthvað með þá ákvörðun að gera að leggja af Siglufjarðarflugvöll væru röng. Ég hafði ályktað út frá fréttum í 24 stundum og vefsíðunni Lífið á Sigló að ráðherra væri potturinn og pannan í þeirri ákvörðun að leggja niður flugvöllinn, enda var ákvörðunin tekin í samráði við Flugstoðir ohf. sem heyrir undir ráðherra. Það var að heyra á ráðherra að hann hefði ekkert með málið að gera frekar en hver annar íbúi Siglufjarðar og ég gat ekki heyrt betur en að hann væri mótfallinn því að leggja niður völlinn. 

Ég vil því nota tækifærið og biðja Kristján Möller afsökunar á því að hafa misskilið málið með þeim hætti að telja að samgönguráðherra hefði eitthvað með starfrækslu flugvalla að gera. Þetta mál hlýtur að vekja upp alvarlegar spurningar um hvort í fyrsta lagi ekki sé nauðsynlegt að auka völd samgönguráðherra þannig að hann hafi eitthvað með grundvallarmál að gera og síðan í öðru lagi hvort hið nýja opinbera hlutafélag Flugstoðir ohf. fari algerlega gegn ráðherra í málum sem snerta samgöngur í heimabæ ráðherra.


Þórhallur blaðamaður fékk verðlaun fyrir stíl

Það var margt um glæsimenni og glæsimeyjar á íþróttaleikvangi Neista á Hofsósi í dag þegar félagið fagnaði 110 ára afmæli sínu með skemmtilegri knattspyrnukeppni, grillveislu og léttum leikjum. Í mótslok veitti sjónvarpsmaðurinn og landsþekkti grínarinn Gísli Einarsson keppendum margvísleg verðlaun og einkum fyrir stíl. Meðal annars var gert upp á milli Óslandsbræðra um hver þeirra væri liðtækastur í boltasparki en hinn reyndi blaðamaður Skessuhorns, Þórhallur Ásmundsson, fékk bæði verðlaun fyrir fegurð, enda lítur hann út eins og Tarzan, og fyrir að vera ellismellur Neista fyrr og síðar.

Mitt lið, lið Fljótamanna, lenti í 2. sæti í keppninni og var gert út um leikinn í vítaspyrnukeppni þar sem ég stóð í markinu og Harpa Kristinsdóttir, kjarnorkukvendi, þrumaði knettinum rétt undir markslána. Gísli Einarsson lýsti aðdraganda marksins sem ógurlegum þar sem krafturinn sem Harpa leysti úr læðingi hefði jafnast á við Suðurlandsskjálftann.

Til hamingju með afmælið, Neistamenn.


Ég fagna framsóknarmönnum

Það er alltaf varasamt þegar stjórnmál fara að snúast algerlega um flokkadrætti og menn gleyma algerlega málefnunum. Ég hef alltaf fagnað hverjum þeim sem hefur séð að sér varðandi vont fiskveiðistjórnunarkerfi, s.s. iðrandi framsóknarmönnum sem hafa snúið frá villu síns vegar og viljað fara út úr vonlausu kvótakerfi. Mér finnst það jákvætt, og Guðni Ágústsson maður að meiri fyrir að opna á slíkar leiðir.

Sumir eru því miður svo harðsoðnir í gömlum flokkadráttum, s.s. arftaki gamla Sósíalistaflokksins, VG, sem kennir sig nú mest við græn gildi að þeir geta alls ekki fagnað liðsauka úr öðru litrófi stjórnmálanna sem leggur sannarlega málefnum þeirra lið, s.s. að vera á móti virkjunum til stóriðju. Að minnsta kosti virðist sá harði tónn sem kemur fram í yfirlýsingu Svandísar Svavarsdóttur vegna yfirlýsingar borgarstjóra bera vott um afbrýðisemi - eins og hann sé að taka frá þeim vörumerkið.

Ég er fráleitt talsmaður þess að vera alfarið á móti stóriðju en finnst satt að segja ekki skynsamlegt að spila út allri óbeislaðri orku í einhverju óðagoti vegna stöðu efnahagsmála. Það þarf að leysa yfirvofandi kreppu.

Til þess að komast út úr hinni erfiðu stöðu væri miklu nær að sækja meiri þorsk í sjóinn.


mbl.is Segja borgarstjóra fara með rangt mál
Tilkynna um óviðeigandi tengingu við frétt

Kristján Möller tekur meintan óþarfa af Siglfirðingum

Kristján Möller, íbúi Fjallabyggðar, og fyrrum sveitarstjórnarmaður hefur gegnum sín pólitísku áhrif stundað það að koma af höndum Siglfirðinga margvíslegri starfsemi, s.s. hitaveitu og rafveitu. Einnig hefur hann á stundum verið talsmaður þess að atvinnurétturinn, þ.e. rétturinn til sjósóknar, hafi verið gerður að söluvöru og þess vegna seldur úr bænum. Nú er komin upp sú staða að samgönguráðherra vill leggja niður flugvöllinn á Siglufirði. Siglfirðingum finnst þetta mörgum helvíti hart, að frétta þetta svona í dagblöðunum.

Nú eru uppi framsýnar hugmyndir um að byggja upp ferðaþjónustu í bænum og fljúga stangveiðimönnum í lúxusveiðiaðstöðu. Vonandi bregður ekki ráðherrann fæti fyrir þær hugmyndir.


Göfugt verkefni hjá ferðamálastjóra

Fátt er mikilvægara í ferðaþjónustu en að fólk geti létt á sér. Fín veitingahús geta fallið um marga klassa ef þessir hlutir eru ekki í lagi. Það kemur þó nokkuð á óvart að nýr ferðamálastjóri skuli fela fararstjórum þetta mikilvæga og göfuga verkefni. Ég hefði talið nærtækara að láta Umhverfisstofnun meta ástandið sem hefur með málaflokkinn að gera.

Þessi aðferð gæti þó kannski allt eins nýst til þess að þeir sem sækja okkur heim komist í notaleg náðhús.

http://www.noveltp.com/gallery/


mbl.is Skrásetja klósettferðir
Tilkynna um óviðeigandi tengingu við frétt

Ekki von á góðu, hvorki hjá öldnum né ungum sjálfstæðismönnum

Nú hefur sá reyndi Snæfellingur og þingmaður Sturla Böðvarsson hafnað því að kalla saman þing og ræða stöðu efnahagsmála þrátt fyrir að við blasi mikil nauðsyn á því að ræða stjórn fiskveiða og það hvort þjóðin geti ekki reddað sér út úr efnahagsþrengingum með því að veiða meiri þorsk. Þessi viðbrögð koma verulega á óvart ef litið er til gagnrýninnar ræðu Sturlu Böðvarssonar á þjóðhátíðardegi Íslendinga 17. júní 2007 á Ísafirði. Þar ræddi hann tæpitungulaust að kvótakerfið hefði algjörlega mistekist og að kerfið ógnaði tilveru sjávarbyggðanna.

Nú er að koma á daginn að þessi stefna er einnig farin að sverfa verulega að hag þjóðarinnar. Það sem er sárgrætilegast er að yngri stjórnmálamenn Sjálfstæðisflokksins eru að fimbulfamba við fyrrverandi aðstoðarmann Halldórs Ásgrímssonar um mögulegar lausnir á efnahagsvanda þjóðarinnar og þá er rætt um allar aðrar leiðir en þá sem blasir við, þ.e. hvort ekki megi veiða meira af þorski sem allt bendir til að hafi hvort eð er ekki nægilegt æti.

 


mbl.is Forseti Alþingis kallar ekki saman þing
Tilkynna um óviðeigandi tengingu við frétt

Skynsamlegasta tillaga VG lengi

Vinstri grænir hafa lagt fram tillögu um að kalla þing saman eftir verslunarmannahelgi. Þá hafa flestir þingmenn verið í fríi um tveggja mánaða skeið og ættu þess vegna að vera endurnærðir og geta tekist á við gömul og ný verkefni, s.s. að auka trúverðugleika íslensks fjármálakerfis sem myndi án efa lækka skuldatryggingarálag bankanna.

Því miður sá starfandi forsætisráðherra enga ástæðu til að taka undir þessi sjónarmið. Hún sagði enn fremur að unnið væri í einhverjum tillögum og að lausn þessara mála af fullum krafti. Gallinn á því er sá að enginn veit hver verkin eru. Það kemur sjaldnast fram hjá ráðamönnum. Nú ber svo við að bæði forsætisráðherrann og nýi efnahagsráðgjafinn eru komnir í frí og vart er þá verið að gera nokkurn skapaðan hlut.

Það væri forvitnilegt að fá að heyra hvað vinstri grænir hafa meira að segja en að kalla saman þingið. Er flokkurinn tilbúinn að styðja raunverulegar lausnir, s.s. að veiða meiri þorsk? Nú berast góðar fréttir af fiskgengd á Austfjörðum. Er VG tilbúinn að afla meiri gjaldeyris með aukinni sölu á orku?

Ég er ekkert endilega viss um það. 


mbl.is Hátt skuldatryggingarálag bankanna til umræðu erlendis
Tilkynna um óviðeigandi tengingu við frétt

Næsta síða »

Bloggvinir

Innskráning

Ath. Vinsamlegast kveikið á Javascript til að hefja innskráningu.

Hafðu samband