Gott að vita af þotum Obama

Ég gat ekki annað en tekið undir með sjóaranum sem ég rakst á í sundi sem sagði frá því að honum hlýnaði um hjartaræturnar að vita af því af amerísk flugsveit væri komin á ný til landsins.  Hann sagðist fyllast öryggistilfinningu af því að vita af þotunum á meðan á landinu dynja hótanir úr Evrópu.

Það er óneitanlega undarlegt að Evrópusambandið skuli beina spjótum sínum að Íslensku þjóðinni á meðan aðildarviðræður standa yfir.   Ef að Evrópusambandið sér nokkurn flöt á ágreiningi við smáþjóðina sem er að banka á dyrnar hjá sambandinu þá er ekki að sökum að spyrja að allir kraftar eru notaðir til þess að kreista smáþjóðina m.a. í Icesavemálum og makríldeilum.

Getur þjóðin treyst Ögmundi - Svarið er Nei

Ögmundur er að reyna að píska upp einhverja stemmningu meðal þjóðarinnar gegn fjárfestingu Samfylkingar-Núbó. Sjálfum finnst mér rétt að gjalda varhug við strandhöggi Kínverjans þó svo að hann leiti einungis eftir að slá upp háhýsum á hálendi sem fáum fáum er til gagns.  Ögmundur sem þykist nú standa vörð um hagsmuni þjóðarinnar, virðist á sama tíma vera slétt sama um að nokkrir séu slá eign sinni á fiskveiðiauðlind landsmanna. Ef sjávarútvegsfrumvörp ríkisstjórnarinnar ná fram að ganga mun helsta náttúruauðlind landsmanna halda áfram að verða veðsett og verða bitbein í erfða- og skilnaðarmálum skuldsettu furstanna sem nú ráða ríkjum á Íslandi.   

Ögmundur flutti þingmál um að standa vörð um mannréttindi og jafnræði til nýtingar á sjávarauðlindinni en þegar hann varð mannréttindaráðherra, þá varð það gleymt.  Bitur reynslan segir að  Ögmundur og Vg munu aðstoða Núbó við að taka fyrstu skóflastunguna ef að flokkurinn verður við völd en öskra og æpa gegn Núbó ef að flokkurinn verður í stjórnarandstöðu.

Sjálfstæðisflokkurinn leggst gegn rannsókn á lögbrotum

Ekki var að heyra á Bjarna Ben í Silfrinu annað en að hann vildi fara nákvæmlega sömu leið og fyrir hrun og nota sömuleiðis að mestu sömu mennina og áður, í helstu verkin.

Greinilegt var að formaður Sjálfstæðisflokksins var mjög andsnúinn rannsókn; lögreglu, sérstaks saksóknara og Seðlabankans á lögbrotum Samherja. Hann talaði um innrás í fyrirtækið og að brotin snéru fyrst og fremst að lögum sem menn vildu ekki hafa, þ.e. lög um gjaldeyrishöftin.

Málflutningurinn og afstaðan gegn lögum og reglum minnti frekar á orðræðu aktífista eða vítisengils en formanns í borgarlegu stjórnmálaafli.  Reyndar á Bjarni það sammerkt með öðrum formönnum fjórflokksins og bæjarstjóranum á Dalvík, að gera enga athugasemd við að Samherji hafi tekið stærsta vinnustaðinn á Dalvík í gíslingu vegna rökstuddra aðgerða yfirvalda.  Það er engu líkara en það sé búið að normalisera bullið - Vitleysan sé orðin eðlileg.

Umræðan um kvótakerfið var ekki upp á marga fiska en formaður Sjálfstæðisflokksins vildi meina að kerfið hefði sannað ágæti sitt og í stað þess að útvegurinn væri upp á þjóðina kominn líkt og á níunda og tíundartugnum, þá væri hann að skila miklu.  Þetta er auðvitað argasta kjaftæði enda má spyrja í framhaldinu ef að þetta tal væri tekið trúanlegt -  á hverju lifði þjóðin þá á síðustu öld?  Staðreyndin er sú að þorskaflinn á níundaáratugnum var um tvöfalt meiri þá, en nú.

„Af hverju eruð þið að þessu?“

Xdogun.is - Krefjumst réttlætis og heilbrigðrar skynsemi

Undirskriftasöfnun fer nú fram á heimasíðunni http://www.xdogun.is/askorun/ þar sem þess er krafist að stjórnvöld leyfi þjóðinni að greiða atkvæði um framtíðarfyrirkomulag við stjórn fiskveiða.  Það er nauðsynlegt að koma með öllum ráðum í veg fyrir að ólög Steingríms J. nái fram að ganga.

Hér að neðan er greinargerð sem fylgir undirskriftasöfnuninni.

- GREINARGERÐ -

Með nýjum lögum um stjórn fiskveiða er núverandi handhöfum aflaheimilda tryggður forgangur, sem stenst ekki jafnræðisákvæði stjórnarskrárinnar, til að minnsta kosti 20 ára. Auk þess stenst það engan veginn nýja stjórnarskrá sem stjórnlagaráð hefur samið. Núverandi stjórnarmeirihluti lofaði fyrir síðustu kosningar að breyta stjórnkerfi fiskveiða þannig að jafnræði yrði tryggt. Það frumvarp sem liggur fyrir Alþingi gengur í þveröfuga átt (657. mál, þskj. 1052, 140. löggjafarþing) (http://www.althingi.is/altext/140/s/1052.html).

Fyrir síðustu alþingiskosningar, í apríl 2009, voru báðir ríkisstjórnarflokkarnir, Samfylking og VG, á einu máli um að fiskveiðistjórnunarkerfið væri svo ranglátt að það yrði að leggja niður í núverandi mynd og taka upp nýtt kerfi. Lofuðu báðir flokkar að taka tillit til ályktunar mannréttindanefndar SÞ sem átaldi ójafnræði milli borgara í aðgengi að auðlindinni og að ekki gengi að úthluta henni sjálfkrafa til sömu aðila ár eftir ár. Fjölmiðlar eru hvattir til þess að ganga eftir þessum loforðum.

Báðir stjórnarflokkarnir lögðu til 20 ára aðlögunarferli fyrir núverandi kvótahafa og kvótinn, sem þannig kæmi til úthlutunar, yrði leigður á almennum uppboðsmarkaði, beint af ríkinu. Báðir stjórnarflokkarnir einsettu sér að tryggja þjóðareign fiskimiðanna, bæði í raun og að lögum. Sömuleiðis átöldu báðir flokkarnir kvótaframsalið sem leitt hefur til gífurlegrar byggðaröskunar. Við þetta má bæta að eitt af 100 daga markmiðum ríkisstjórnarinnar voru frjálsar handfæraveiðar.

Í nýju frumvarpi ríkisstjórnarinnar um stjórn fiskveiða nær ekkert þessara markmiða fram að ganga. Þvert á móti er núverandi kerfi fest enn frekar í sessi og jafnvel ýtt undir væntingar kvótahafa um bótarétt við breytingar síðar.

Þá vantar inn í frumvarpið að hagsmunir og samkeppnisstaða fiskvinnslu án útgerða séu tryggð til jafns við fiskvinnslu með útgerð.

Skorum við því á ríkisstjórnina að halda þá sátt sem hún gerði við þjóðina í aðdraganda þingkosninga 2009 og í stjórnarsáttmála í kjölfarið. Þjóðin mun aldrei sættast á efni fyrirliggjandi kvótafrumvarps (þskj. 1052 — 657. mál, 140. löggjafarþing).

Að öðrum kosti er forseti Íslands með áskorun hér að ofan hvattur til þess að synja frumvarpinu staðfestingar þannig að þjóðin skeri úr - enda á þjóðin rétt á því að útkljá þetta mál, sem deilt hefur verið um í á þriðja áratug.

Ekkert sem kemur á óvart!

Árni Þór sem kosinn var sem þing á þeim forsendum að hann væri andstæðingur aðildar Íslands að Evrópusambandinu, flytur mál sitt eins launaður blaðafulltrúi Evrópusambandsins.

Eitt er ljóst að hann er ekki að tala fyrir hönd þjóðarinnar sem hafnaði alfarið þeim Icesavesamningum sem um er deilt og þingmaðurinn samþykkti tvisvar.

Ég vonast svo sannarlega eftir því að það verði flutt vantrauststillaga sem allra fyrst á eina ömurlegustu ríkissjórn sem verið hefur við völd á landinu, frá upphafi vega.

„Ekkert sem kemur okkur á óvart“

Alþjóðahafrannsóknarráðið reiknar út að þorskaflinn á árinu 2060 verði 180 þúsund tonn

Ekki er öll vitleysan eins - og þó.

Skömmu eftir að meirihlutastjórn Vg og Samfylkingar tók við völdum, þá óskaði Jón Bjarnason sjávarútvegsráðherra eftir þvi við Alþjóðahafrannsóknarráðið, að ráðið yfirfæri veiðiráðgjöf og þá reglu sem notuð er við að ákvarða þorskafla landsmanna.

Þegar Einar K. Guðfinnson frétti af bréfinu til ráðsins, þá ærðist hann í fjölmiðlum.  það var óskiljanlegt, þar sem Einar K. kom á þeirri aflareglu sem Jón Bjarna var að spyrja um.   

Alþjóðahafrannsóknarráðsins svaraði fyrirspurn Jóns Bjarna um hálfu ári síðar og gerði það svo rækilega að það sagði nokkuð nákvæmlega til um hver þorskaflinn yrði næstu hálfu öldina og jafnvel lengur. Í svari reiknisfiskifræðinganna var ekkert sem kallast gæti líffræði, heldur einungis vitnað í reiknilíkan þar sem eina breytan voru veiðar. Sömuleiðis var reiknað út frá tveimur forsendum sem snúa að nýliðun.  Miðað við núverandi aflareglu og nýliðun, þá eru allar líkur á því að þorskaflinn á Íslandsmiðum muni á árinu 2060, verða 180 þúsund tonn!

Ef að nýliðun fer hins vegar mjög vaxandi,  þá reikna reiknisfiskifræðingarnir að þorskaflinn aukist mjög á næstu árum og fari í um 270 þúsund tonn og haldist síðan stöðugur næstu hálfu öldina.

 

Allir sem fylgjast með villtum dýrastofnum vita að þessir útreikningar eru hrein og klár vitleysa.  Vistfræði 101 segir að dýrastofnar rísi og hnígi, en sú staðreynd hefur augljóslega ekki ratað inn í reiknilíkanið.

Eflaust myndi maður hlæja að þessu bulli en þar sem þingheimur allur virðist trúa þessu bulli, þá hefur þvælan grafalvarlegar afleiðingar fyrir Íslendinga.

Fiskmörkuðum slátrað - Rugludallar setja reglur

Frumvörp ríkisstjórnarinnar í sjávarútvegsmálum fela í sér algjör svik við kosningaloforð "vinstri" hluta fjórflokksins.  Mannréttindabrotum og mismunun mun verða haldið áfram næstu áratugina ef frumvörpin ná fram að ganga.

Augljóst er að frumvörpin munu enn frekar girða  fyrir nýliðun og leiða til frekari hnignunar og samþjöppunar í greininni.  Útfærslan á veiðigjaldinu mun beinlínis verða til þess að fiskmarkaðir munu leggjast af.  Ástæðan er sú að fiskmarkaðir gefa útgerðinni almennt mun hærra verð en það sem gerist í "viðskiptum" tengdra aðila á Verðagsstofuverði.  Hvati er beinlínis til þess að hagnaði útgerðar sé haldið niðri með lágum tekjum og fiski landað inn í eigin vinnslu þar sem hlaðið er á kostnaði. Þau sjávarútvegsfyrirtæki sem eitthvað mega sín munu síðan stofna "fisksölufyrirtæki" í útlöndum ef þau eiga ekki slíkt fyrirtæki nú þegar, sem munu losa út hagnaðinn í auknum mæli erlendis. 

Í stað þess að stjórnin tryggði að megnið af fiski yrði landað á fiskmarkað og að fiskur yrði skilyrðislaust verðlagður í öllum viðskipum á markaðsvirði, þá er haldið áfram með tvöfalda verðlagningu og ónýtt kvótakerfi.  Ein áhrifaríkasta leið stjórnvalda til þess að tryggja að gjaldeyrishöftin haldi og að verðmætin skili sér inn í landið með lögmætum hætti, er að hætta tvöfaldri verðlagningu sem hvetur til undarlegra viðskiptahátta.

Stjórnin er nýbúin að setja reglur um bann við lúðuveiðum en hún veiðist mest sem meðafli og gerir enn. Til þess að koma í veg fyrir veiðarnar þá voru settar þær reglur um að lúðu skyldi landað á fiskmarkað og andvirði aflans yrði gert upptækt.  Ágætt verkefni væri nú fyrir rannsóknarblaðamann að kanna hve háar fjárhæðir ríkissjóður hefði aflað vegna gjaldtökunnar.  Ég reikna fastlega með því að það séu örfáar krónur, þar sem að það mun heyra til undantekninga að lúðu sé landað á landað.

Það er augljóst að kvótakerfið er ekki að ganga upp sem fiskveiðistjórnunarkerfi og segir meðfylgjandi súlurit allt sem segja þarf um "árangur" kerfisins.

Þögn þingmanna Norðausturkjördæmis um gíslatöku Samherja á Dalvík

Mér finnst þögn innanríkisráðherra og þingmanna Norðausturkjördæmisins um gíslatöku Samherja á Dalvík æpandi. Ógeðfelldar viðskiptaþvinganir Samherja gagnvart íslenskum stjórnvöldum ættu að kalla á hörð viðbrögð kjörinna fulltrúa almennings. Sérstaklega ættu þingmenn í Norðausturkjördæminu að beita sér, þar sem fyrirtækið hefur reitt sérstaklega til höggs á Dalvík.

Það eina sem hefur frést af þingmönnunum er að Björn Valur gerði fremur lítið úr tvöfaldri verðlagningu Samherja og svindli á gjaldeyrislögum, í grein sinni "bakara fyrir smið.."

Þögn þingmannanna sem vanir eru að nota hvert tækifæri sem gefst til að láta á sér bera, segir meira en flest um hvaða hagsmuni þeir setja í forgang og hvern þeir vilja alls ekki styggja.  Greinilegt er að hagsmunir þjóðarinnar og fiskvinnslufólksins á Dalvík eru þar mjög neðarlega á blaði þingmannanna.  

Krefjast þess að fá að sjá gögnin

Samherji hf. beitir Ísland og Íslendinga viðskiptaþvingunum

Dótturfélag Samherja beitir Ísland og Íslendinga viðskiptaþvingunum!  Það er engin spurning að íslensk stjórnvöld ættu að svara í sömu mynt.  Það er ekkert náttúrulögmál að Samherji skuli fá nánast óheftan aðgang að náttúruauðlindum þjóðarinnar án endurgjalds.  

Það sannast hér sem aldrei fyrr að sjaldan launar kálfurinn ofeldið.  Í ljósi þessa er furðulegt að þingið sé núna að bögglast með frumvarp, þar sem verið er að afhenda þessu sama fyrirtæki náttúruauðlindir þjóðarinnar til varanlegrar eignar.

 

DFFU hættir viðskiptum við Ísland

Sjálfseyðingarhvöt Samfylkingarinnar

Samfylkingin, ásamt Steingrími J, er nú á miklu spretthlaupi við að veita Samherja og öðrum helstu útgefendum Morgunblaðsins nánast einokun á því að nýta fiskimiðin út 21. öldina.

Í kappi stjórnarflokkanna við að afhenda eigur almennings eru mannréttindi og jafnræði látin lönd og leið. Sömuleiðis er algerlega litið fram hjá því að "árangur" kvótakerfisins hefur verið hræðilegur við að ná upphaflegu markmiði sínu sem var að auka afla á Íslandsmiðum.

Nú þegar hafa eigendur Moggans, sem eru ráðandi í LÍÚ og SA, nánast kverkatak á stjórnvöldum þó svo að nýtingarrétturinn sé einungis veittur til eins árs í senn og að helstu eigendur séu illilega flæktir í vafasama gjörninga í aðdraganda hrunsins.

Við öllu hugsandi fólki blasir að kvótafrumvarp Steingríms J.  mun styrkja stöðu Moggamanna í samfélaginu og ég leyfi mér að efast um að það muni verða Samfylkingunni og Evrópumálum sem flokkurinn setur á oddinn til framdráttar.

Kannski var eftir allt saman engin meining á bak við  Evrópustefnu Samfylkingarinnar frekar en afnám verðtryggingarinnar og réttláta fiskveiðistjórnun.

Vilja vita ástæður húsleitarinnar