Virkjanir áfram, ekkert stopp - vinstri grænir

Það er gaman að fylgjast með því að norðan að vinstri grænir eru í virkilega góðum gír í höfuðborginni og sælir og glaðir enda komnir í stjórn hjá Framsókn. Gleðivíman er svo mikil að þeir eru búnir að steingleyma þeim málum sem þeir höfðu áhyggjur af fyrir örfáum vikum, s.s. bréfi umboðsmanns Alþingis. Um þetta erindi héldu þeir tilfinningaþrungnar ræður fyrir skemmstu en nú er öldin önnur og kjörnir fulltrúar hafa ekki lengur tíma í svona erindi og embættismaður settur í að svara bréfinu.

Sælan og gleðin er svo barnsleg og tær að þeir virðast ekki hafa nokkrar minnstu áhyggjur af þeim málum sem flokkurinn er þó stofnaður í kringum. Gleðin virðist ekki eiga sér nein takmörk. Ekki ber á því að vinstri grænir séu neitt að breyta kúrs borgarinnar í virkjunarmálum. Virðast vinstri grænir taka heils hugar undir með Birni Inga í virkjanakórnum um árangur áfram, ekkert stopp. Ætla flokkarnir í sameiningu að brjóta land undir nýjar virkjanir OR, REI og GGE þar sem er gríðarlega verðmætt útivistarsvæði Reykvíkinga ef marka má fróðlega síðu hengill.nu. Ekki virðist spilla neitt fyrir gleði vinstri grænna að það eigi að nota mest af orkunni sem verður virkjuð á útivistarsvæðinu til að knýja álver í Helguvík.

Billegur sjóari

Í Mogganum mínum í morgun renndi ég í gegnum grein eftir Friðbjörn Orra Ketilsson þar sem hann jós kjaftagleiður sviguryrðum að ritstjórn Moggans. Í sjálfu sér hefði það verið góðra gjalda vert ef sjóarinn hefði rökstutt mál sitt. Þessi ódýri málflutningur kom mér í sjálfu sér ekki á óvart þar sem ég sat einhverju sinni í þættinum Silfri Egils með honum þar sem hann viðhafði ómerkilegan málflutning og ýkti fjölda múslima í landinu.

Það sem kom mér hins vegar skemmtilega á óvart var að Friðbjörn titlaði sjálfan sig sem formann Félags ungs fólks í sjávarútvegi. Ég ákvað að kynna mér störf hans og reynslu af atvinnugreininni sem hann hafði greinilega miklar skoðanir á og fordæmdi aðra harkalega fyrir að vera ekki sömu skoðunar. Í ferilsskrá Friðbjarnar sem fram kemur á heimasíðu hans eru engar upplýsingar um að hann hafi starfað í sjávarútvegi. Hann hefur hins vegar átt farsælan starfsferil hjá verslunarkeðjunni Bónus. Þetta er því vel varðveitt leyndarmál hjá formanni Félags ungs fólks í sjávarútvegi.

Það væri forvitnilegt ef einhver gæti upplýst um störf þessa kraftmikla sjómanns.

Hamskipti SKK og ISG á LÍÚ-fundum

Enn og aftur gerist það að ræðumenn á LÍÚ-fundum hafa hamskipti og tala upp í eyrun á fundarmönnum. Hver man ekki eftir formanni Samfylkingarinnar, Ingibjörgu Sólrúnu Gísladóttur, sem breyttist í einlægan stuðningsmann kvótakerfisins á fundi LÍÚ fyrir sléttum tveimur árum? Nú bárust fréttir af hinum unga og efnilega þingmanni þjóðarinnar, Sigurði Kára Kristjánssyni, sem var ræðumaður á þinginu og talaði eins og beint upp úr leiðara Þorsteins Pálssonar sem tók einmitt þátt í að koma kerfinu á.

Það skýtur skökku við að Sigurður sem er gagnrýninn á flest óbreytanleg kerfi, s.s. vínsölu ríkisins, skuli skrifa upp á kvótakerfi sem er sannanlegt skrýmsli. Það kemur í veg fyrir nýliðun ungs fólks í greininni og þorskveiði er nú, eftir uppbyggingarstarf kvótakerfisins, innan við þriðjungur þess afla sem veiddur var áður en kerfið var sett á laggirnar.

Það má vera að kerfið gangi upp séð með gleraugum lögfræðinnar og stjórnsýslufræða en fyrir þá sem þurfa að vinna eftir því og fyrir heildarhagsmuni þjóðarinnar gengur það ekki upp. 

Er ekki sanngjarnt að ætlast til þess af ungu fólki sem er á þingi, hvort sem það heitir Sigurður Kári eða Birkir Jón eða Katrín Júlíusdóttir eða Katrín Jakobsdóttir, að það taki ofan hin þröngu kerfisgleraugu og efli með sér kjark til að fara í gegnum ágalla kerfisins, hörmungasögu þess og leita lausna sem virka í stað þess að draga upp fegraða mynd af kerfinu? Þau voru ekki á dögum þegar kerfinu var komið á og ættu þess vegna ekki að upplifa sig í þeim sporum að þurfa að verja gjörðir flokksfeðranna.

Hugvit á Siglufirði

Ég er kominn á fulla ferð í gömlu nýju vinnunni minni hjá Heilbrigðiseftirliti Norðurlands vestra. Mér hlotnaðist m.a. sá heiður á nýlegum aðalfundi Félags heilbrigðisfulltrúa að vera kosinn ritari. Ég bíð nokkuð spenntur eftir fyrsta stjórnarfundinum sem verður boðaður í vikunni en það starf leiðir bloggvinkona mín Svava Steinarsdóttir.

Það er ýmislegt að gerast þessa dagana á sviði umhverfismála í sveitarfélögum landsins. Víða er leitað leiða til að minnka úrgang, t.d. með jarðgerð. Síðasta fimmtudag skoðaði ég með heilbrigðisnefnd Norðurlands vestra nýja moltumaskínu sem framleidd er á Vélaverkstæði SR á Siglufirði. Til stendur að sú vél muni jarðgera allan lífrænan úrgang frá íbúum Siglufjarðar, og þegar fram líða stundir og austurhlutinn verður tengdur vesturhlutanum verður úrgangi líka safnað þaðan, þá líka frá Ólafsfirðingum.

Ef þetta verkefni gengur vel í Fjallabyggð eru líkur til að hægt verði að koma tækinu í gagnið á fleiri stöðum á landinu. Svo náttúrlega eru Króksarar komnir af stað með að jarðgera allan lífrænan úrgang frá sláturhúsinu sem er eitt stærsta sláturhús landsins. Búnaðurinn verður formlega tekinn í notkun á ráðstefnu sem mig minnir að verði haldin 8. nóvember nk.

Vonandi gengur allt vel hjá Siglfirðingunum. Það er brýnt að menn sjái tækifæri og lausnir þegar rætt er um umhverfismál og komi umræðunni í jákvæðan farveg.

Friðardúfan Össur

Útreikningar mínir sem ekki hafa verið dregnir í efa sýna svart á hvítu að það hafa tapast út úr rjúpnastofninum um 400 þúsund rjúpur á síðustu tveimur árum umfram það sem reiknilíkan Náttúrufræðistofnunar getur skýrt. Reiknilíkanið "góða" var notað til grundvallar veiðiráðgjöf umhverfisráðherra Þórunnar Sveinbjarnardóttur sem lagði til að 38.000 rjúpur yrðu veiddar þetta haustið. Veiðin er því innan við 10% af því sem tapast hefur út úr líkaninu.



Ég kynnti þessa útreikninga á vef veiðmanna hlad.is og síðan í blaðagrein í Blaðinu. Það er óhætt að fullyrða að ég hafi fengið vægast sagt mjög sterk viðbrögð frá veiðimönnum um allt land en nokkrir tugir höfðu samband og óskuðu eftir að fá útreikningana senda sem staðfestu hversu gapandi vitlaust líkanið er. Það voru ekki einungis veiðimenn sem óskuðu eftir að fá útreikningana senda heldur einnig nokkrir líffræðingar sem trúðu ekki að því væri haldið fram af Náttúrufræðistofnun að veiðar mögnuðu upp önnur afföll rjúpnastofnsins.



Í bréfaskiptum mínum við veiðimenn hefur komið fram mikið vantraust á grundvöll rjúpnaráðgjafarinnar og telja þeir að lítið mark sé tekið á sjónarmiðum þeirra. Sama vantraust virðist vera uppi af hálfu helstu sérfræðinga sem koma að veiðiráðgjöfinni í garð veiðimanna en við mat á veiðinni er ekki tekið mark á skýrslum veiðimanna sem velflestir fylla út samviskusamlega, heldur er einungis lögð til grundvallar neyslukönnun sem gerð er af Gallup.



Það skiptir afar miklu máli að það verði gætt að því að nýr umhverfisráðherra Þórunn Sveinbjarnardóttir grafi ekki frekar undan því trausti og samstarfi veiðimanna og stjórnvalda en sá sem lagði góðan grunn að því samstarfi er einmitt Össur Skarphéðinsson þegar hann kom á fót veiðikortakerfinu. Fyrrverandi umhverfisráðherra tókst svo vel upp með að innleiða veiðikortakerfið að veiðimaður hér norðanlands á það til að nefna Össur friðardúfu veiðimanna.



Einn mikilvægur þáttur í því að efla traust er í mínum huga að svara málefnalegri gagnrýni veiðimanna eins og þeirri sem ég hef lagt fram. Með því mætti eyða misskilningi og endurreisa traust á veiðiráðgjöf umhverfisráðherra.

Fær Örn Pálsson Nóbelinn?

Örn Pálsson, framkvæmdastjóri Landssambands smábátaeigenda, hefur verið gagnrýninn á ráðgjöf Hafró enda er það engin furða. Niðurskurður á aflaheimildum hefur ekki leitt til aukinnar veiði seinna eins og hefur verið lofað á síðustu 20 árum. Nú er ástandið svo að við veiðum um 30% af því sem við veiddum að jafnaði af þorski um áratugaskeið áður en þetta sérkennilega uppbyggingarstarf hófst.

Örn Pálsson er farinn að setja spurningarmerki eins og sá sem slær hér á lyklaborðið við uppbygginguna. Á heimasíðu smábátafélagsins LS gerir hann grein fyrir stórmerkilegri uppgötvun sem hann byggir á gögnum Hafrannsóknastofnunar sem a.m.k. íslensk stjórnvöld með sjávarútvegsráðherrann í broddi fylkingar gera ekki athugasemd við og fara eftir í blindni.

Í þessum gögnum kemur fram að fiskur léttist gríðarlega eftir því sem hann eldist. Í skýrslum Hafró samkvæmt úrvinnslu Arnar kemur fram að þorskur sem var 11 ára árið 2004 hafi þá mælst að meðaltali um 11 kg en nú, þegar hann er orðinn 14 ára, mælist hann að meðaltali tæp 7 kg. Ef þetta væri raunin væru þetta stórmerkilegar niðurstöður og Örn ætti ekki minna skilið en Nóbelinn fyrir uppgötvanir sínar.

 

Belgingur í Bifrastarstjórninni

Margir bundu vonir við nýja stjórn Orkuveitunnar, að þar yrði valinkunnið fólk, bæði fyrrum rektor Bifrastar og núverandi aðstoðarrektor, sem myndi koma festu og trúverðugleika á í stjórn OR. Ekki byrjar þó Jón Sigurðsson gæfulega þar sem hann belgir sig út í blöðunum og storkar landsmönnum í viðtalinu í dag með því nánast að hvítþvo vægast sagt vafasöm vinnubrögð við stofnun REI. Hann snýr almennri hneykslan og vantrú almennings á vinnubrögð sem hafa verið viðhöfð upp í barnaskap einstakra borgarfulltrúa Sjálfstæðisflokksins.

Jón Sigurðsson ætti að vita manna best að efasemdir og vantrú eru ekki síst meðal nýrra samstarfsmanna Framsóknaflokksins í borgarstjórn þannig að yfirlýsingar hans eru að mínu mati algjörlega taktlausar og eins og hann sé að storka bæði nýjum meirihluta og almenningi í landinu.

Bernskir borgarfulltrúar

Grípur rektor inn í störf prófessors Baldurs?

Enn og aftur kemur Baldur Þórhallsson í fjölmiðla og skreytir sig með prófessorstign við Háskóla Íslands, æðstu menntastofnun þjóðarinnar. Í kvöld birtist hann gleiður á skjánum og lýsti fjálglega stöðu mála innan Sjálfstæðisflokksins og pólitískri stöðu fyrrum borgarstjóra, lýsti því yfir að Vilhjálmur væri í þröngri stöðu. Sem áður voru þessar yfirlýsingar fræðimannsins ekki rökstuddar, hvað þá að einhverjar rannsóknir hafi legið að baki þessari niðurstöðu. Mér finnst fráleitt að fræðimaður á sviði stjórnmála skuli nefna aðeins annan þeirra sem bar ábyrgð á framvindu mála í REI-málinu og hlaupa alveg yfir þátt hins, þ.e. Björns Inga Hrafnssonar, þegar hann ræðir pólitíska stöðu þeirra og flokka þeirra.

Ég get ekki betur séð en að Björn Ingi Hrafnsson beri síst minni ábyrgð á klúðrinu sem varð til þess að skyndilega var búið að einkavæða orkuauðlindir almennings. Ég held að fólk sjái í gegnum þetta og að Baldur stundar pólitískan spuna til að koma höggi á Sjálfstæðisflokkinn sem er dulbúið í fræðilegan búning. Ég er ekki viss um að þessi ráð sem hann veitti forsætisráðherra um að grípa inn í og koma Vilhjálmi frá í borgarstjórn hafi verið veitt af umhyggju fyrir Sjálfstæðisflokknum eða almannahagsmunum. Ef almannahagsmunir hefðu ráðið för hefði hann frekar beint sjónum sínum að Birni Inga Hrafnssyni. Hann situr í meirihlutanum sem hefur völd og raunveruleg áhrif á hvernig greitt verður úr þessu hneyksli sem REI-málið óneitanlega er.

Þorskurinn og Guðfinna Bjarnadóttir

Mér þótti nokkrum tíðindum sæta að líffræðiskor Háskóla Íslands skyldi álykta harkalega gegn einum óbreyttum nýliða á þingi, Guðfinnu S. Bjarnadóttur. Ástæðan var sú að nýliðinn vildi ekki setja skólum Evrópu fyrir hvort þróunarkenningin væri kennd sem fræði eður ei. 

Eflaust hefur þessi harði tónn komið ýmsum fleirum á óvart þar sem deilur líffræðiskorar HÍ og guðfræðideildar við sama skóla hafa ekki farið mjög hátt.  

Ég hefði talið miklu nærtækara fyrir líffræðiskor háskólans að beina gagnrýninni hugsun sinni að reiknisfræðilegri fiskveiðiráðgjöf sem er á góðri leið með að rústa sjávarútvegi víða um heim enda stangast fræðin á við viðtekna vistfræði. Landsmenn vita að þessi fræði hafa ekki gengið upp hér við land en nú er aflinn um 30% af því sem hann var að jafnaði um áratuga skeið. 

Í Norðursjónum eru þessi fræði lengra gengin og þorskaflinn nú einungis um 10% af því sem hann var áður en uppbyggingarstarfið hófst þar með markvissu uppbyggingarstarfi. Nú berast fréttir af því að að nýliðun hafi aukist annað árið í röð en ráðgjöfin er alltaf sú sama: aukinn niðurskurður á aflaheimildum. Í fyrra var ráðgjöfin þorskveiðibann og í ár var lagður til verulegur niðurskurður.

Það er orðið löngu tímabært að fræðasamfélagið taki þessa fiskveiðiráðgjöf til gagngerrar endurskoðunar, þ.e. ef þessi fræði eiga að verða meðhöndluð eins og vísindi en ekki trúarbrögð.

Aukin nýliðun í þorskstofninum í Norðursjó

Vestfirskir sjómenn gáttaðir á Einari Kristni

Nú um helgina hitti ég fjölmarga smábátasjómenn af Norðurlandi og áttu þeir það sammerkt að þeir hafa enga trú á ráðgjöf Hafrannsóknastofnunar um niðurskurð á aflaheimildum í þorski. Þeir töldu útilokað að veiða 90 þúsund tonn í ýsu samanborið við veiðiheimildir í þorski upp á 130 þúsund tonn. Nú verður örugglega lögð áhersla á að hanna og útbúa veiðarfæri sem sneiðir hjá þorskinum. Það er fáheyrð vitleysa að vera að hanna veiðarfæri sem veiða ekki.

Nú berast fréttir af því vestan af fjörðum að einn af stærri togurum landsmanna, Örfiriseyin, sé að skarka lengst inni í Ísafjarðardjúpi og verði að því í rúma viku, þ.e. hamist á hefðbundinni veiðislóð smábáta. Fréttir herma að verið sé að gera tilraunir með troll sem sneiðir hjá þorski. Vestfirskir sjómenn sem hafa haft samband við mig kunna þessum mótvægisaðgerðum sem samþykktar eru sérstaklega af Einari Kristni sjávarútvegsráðherra ekki neinar þakkir og vildu helst vera lausir við þær. Hér er um að ræða mikilvæga veiðislóð sem smábátasjómenn nýta sér þegar belgingur er í veðrinu, þá er hægt að fara inn í Djúpið þótt þeir þurfi betra veður til að fara út á rúmsjó.

Það er orðið löngu tímabært að taka til endurskoðunar alla þessa fiskveiðistjórnun og gera miklu frekar tilraunir til að auka frelsi í greininni í stað þess að setja stærstu togara landsins í tilraunaverkefni innfjarðar. 

Í vikunni verður haldinn aðalfundur LS og reiknað er með að þar verði teknar snarpar umræður um málin. Það sem kemur mér á óvart er að á dagskrá fundarins er enginn málsmetandi aðili sem hefur haldið uppi málefnalegri gagnrýni á líffræðilegar forsendur núverandi fiskveiðistjórnunar, s.s. Jón Kristjánsson fiskifræðingur.