Landsbankinn vandar um við Davíð Oddsson

Þegar jatan er tóm bítast hestarnir. Það á vel við um íslenskan fjármálamarkað um þessar stundir. Kaupþingsstjórinn skammaði ríkisstjórnina í heilu lagi um daginn fyrir efnahagsaðgerðir sínar og nú í Fréttablaðinu í dag má lesa grein eftir einn æðsta yfirmann Landsbankans þar sem lesa má á milli línanna að verið sé að vanda um við Davíð Oddsson og stefnuna í peningamálum þjóðarinnar.

Ástandið í peningalífi þjóðarinnar er auðvitað ekki krónunni sem slíkri að kenna, heldur því að bankarnir fóru gríðarlega geyst í að bera inn í landið erlent lánsfé á mjög lágum vöxtum og síðan þegar kjörin versnuðu lentu bankarnir og gengi íslensku krónunnar í miklum ólgusjó. Það er barnalegt hjá yfirmanni Landsbankans að ætla að kenna krónunni og Seðlabankanum alfarið um erfiðleikana, miklu nær væri að bankarnir litu einnig í eigin barm.

Það er ekki þar með hægt að segja að viðskiptabönkunum sé einum um að kenna, Seðlabankinn ber einnig ábyrgð vegna andvaraleysis síns og Geir Haarde er sekur um hið sama. Hann hefði átt að stemma stigu við gríðarlegri lántöku bankanna, sér í lagi vegna þess að menn fengu aðvaranir á sínum tíma, m.a. frá Danske bank.

Það er ekki fyllilega ljóst af hvaða hvötum Landsbankinn vandar um við Davíð Oddsson en maður heyrir æ fleiri raddir innan úr Sjálfstæðisflokknum tala um að þær sakni Davíðs Oddssonar og styrkrar stjórnar hans samanborið við lausatök Geirs Haarde í vonlausu samkrulli með Samfylkingunni.

Gengisfall skýri verðbólgu

Við hvað eru menn hræddir?

Uppi eru gríðarlegar efasemdir hjá þeim sem starfa í sjávarútvegi um ráðgjöf Hafró. Sjómenn hafa fyrir löngu misst trúna á hana og hið sama á við um fjölda útgerðarmanna, enda hefur ráðgjöfin á síðustu 20 árum leitt til minni og minni afla.

Jón Kristjánsson fiskifræðingur og fleiri hafa sagt til um að sú aðferðafræði sem unnið er með geti aldrei gengið upp. Og það hefur gengið eftir. Þess vegna er spurning hvers vegna hagsmunaaðilar, s.s. útgerðarmenn, samtök sjómanna og Landssamband smábátaeigenda, fjölmiðlar og stjórnvöld, verja ekki örlitlum tíma í að fara yfir hlutina.

Við hvað eru menn hræddir?

Líklegasta skýringin er sú að fulltrúar allra þessara framangreindu aðila hafa með einum eða öðrum þætti, s.s. Þorsteinn Pálsson, ritstjóri Fréttablaðsins, komið að því að móta kerfið.

Tíma stjórnvalda og atvinnuþróunarfélaga er varið í annað eins, s.s. olíuhreinsunarstöð, koltrefjafyrirtæki og fjölda nýrra álvera, á sama tíma og það er tabú að fara yfir hvort hægt sé að nýta betur þau atvinnutæki sem fyrir eru í landinu, þ.e. skipin og frystihúsin, með því að veiða meiri þorsk. Við það eitt gætu skapast gjaldeyristekjur strax upp á tugi milljarða án nokkurs stofnkostnaðar.

25% verðbólga - fjöldauppsagnir og Samfylkingin í Sýrlandi

Fólk sem nýbúið er að segja upp og horfir fram á vaxandi dýrtíð hlýtur að furða sig á áherslum Samfylkingarinnar þessa dagana en flokkurinn bauð kjósendum fyrir rétt rúmu ári síðan upp á ábyrgð, jafnvægi og framfarir í íslensku efnahagslífi.

Nú er það allt gleymt og áherslur flokksins eru  fyrir botni Miðausturlanda.  Sádí Arabar voru hér á ferðinni í vikunni og nú berast fréttir af leiðtoga "jafnaðarmanna" boða frið í Sýrlandi en hún hefur örugglega rétta svarið sem mun leysa áratuga deilur í heimshlutanum. Ætli leið hennar liggi ekki næst til Írans og síðan til Norður Kóreu og loki síðan túrnum á Ólympíuleikunum í Kína.

Hvar er Geir - ætli hann sé enn í útlöndum?

Er ekki kominn tími til fyrir þetta ágæta fólk og lenda og fara yfir þá möguleika sem eru í stöðunni s.s. að veiða meiri þorsk?

Verðbólga mælist 12,7%

Blaðamaður Fishing News mætti

Fundurinn í gær tókst ágætlega. Þar mætti m.a. blaðamaður Fishing News og var á honum að heyra að honum þætti af þeim gögnum og rökum sem voru kynnt til sögunnar ráðlegt að veiða meira, þ.e. að ráðgjöf Hafró sé snarvitlaus. Honum þóttu rök okkar Jóns Kristjánssonar ganga upp.

Væntanlega verður umfjöllun um málið í breska blaðinu. Enn bólar ekkert á því að íslenskir blaðamenn og hagsmunaaðilar fari yfir málið. Eina svarið sem menn sjá við skorti á gjaldeyri er að taka lán, byggja álver eða reisa olíuhreinsistöð! Á sama tíma hafa menn ekki kjark til að skoða hvort ekki sé skynsamlegt að veiða meira.

Fundur í kvöld kl. 20 í Grindavík

Ég útbjó nokkrar glærur seinni partinn í dag, fór í gegnum gömul og ný gögn og er sannfærðari en nokkru sinni um að það er ekki nokkur vitglóra í núverandi stjórn fiskveiða. Fréttir af miðunum herma að vel fiskist og það er ekkert vit í öðru en að auka verulega við veiðarnar.

Þessar hugsanir flugu í gegnum hugann meðan fréttatími kvöldsins var í bakgrunninum og helsta fréttaefnið var frjálst fall krónunnar.

Það er ábyrgðarlaust að ýta heilbrigðri gagnrýni burtu - hver svo sem skoðun manna á kvótamálunum er, hvort sem menn eru harðsoðnir fylgismenn eður ei - og gefa sér ekki örlítinn tíma til að fara yfir málefnaleg og vönduð rök þeirra sem eru sannfærðir um að skynsamlegast sé að veiða meira.

Tækifæri gefst á Brimi í Grindavík í kvöld.

Hvers vegna er ráðgjöf Hafró vitlaus?

Á morgun, þriðjudaginn 24. júní, kl. 20 munu ég og Jón Kristjánsson fiskifræðingur auk þingmannanna Guðjóns Arnars Kristjánssonar og Grétars Mars Jónssonar fjalla gagnrýnið um enn eina kolsvarta skýrslu Hafró. Fundurinn verður á Veitingahúsinu Brim, Hafnargötu 9 í Grindavík.

Nýjar sjávarútvegsrannsóknir Hafró gefa eindregið til kynna að forsendurnar sem Hafró notar við útreikninga séu rangar.

- 0 -

Allir velkomnir, sérstaklega þeir sem sjá einhverja glóru í aðferðafræði Hafró.

Árásir Samfylkingarinnar bíta á Sjálfstæðisflokkinn

Af meðfylgjandi könnun má ráða að stöðugar árásir samfylkingarmanna á samstarfsflokkinn í ríkisstjórn virðast hafa áhrif. Það sem minnt hefur verið á er að forsætisráðherra ber mest áhrif allra stjórnmálamanna á óviðunandi ástandi í efnahagsmálum, hárri verðbógu og björgunarleiðangri fyrir bankana. Þetta hefur gengið svo langt að þegar ég hef minnt réttilega á að Samfylkingin taki óhikað þátt í áframhaldandi mannréttindabrotum á sjómönnum hefur litlu samfylkingarköllunum og -kellingunum fundist það óviðurkvæmilegt og heimtað að ég einbeitti mér að Sjálfstæðisflokknum.

Þegar Sjálfstæðisflokkurinn á svona vini þarf hann ekki á óvinum að halda. 

Fylgi Sjálfstæðisflokksins minnkar í könnun

Meira eftirlit með sjómönnum en kynferðisglæpamönnum

Sitt hefur hverjum sýnst um hvort réttlætanlegt sé að fylgjast með barnaníðingum eftir að þeir hafa tekið út sinn „réttláta dóm“. Svo hafa margir lagt málefnaleg rök á báða bóga í þá umræðu. Minna fer fyrir umræðu um réttmæti síaukins eftirlits með sjómönnum. Störfum þeirra er svo vantreyst af stjórnvöldum að margfalt hærri upphæðir fara í eftirlit með þeim en í fíkniefnalöggæslu. Sama á við um þær fjárhæðir sem varið er í eftirlit með brotum á samkeppnislöggjöf og efnahagsbrotum.

Þetta er ekki séríslenskt vandamál eins og danska fréttin ber með sér, og í Ástralíu er jafnvel enn strangara eftirlit með tiltölulega smáum fiskibátum. Þar svarar kostnaðurinn á bát til 8 milljóna króna á ári.

Hér á Íslandi hefur kostnaðurinn nálægt því tvöfaldast á síðustu 10 árum, á sama tíma og þorskveiðar hafa dregist saman um nær helming. Ég er sannfærður um að vandinn sem er verið að leysa með auknu eftirliti felst ekki í því að sjómenn séu hneigðari til glæpa en annað fólk, heldur miklu frekar í því að stjórnvöld búa þeim óréttlát starfsskilyrði með innbyggðan hvata til að fara ekki eftir ósveigjanlegum reglum. Sömuleiðis hafa þau reiknislíkön sem hafa verið grundvöllur þess sem sjómönnum er skammtað upp úr hafinu ekki neitt forspárgildi. Menn hafa þá leitað að sökudólgum og skýringum og oftar en ekki er sökin fundin í of mikilli veiði eða þá framhjálöndun en aldrei er ljáð máls á því að skoða með gagnrýnum hætti reiknislíkönin sem hvergi hafa gengið eftir í heiminum.

Ég ætlaði að fjalla um framangreindar staðreyndir á fundi á þriðjudagskvöldið í Grindavík en því miður verður það að bíða um sinn vegna mistaka við boðun fundarins.

Brottkastsmyndavélar um borð

Rak Egill Geir og Ingibjörgu fram úr?

Það hefur vart farið framhjá neinum landsmanni að Geir og Ingibjörgu Sólrúnu hefur liðið einkar vel í stjórnarsamstarfinu. Það hófst með miklum innilegheitum og síðan hafa mánuðirnir liðið hver af öðrum í sælu þeirra beggja og þau flögrað um heiminn í einkaþotum á milli þess sem þau hafa hist á stuttum fundum og slegið upp veislum fyrir tigna gesti, s.s. vinkonu Ingibjargar, hana Condoleezu Rice, og Abbas Palestínuforingja sem er örugglega líka vinur Geirs.

Síðan hafa þau sett á fót eina og eina ríkisstofnun. Ekkert hefur raskað ró þeirra nema þá helst flaut nokkurra trukkabílstjóra þó að efnahagslífið hafi tekið gríðarlega mikla dýfu. Húsnæðismarkaðurinn á leiðinni í alkul og gengi krónunnar hrapar. Bankarnir sem ekki mátti anda á berjast í bökkum. Þetta, eins og áður segir, truflar á engan hátt sæluna og þau eru áfram ráðin í að gera ekki neitt og eru síðan algjörlega einhuga um að halda áfram að brjóta mannréttindi á sjómönnum.

Það eina sem gerðist við þessi tíðindi var að Geir sussaði á kurteislegar gagnrýnisraddir fjölmiðla þegar honum fannst þær vera að verða of háværar og sagði þær dónalegar - með því að lofa einhverjum aðgerðum sem aldrei komu og saka síðan fjölmiðla um að leggja góðvinkonu sína, Ingibjörgu, í einelti þegar spurningarnar urðu of nærgöngular. 

Það var ekki fyrr en þrennt gerðist, bankarnir vöktu upp óþægilegar spurningar, þær sömu og Sindri spurði (hvar peningarnir væru), gengi krónunnar féll og það sem eflaust mestu máli skipti, að Egill Helgason, gagnrýni ríkisfréttamaðurinn, spurði hvort ekkert ætti að gera. Þegar allt lagðist á eitt kynnti ríkisstjórnin einhverjar aðgerðir á fasteignamarkaði. Það verður að segjast eins og er að þetta er fremur óljóst plagg og ef gangurinn á að vera svipaður með að koma þessum tillögum á koppinn og verið hefur með boðaðar aðgerðir megum vð búast við að bíða drjúga stund. Í plagginu eru engar dagsetningar og ekki heldur fjárupphæðir þannig að það lítur út fyrir að það hafi verið dregið upp til að svara dægurgagnrýni.

Ísbirnir bitbein í fylkingadrætti

Ráðherrar Samfylkingarinnar reyndu að gera sér mat og jafnvel fjölmiðlaveislu úr ólánsama ísbirnunum sem endaði lífdaga sína hér í Skagafirði af völdum byssukúlna stjórnvalda í gær, á þjóðhátíðardaginn. Fyrst var það Björgvin ráðherra sem tilkynnti þjóðinni ábúðarfullur að hann ætlaði að gera allt sem í hans valdi stæði til að bjarga skepnunni og var m.a.s. búinn að redda sponsor.

Þegar Þórunn sá að Björgvin væri að slá sér upp á ísbirninum var hún fljót að breyta ferðaplönum sínum og mæta á svæðið. Þetta var allt mikið drama og fjölmiðlafár og er jafnvel uppi orðrómur hér í Skagafirði um að fárið hafi valdið því að ekki tókst betur til með björgunina en raun bar vitni.

Í eftirleik atburðanna blandast síðan þriðji ráðherra Samfylkingarinnar, Össur Skarphéðinsson, sem segist vita nánast allt um ísbirni og hafa ætlað sér að skrifa bók um skepnuna en hafi ekki komið í verk vegna anna. Það er athyglisvert að iðnaðarráðherra gerði sér far um að hæla sérstaklega þætti Björgvins hins sunnlenska og vega síðan að æðsta embættismanni Þórunnar Sveinbjarnardóttur sem var fulltrúi hennar á staðnum.

Það geta verið ýmsar ástæður fyrir því hvers vegna Össur gerir sér far um að gagnrýna störf Þórunnar, en hann hafði áður látið í ljós að hann teldi að betur hefði mátt standa að málum þegar fyrri björninn var drepinn. Þórunn er gömul kvennalistakona en Björgvin gamall vopnabróðir úr Alþýðuflokknum. Svo má auðvitað vera að þeir standi saman, iðnaðarráðherra og maðurinn sem tók skóflustungu að nýju álveri, að því að veikja stöðu umhverfisráðherra sem mest þeir mega til þess að hún geti ekki sett fótinn fyrir stóriðjustefnu þeirra félaganna.

Ísbjarna leitað úr lofti