Leiðari nafna míns Egilssonar í DV 19. apríl 2007

Sigurjón M. Egilsson skrifar markverðan leiðara í helgarblað sitt, DV, sem kom út í fyrradag, Kvóti eða gjaldmiðill. Hann talar um það sem Frjálslyndi flokkurinn hefur hamrað á frá upphafi sínu, að kvótakerfið sé gagnslaust og vinni ekki það gagn sem því var ætlað, nefnilega að byggja upp fiskistofnana og renna stoðum undir byggðirnar í landinu. Fáir útvaldir fengu mikið á silfurfati, og dugnaður og atorkusemi skilar mönnum engu. Einkavinátta spilltra manna gerir það hins vegar.

Sigurjón segir:

Verð á þorskkvóta er komið svo fjarri raunveruleikanum að varla tekur tali. Við blasir að sá kvóti sem er keyptur skilar ekki arði fyrr en eftir um tuttugu ár.

 

Þegar svo er komið að verð á kvóta er svo hátt að ekki er ein einasta leið til að útgerðin standi undir því blasir við sá raunveruleiki að kvótakerfið er ekki lengur fiskveiðistjórnunarkerfi ...

Hafi Sigurjón þökk fyrir að benda á hið augljósa sem mörgum hefur þó skotist yfir, bæði stjórnmálamönnum og fjölmiðlamönnum. Eða kannski bara sýnt áhugaleysi. Fiskur og slor er víst ekki sexí í augum fjölmiðlamanna. Þetta sinnuleysi þeirra sýnir veruleikafirringu þar sem meira en helmingur af verðmæti vöruútflutnings landsmanna kemur úr þessari atvinnugrein. Það er hægt að slá æ hærri lán fyrir útgerðina eftir því sem kvótaverð hækkar, en hækkunin á kvótaverði stendur ekki í nokkru samhengi við hækkað afurðaverð. Það hefur ekki hækkað.

Hins vegar yfirsést ritstjóranum - eða hann gerir sig sekan um áhugaleysi - að Frjálslyndi flokkurinn hefur ótrauður haldið uppi merki byggðanna. Sigurjón M. Egilsson segir nefnilega líka:

Hitt er annað og verra að ekki er að heyra að frambjóðendur til Alþingis átti sig á fáránleikanum.

Er Sigurjón strútur þegar kemur að Frjálslynda flokknum? Stakk hann höfðinu í sandinn í leit sinni að breyttri afstöðu Einars K. Guðfinnssonar? Sigurjón gæti verið öflugur liðsmaður réttlætis ef hann legðist á sveif með okkur. Við tökum öllum liðsauka fagnandi því að málstaður okkar er góður.

Það sem ekki var sagt

Þögn S og D

Það sem var markvert við ræður formanna Sjálfstæðisflokks og Samfylkingar var ekki það sem var sagt heldur það sem var ósagt. Hvers konar stjórnmálaleiðtogar eru það sem hlaupa yfir helsta ágreinings- og óréttlætismál síðari tíma, þ.e. kvótakerfið í sjávarútvegi? Eru það miklir stjórnmálaleiðtogar?

Í ræðu „jafnaðarmannaleiðtogans" Ingibjargar Sólrúnar Gísladóttur kom nákvæmlega ekkert fram um mesta óréttlætismál Íslandssögunnar, kvótakerfið sem hefur farið ránshendi um sjávarbyggðirnar. Ekkert einasta orð. Og fiskveiðar eru, vel að merkja, aðalútflutningsgrein landsmanna, meira en helmingur af vöruútflutningi kemur úr þessari atvinnugrein. Það er alls ekki trúverðugt hjá jafnaðarmanni að hlaupa yfir þetta óréttlæti.

Það er greinilegt að Ingibjörg Sólrún Gísladóttir hefur ekki borið sitt barr síðan hún lagði leið sína inn á fund LÍÚ haustið 2005 til að friðmælast við þau samtök sem vilja með kjafti og klóm vernda glórulaust kerfi í sjávarútvegi.

Geir Haarde hefur líklegast stokað út sinn öfugmælakafla um ábyrga stefnu í nýtingu fiskveiðiauðlindarinnar en hann hefur verið drjúgur við að fara með öfugmæli um einhvern árangur kerfis sem hefur þrefaldað skuldir sjávarútvegsins á áratug á meðan tekjur hafa staðið í stað.

Það sem hefur að öllum líkindum orðið til þess að hann stökk yfir þennan öfugmælakafla er að nýjar niðurstöður Hafró sýna að svokölluð uppbygging á þorskstofninum hefur algerlega brugðist. Nýjar niðurstöður úr vorralli Hafró gefa til kynna að íslenska þjóðarbúið verði af tugmilljarðatekjum vegna minnkandi þorsk- og ýsuveiði ef farið verður að ráðum Hafró eins og Sjálfstæðisflokkur hefur gert gagnrýnislaust um áratugaskeið.

Það er auðséð að hvorki Samfylking né Sjálfstæðisflokkur treysta sér til að taka á málum og ætla að eftirláta öðrum að taka af skarið. Frjálslyndi flokkurinn kveinkar sér ekki undan ábyrgð frekar en óvinsælum ákvörðunum ef þær eru réttar og mun glaður taka til hendi í þessum málaflokki.Við erum þegar byrjuð að bretta upp ermarnar og hlökkum til að láta verkin tala ef við fáum til þess umboð. Vindum ofan af kvótakerfinu og færum byggðunum aftur atvinnuréttinn.

Gríðarleg ánægja með fyrirlestur Jóns Kristjánssonar fiskifræðings á Húsavík

Ummæli  Odds Örvars Húsvíkings sem sat fund Frjálslynda flokksins á Húsavík:  

Ég fór á þennan fund til þess að hlusta á Jón Kristjánsson fiskifræðing og hvað hann hefði fram að færa.

Niðurstaðan er þessi: Ég var gáttaður á þeim fróðleik og vísindum sem hann hafði fram að færa. Ég er gáttaður á að alþingismenn, fréttamenn, og aðrir sem vilja auka skilning sinn á umhvefinu skuli ekki leggja við hlustir og auka þekkingu sína með því að hlusta á önnur sjónarmið en þau sem eru mötuð ofan í okkur af Hafrannsóknastofnun. Bara gáttaður. Ég fer á ýmsa fundi og þetta er sá albesti fundur sem ég hef orðið vitni að.

Einu sinni í fyrndinni sögðu menn að jörðin væri flöt. Og það rengdi það enginn því menn vissu ekki betur en að hún væri flöt, þannig var það í þúsundir ára. Einn góðan veðurdag kom maður fram á sjónarsviðið sem hélt því fram að hún væri hnöttótt. Þennan mann átti að brenna á báli því þetta sem hann hélt fram voru þvílíkir svartagaldrar að mannkyninu stóð hætta af. En jörðin reyndist hnöttótt eftir allt. Það voru nefnilega til tvær hliðar á því máli.

Er jörðin í lit eða er hún í svart hvítu? Litblindir sjá hana í svart hvítu eins og hundurinn minn og vita því ekki betur. En við hin vitum að hún er í lit sem við sjáum. Það eru nefnilega til tvær hliðar á þessu líka.

Eins er það með vísindin í sjávarútveginum. Það eru til tvær hliðar á flestum málum ef grannt er skoðað. Jón Kristjánsson sem hélt þennan prýðisgóða fyrilestur í gærkvöldi á fundi hjá Frjálslynda flokknum á Gamla Bauk opnaði augu mín og við það öðlaðist ég skilning um að það er til önnur hlið á sjávarútveginum hér á Íslandi en sú sem Hafró og Líú gefa út og er studd dyggilega af ríkisstjórninni.

Í hnotskurn: Frábær fyrirlestur, hef ekki séð betri.

Kveðja Oddur Örvar.

Bjartari framtíð fyrir Húsavík.

Spurningar frá Þingeyingi og svör við þeim

Hér eru spurningar sem bornar voru upp á því merka vefriti Skarpi sem er þingeyskur fréttamiðill:

Vil byrja á því að þakka Sigurjóni Þórðarsyni fyrir hans framlag hérna á umræðuhorninu, það mættu fleiri frambjóðendur taka þann frjálslynda sér til fyrirmyndar hvað það varðar.

Hinsvegar langar mig til þess að spyrja hann að nokkrum spurningum, af því að hann hefur nú gefið færi á sér.

1. Ert þú 100% hlynntur stóriðju við bakka á húsavík ? Svör ýmissa flokka/aðila hafa verið, svo ekki sé fastara að orði kveðið, loðin mjög oft varðandi þetta stóra mál.

2. Ert þú algerlega sammála þeim félögum þínum Magnúsi Þór og Jóni Magnússyni sem hvað "harðast" hafa talað fyrir innflytjendastefnu ykkar frjálslyndra ? Telur þú þ.a.l. að vandamál ríki hérna á klakanum vegna allra þeirra innflytjenda sem flust hafa búferlum hingað til lands undanfarin misseri ?

3. Telur þú ekki einsýnt að Margrét Sverris og Ómar taki af ykkur fylgi við kosningarnar 12.maí og jafnvel "skemmi" þá töluvert fyrir ykkur ? Hvaða pólitísku skoðun hefur þú á Margréti Sverrisdóttir ?

4. Heldur þú að hvalveiðar séu virkilega gáfulegar m.t.t. allra þeirra ríkja sem hafa jafnvel fordæmt okkur íslendinga fyrir veiðarnar ? Veistu hvort búið sé að selja eitthvað af þessu hvalkjöti sem veiddist nú fyrr í vetur ? Ef ekki, telur þú að það verði vandamál að selja kjötið þá þegar þar að kemur ?

Ítreka þakkir mínar til Sigurjóns fyrir að gefa kjósendum færi á að ræða málin hérna við hann.

Svör við spurningum Bush:

1) Já.

2) Já, ég er sammála skynsamlegri stefnu Frjálslynda flokksins og er þeirrar skoðunar að margt af því sem við höfum látið frá okkur fara hafi verið afflutt af pólitískum andstæðingum og kaffihúsaliði sem vantar oft á tíðum sárlega jarðtengingu. Ég á þá við fólk eins og Eirík Bergmann, Egil Helgason, Björgu Evu Erlendsdóttur „fréttamann“ og Illuga Jökulsson skáld.
Ég hef sjálfur orðið fyrir því að mér hafa verið lögð orð í munn sem ég hafði aldrei sagt á opinberum fundi. Þetta fólk virðist ekki gera sér grein fyrir ábyrgð sinni, þ.e. við að sverta umræðuna og okkur sem höfum tekið hana upp á hinum pólitíska vettvangi, Guðjón A., Jón Magg o.fl. þá er verið kristalla umræðuna í neikvæðum farvegi og sömuleiðis að þagga niður bráðnausynlega umræðu um brýn þjóðfélagsmál.

Pólitískir andstæðingar hafa freistast til að taka þátt í þessum leik, s.s. Steingrímur J. og Svanfríður Jónasdóttir.

Það sjá flestir í gegnum þennan ómerkilega andróður gegn Frjálslynda flokknum. Hann verður fáránlegur í fjölskyldum sem minni og Guðjóns Arnars sem eru herssilega blandaðar með pólsku blóði.

Já, það eru í gangi félagsleg undirboð hvað varðar launaþróun iðnaðar- og verkafólks. Einnig má nefna sjómanna á minni bátum þar sem engir kjarasamningar gilda. Kristinn H. Gunnarsson hefur gert grein fyrir því að erlent starfsfólk sé á lægri launum en íslenskt.
Ég er einnig þeirrar skoðunar að það séu að myndast menningarkimar sem blandast lítt íslensku samfélagi.
Ég vil einnig vara við því viðhorfi sem æ oftar skín í gegn að einhver vinna sé nú þannig að hún verði ekki mönnuð með Íslendingum. Það felst í þessu neikvætt viðhorf til vinnunnar og einnig kemur á stundum fram að útlendingar eigi að verða nokkurs konar 2. flokks þegnar sem eiga að vinna erfið og illa borguð störf.

3) Varðandi Margréti Sverrisdóttur þá veigra ég mér við að gagnrýna hana þar sem við vorum nánir samstarfsmenn og félagar um árabil.
Ég er þeirrar skoðunar að hún sé flækt í algjöra vitleysu með Ómari Ragnarssyni.
Ég fæ heldur ekki nokkurn botn í yfirlýsingar Margrétar Sverrisdóttur í viðtali á dögunum, þar sem hún fullyrti að hún hefði verið búin að ákveða að segja sig úr Frjálslynda flokknum þó svo að hún hefði unnið kosningu um varaformannsembættið. Þetta sagðist hún hafa ákveðið eftir að hafa horft yfir salinn þar sem flokksbundið fólk í Frjálslynda flokknum sat.
Það er ómögulegt að sjá fyrir hvort eða hvaðan Ómar og kó taka fylgi. Ég er þeirrar skoðunar að það verði lítið sem Ómar tekur frá Frjálslynda flokknum. Frjálslyndi flokkurinn rær á allt önnur mið en Ómar Ragnarsson. Flokkur Ómars er kvótaflokkur. Frjálslyndi flokkurinn sér mikinn ávinning fyrir þá sem starfa í sjávarútvegi að komast sem fyrst út úr þessu vonlausa kvótakerfi og stórauka frelsi í atvinnugreininni. Kerfi „uppbyggingar“ hefur leitt af sér minni og minni afla. Á þessu eru ákveðnar líffræðilegar skýringar sem ég og Jón Kristjánsson fórum yfir á fundi á Gamla Bauk þann 18. apríl sl. Þessar breytingar Frjálslynda flokksins munu koma sérstaklega vel byggðum á norðausturhorni landsins.

4) Ég er fylgjandi hvalveiðum. Ég tel einfaldlega að það sé eðlilegt og sjálfsagt að nýta þessa dýrastofna sem og aðra.
Það skín í gegn mikil hræsni hjá þeim ríkjum sem hafa gengið hvað lengst í að deila á Íslendinga, s.s. Bretum sem eru þessa dagana í stríðsrekstri í Írak, að vísu með stuðningi Valgerðar Sverrisdóttur og Geirs Haarde og losa í ofanálag geislavirkan úrgang í hafið.

Það á auðvitað að skipuleggja veiðar með þeim hætti að þær hafi sem minnst áhrif á ferðaþjónustu. Það er ljóst að ef það næst ekki að selja hvalkjötið er veiðum sjálfhætt.

Samfylkingin og stjórnmálaklúbburinn - meðvirkt ástand

Íslenski stjórnmálaklúbburinn er áhugavert fyrirbæri, ekki einungis fyrir stjórnmálafræðinga heldur ekki síður atferlis- og félagsfræðinga.

Það er ákveðin hætta fyrir stjórnmalamenn að verða meðvirkir í algerlega ólíðandi ástandi þar sem þeir starfa á sama vettvangi og í návígi við þá sem þeir eiga að veita pólitískt aðhald.

Ég fann það á ýmsum úr liði stjórnarandstöðunnar að þeim fannst ótilhlýðilegt að við í Frjálslynda flokknum skyldum gagnrýna það opinberlega að Sólveig Pétursdóttir skyldi setjast í stól forseta Alþingis á sama tíma og ekki væri búið að rannsaka þátt hennar sérstaklega í olíusamráðssvikamálinu sem eiginmaður hennar Kristinn Björnsson var flæktur í.

Sólveig var ráðherra dómsmála og bar pólitíska ábyrgð á Landhelgisgæslunni og lögreglunni sem eiginmaðurinn svindlaði á. Í nágrannaríkjum væru þessi mál rædd opinskátt og Sjálfstæðisflokkurinn þyrfti að gera rækilega grein fyrir málinu.

Það er ekki gert hér heldur létu bæði Samfylkingin og VG það eiga sig að taka upp þessi mál, og ráðandi öfl og stjórnmálaklúbburinn reyndu hvað þau gátu til að þagga þessa umræðu niður.

Samtrygging stjórnmálaklúbbsins er með ólíkindum. Sjálfstæðisflokkurinn skipaði sendiherra í kippum og til þess að þagga niður gagnrýni á hinum pólitíska vettvangi er skipaður einn og einn sendiherra úr vinstri flokkunum, s.s. Guðmundur Árni Stefánsson og Svavar Gestsson. 

Nú er stelpan frá Stokkseyri Margrét Frímannsdóttir þingmaður Samfylkingarinnar á ferðalagi á kostnað skattborgaranna með þingmönnum sem eru að láta af þingmennsku og með í för er Kristinn Björnsson sem tók þátt í að svindla á almenningi.

Óforskömmuglegheitin eru svo gegndarlaus að það er haldið áfram að storka fólkinu í landinu með svona ferðalögum og Samfylkingin veitir þessu heilbrigðisvottorð.

Fundur á Gamla Bauk - fræðsla um fiskveiðistjórn víða um heim

Í kvöld þann 18. apríl kl. 20:30 verður haldinn fundur á Gamla Bauk á Húsavík um stefnu Frjálslynda flokksins í stjórn fiskveiða og mikinn árangur Færeyinga við að stýra fiskveiðum. Við Jón Kristjánsson fiskifræðingur verðum frummælendur. 

Í gær var vorum við með erindi á Hótel KEA á Akureyri og tókst sá fundur mjög vel og þeir sem hann sátu fengu sýn á fyrirhugaðar breytingar Frjálslynda flokksins í fiskveiðistjórn. Jón Kristjánsson er einkar fær vísindamaður sem opnar augu fólks fyrir annarri sýn á stjórn veiða en hefur verið reynd hér við land og sem einkennist af árangursleysi.

Jón Kristjánsson fiskifræðingur hefur verið helsti ráðgjafi færeyskra stjórnvalda og er hann nýkominn úr ferð til Færeyja þar sem hann var m.a. gestur á fundi Fólkaflokksins. Ávarpi hans á fundi Fólkaflokksins var sérlega vel tekið og hér eru viðtöl sem tekin voru við Jón í Færeyjum í síðustu viku - um gagnsleysi þess að geyma fisk í hafinu  og um þorskainnrásina á Íslandsmið. Í Færeyjum hafa „sérfræðingar“ sem hafa lagt til grundvallar stærðfræðilega fiskifræði lagt árlega til 25-50% niðurskurð á aflaheimildum um áratuga skeið en stjórnvöld hafa nánast ekkert farið eftir þeim ráðum frá árinu 2000. Á þeim tíma hafa fiskistofnar í Færeyjum risið og hnigið í samræmi við það sem Jón Kristjánsson hefur spáð fyrir um.

Uppbyggingarstarf sem fram hefur átt að fara hér á Íslandsmiðum hefur þrátt fyrir tveggja áratuga tilraunastarf orðið byggðum landsins dýrt.

Það er löngu tímabært að við Íslendingar skoðum með opnum hug árangur Færeyinga.

Myndir að norðan og austan

Sigurjón og Ólafía starfsm. Frjálslyndra á Egilsstöðum

Jepplingurinn fastur á Vaðlaheiðinni

 

 

 

 

 

 

 

 

Judd og Carlos ánægðir með Frjálslynda

Vilja landsmenn borga 130 milljónir í styrk árlega með einu fyrirtæki?

Frjálslyndi flokkurinn hefur alltaf verið fylgjandi því að það sé sett eitthvert þak á hvað hvert og eitt bú fengi í styrk frá ríkinu og ef að viðkomandi bóndi vildi framleiða meira vegna hagkvæmni  þá væri honum það frjálst en ríkið væri ekki að greiða aukalega með framleiðslunni. 

Frjálslyndi flokkurinn hefur bent á að stór hætta sé á að ef ekki sé sett þak á styrki til hvert bú þá geti kerfið þróast í algjöran óskapnað.  Auðvitað mætti vera sveigjanleiki ef fleiri en ein fjölskylda standa að búrekstrinum. 

Nú virðist það einmitt hafa gerst sem varað var við þar sem búið er að boða að reisa bú sem á að framleiða þrjá milljón lítra árlega á jörðinni Flatey á Mýrum í Austur-Skaftafellssýslu.

Ef að þetta bú mun starfa innan styrkjakerfis landbúnaðarins þá mun það þýða að ríkið mun styrkja þetta fyrirtæki árlega um 130 milljónir árlega.

Ég er sannfærður um að það verður ekki sátt um að eitt fyrirtæki fái svo gríðarlega háa styrki þar sem að öðrum þræði hafa margir litið með velvilja til styrkjakerfis landbúnaðarins vegna byggðasjónarmiða.

Það er orðið löngu tímabært að Guðni Ágústsson fari að snúa sér að öðrum verkum en að stýra landbúnaðarráðuneytinu en honum er margt til lista lagt s.s. að skemmta.

Misskilningur ,,þessa" fólks

Í 10-fréttum var sagt frá fólki sem taldi að það væri verið að tala niður til þess þegar innflytjendur væru nefndir „þetta“ fólk. Það er örugglega í langflestum tilfellum ekki meiningin hjá þeim sem nota „þetta“ orðalag. Ég á það t.d. til að nota „þetta“ orðalag um „þetta“ fólk í staðinn fyrir „þessa“ innflytjendur en þegar maður segir „þessa“ innflytjendur á það e.t.v. frekar við um einhverja tiltekna einstaklinga innan „þessa“ ágæta hóps sem er að flytja til landsins. Vonandi getum við rætt um innflytjendur án þess að vera alltaf á varðbergi gagnvart því að vera að tala niður til einhverra með alvanalegu orðalagi.

Umræða eyðir fordómum.

Es. Ég horfði aftur á fréttatímann og sá þá og heyrði að Berglind Ásgeirsdóttir, sviðsstjóri í utanríkisráðuneytinu, endaði sitt innlegg í fréttatímanum á því að segja „þetta“ fólk - enda er orðalagið ekki nema eðlilegt.

Hvað verður næst N2 eða N5 ?

Þetta verður hið fróðlegasta mál.  Nafn og merki fyrirtækjanna eru sláandi lík en að vísu í mjög ólíkri starfsemi. Það er spurning hvernig N1 tæki því ef það kæmi fyrirtæki í næsta nágrenni við það sem héti N11 þó svo að það væri í allt annarri starfsemi en N1 t.d. útgerð eða brauðgerð.

N4 kannar réttarstöðu sína vegna nafns og firmamerkis N1