Jarðgangaáætlun samþykkt

Guðjón Arnar fékk samþykkta þingsályktunartillögu á síðasta degi þingsins um að koma vegakerfi landsins niður fyrir 200 m hæð. Hér er um framsýna tillögu að ræða og það er greinilegt að vindar eru að snúast til jarðgangagerðar vegna þess að í fyrstu þegar við lögðum fram tillögur af þessu tagi voru þær taldar dæmi um veruleikafirringu eða ávísun á óráðsíu.

Nú er andrúmsloftið annað og t.d. var kynnt í ríkissjónvarpinu í fyrrakvöld mjög áhugaverð borun með nýrri aðferð fyrir austan, á Egilsstöðum, Seyðisfirði og suður eftir fjörðunum.

Það er tilhlökkunarefni þegar þetta kemst í framkvæmd og atvinnusvæði Austfirðinga stækkar til muna.

Rót vanda Framtíðarlandsins

Ekki ætla ég að draga dul á það að mér rann í skap þegar tölvupósthólfið mitt tútnaði út af vel á annað hundrað tölvuskeytum Framtíðarlandsins á einum sólarhring. Ég furða mig á baráttuaðferðinni og því líka að stilla þingmönnum upp við vegg með það að vera með eða á móti einhverri yfirlýsingu sem mér finnst ekkert alltof vel orðuð.

Ég furða mig mest á því að þetta upplýsta fólk í Framtíðarlandinu skuli ekki velta fyrir sér hvers vegna fólkið á Húsavík og víðar kalli á álver sem er auðvitað vegna þess að kvótakerfið hefur kippt fótunum undan þessum bæjum. Fólk verður að fá eitthvað í staðinn. Og hvað er betra í boði þegar fiskveiðikvótinn hefur verið látinn í önnur byggðarlög?

Vandi Framtíðarlandsins er sjálfhverfni og taktleysi. Það er nefnilega hægt að vera með náttúrunni og samt þessari atvinnuuppbyggingu.

Akstursíþróttir ekki í náðinni hjá Sjálfstæðis- og Framsóknarflokki

Framsýn tillaga felld - liður í að bæta aðstöðu vélhjólamanna til frambúðar

Framsýn tillaga Guðjóns Arnars Kristjánssonar um að breyta umferðarlögum með þeim hætti skilgreina hvað akstursíþróttabraut væri fékk ekki náð fyrir augum stjórnarmeirihlutans í gærkvöldi. 

 

Skúli Steinn

Atkvæðagreiðslan á Alþingi verður nokkuð eftirminnileg þar sem formaður samgöngunefndar Guðmundur Hallvarðsson studdi tillgöuna þegar hún var í fyrstu borin upp til atkvæða og sömuleiðis nokkrir stjórnarliðar til viðbótar.  Þetta varð til þess að tillagan var samþykkt. 

Það varð því uppi fótur og fit í stjórnarliðinu við þessa niðurstöðu og í framhaldinu lét starfandi þingforseti Birgir Ármannsson endurtaka atkvæðagreiðsluna þar til var búið að fella tillöguna og berja sjálfan formann samgöngunefndar til hlýðni og fella málið.

Tillagan lætur ekki mikið yfir sér en gengur út á að búa til lagalegan grunn til þess að stjórnvöld geti tryggt uppbyggingu akstursbrautar fyrir vélknúin ökutæki.

Uppbygging kappakstursbrautar er mikilvægur liður í því að skapa aðstöðu fyrir hraðakstur ökuþóra og sömuleiðis örugga braut til æfingaaksturs.

Þingmenn Frjálslynda flokksins hafa átt nokkra fundi með vélhjólamönnum og þeir hafa kynnt að hið opinbera afli umtalsverðs fjár með skattlagningu vélhjóla og eldsneytis en mæta síðan litlum skilningi hjá stjórnvöldum, m.a. til uppbyggingar aðstöðu fyrir akstursíþróttafólk.   

 

Breytingartillaga

133. löggjafarþing 2006–2007.
Þskj. 1337  —  388. mál.

Breytingartillaga

við frv. til l. um breyt. á umferðarlögum, nr. 50/1987, með síðari breytingum.

Frá Guðjóni A. Kristjánssyni.

    Við 1. gr. bætist nýr liður, svohljóðandi:
    Á eftir liðnum Akrein í 2. gr. laganna kemur ný skilgreining, svohljóðandi:
    Akstursíþróttabraut:
    Sérstakt svæði sem ætlað er til æfinga, þjálfunar og kappaksturs vélknúinna ökutækja.

 

Sjávarútvegsráðherra vill opinbera umræðu um gagnrýni mína

Í nótt fóru fram umræður á Alþingi um byggðakvóta og fór ég þá yfir forsendur kvótakerfisins og rakti skilmerkilega að kerfið hvílir á mjög veikum líffræðilegum grunni.  

Ef ég þekki Einar Kristin rétt þá hættir hann við boðaða umræðu þar sem hvað rekst á annars horn í málflutningi hans. Umræðan er skráð í þingtíðindi og má lesa hana hér.

Einar Kristinn segir þorskstofninn stóran og vitnar í sjómenn en sendir síðan Hafró í hringferð að boða niðurskurð.

Ég myndi hins vegar fagna því sérstaklega ef Einar K. treysti sér til þess að ræða hvaða hagsmuni almennings er verið að verja með því að halda áfram með kerfi sem hefur ekki skilað neinu nema tjóni.

Einar Kristinn Guðfinnsson fer í felur með sín mál

Það er eftirtektarvert að Einar Kristinn Guðfinnsson reynir að láta umræðu um sjávarútvegsmál fara fram seint á kvöldin og jafnvel á nóttinni.  Ástæðan er einföld að mínu mati en hún er sú að hann er algerlega rökþrota í málflutningi sínum og vill sem minnst láta á því bera.

Hann getur ekki rökstutt hvers vegna á að halda áfram með kerfi sem hefur skilað helmingi minni afla en fyrir daga þess.

Hann getur ekki röksyutt hvar meint hagræðing sé í sjávarútvegi, þar sem skuldir hafa þrefaldast á síðustu 10 árum og tekjur staðið í stað eða dregist saman. 

Þetta eru mjög ólík vinnubrögð þeim sem Björn Bjarnason dómsmálaráðherra viðhefur.  Hann er óhræddur við að ræða sín mál í dagsbirtu og hefur rök fyrir þeim hvort sem það eru mál á sviði hlerana eða fangelsismála.  Það er óneitanlega meiri mannsbragur á Birni en Einari Kristni. 

Það verður fróðlegt að fylgjast með breytingum hjá RÚV

Það verður fróðlegt að fylgjast með breytingum hjá RÚV á næstu vikum.  Ég hef verið mjög undrandi á nýlegum vinnubrögðum og yfirlýsingu fréttastjóra RÚV Óðins Jónssonar eins og sést hér á skrifum á heimasíðu minni.

 

Páll Magnússon útvarpsstjóri og framkvæmdastjóri Ríkisútvarpsins ohf.

Ræðan sem aldrei var flutt á eldhúsdegi

Félagar mínir Magnús og Kristinn gengu á tímann svo að þessi ræða verður að bíða betri tíma.

Góðir landsmenn  

Frjálslyndi flokkurinn er hópur hugsjónafólks.

Frjálslyndi flokkurinn hefur sýnt það hann beitir sér af alefli gegn þröngum sérhagsmunaklíkum sem hafa verið að sópa til sín landsins gæðum, s.s. þegar forkólfar Framsóknarflokkurinn seldur sjálfum sér Búnaðarbankann. Þetta var gert með aðstoð og vilja núverandi forsætisráðherra Geirs Haarde. Núverandi stjórnarflokkar hafa setið að völdum of lengi.

Valdaþreyta Framsóknar- og Sjálfstæðisflokks birtist m.a. í  dekri við þrönga sérhagsmuni, ábyrgðarleysi og spillingu.  Hver man ekki eftir efnahagsaðgerðum Geirs Haarde sem fólust í því að fresta opinberum framkvæmdum í nokkrar vikur á þeim landsvæðum þar sem samdráttur ríkti, s.s. á Vestfjörðum og Norðurlandi.  Þessi stjórnarhættir hafa kristallast í fjölda mála, s.s. Byrgismálinu þar sem brotlegir ógæfumenn eru eltir á meðan ráðamenn sem vissu um óráðsíuna héldu gögnum leyndum fyrir þjóð - og þingið skipa nefndir. Vinir og vandamenn hafa verið skipaðir í kippum í æðstu stöður, s.s. í Hæstarétt og sendiráð í fjarlægum heimsálfum.

Þessir óráðsía og flottræfilsháttur fer fram á sama tíma og öldruðum er gert að búa í þvinguðu sambýli með ókunnugum og dæmi eru einnig um að hjónum sé stíað í sundur

Nú síðustu dagana hafa flokkarnir bitið höfuðið af skömminni með því að boða breytingar á stjórnarskránni.  Breytingar sem deilt er um hvað þýða í raun og veru. Yfirgnæfandi meirihluti þjóðarinnar er mjög ósáttur við þessa stjórnarhætti og það er mjög mikilvægt að meirihlutinn lýsi þeim vilja í kosningunum í maí.   

Gott gengi Frjálslynda flokksins er lykillinn að því að fella ríkisstjórn ósanngirni og sérgæsku.  

Frjálslyndi flokkurinn deilir ekki þeirri sýn með formanni Framsóknarflokksins að Ísland eigi að vera borgríki en það viðhorf er ráðandi í ríkisstjórn Íslands og birtist víða, m.a. í óbilgjörnum kröfum í eignarlönd bænda.

Ísland þarf á nýrri ríkisstjórn að halda, ríkisstjórn sem tekur til almannahagsmuna alls staðar á landinu. Við viljum og teljum skynsamlegt að byggja allt Ísland og til þess að svo megi verða  verður að aflétta þeim ósanngjörnu atvinnuhöftum sem atvinnuvegir landsbyggðarinnar eru fjötraðir í bæði til sjávar og sveita.  

Það er mikilvægt að stjórnvöld reisi strax við flagg uppbyggingar í stað undanhalds sog tór liður í því er að stórefla þær menntastofnanir sem eru utan höfuðborgarsvæðisins, s.s. Háskólann á Akureyri. Sömuleiðis á að taka fagnandi tillögum um uppbyggingu orkufreks iðnaðar sem nýtir vistvæna orku, s.s. við Húsavík.

Ekki má gleyma því að bættur hagur hinna dreifðu byggða eflir höfuðborgina en rannsóknir sýna að nálægt tvöfalt hærri upphæðar í sköttum er aflað á landsbyggðinni en er varið á landsbyggðinni. Með öðrum orðum, ef hagur dreifbýlisins vex geta borgarbúar vænst hærra framlags til reksturs sameiginlegra verkefna á höfuðborgarsvæðinu. Frjálslyndi flokkurinn er bjartsýnn á framtíð sjávarbyggðanna við strendur landsins þegar góð og farsæl sátt næst um árangursríkari fiskveiðistjórn. Kerfinu verður breytt fyrr eða síðar og það verður mun auðveldara því fyrr sem hafist verður handa. Ég tel mikilvægt að þeirri vinnu stýri formaður Frjálslynda flokksins, Guðjón Arnar Kristjánsson, sem er sanngjarn maður og hefur víðtæka þekkingu og reynslu á sviði sjávarútvegs. Sáttin þarf að vera ekki einungis við núverandi handhafa aflaheimildanna heldur ekki síður við fólkið í landinu og þær byggðir sem hafa nýtt sér gjöful fiskimið um aldir.    

Ísland þarf á styrkri stjórn flokks að halda sem hefur skýra framtíðarsýn og stefnu. Frjálslyndi flokkurinn hefur skýra stefnu í velferðar- og skattamálum sem fellur vel að hagsmunum venjulegra Íslendinga.   

Ráðstefna fyrir efnaða eldri borgara

Ég fékk senda kynningu og boð um að mæta á ráðstefnu um breyttar áherslur við þjónustu eldri borgara sem verður haldin eftir viku.  Á ráðstefnunni er margt góðra fyrirlesara, s.s. aðstoðarmaður Geirs Haarde forsætisráðherra. 

Það sem vakti athygli mína var þátttökugjaldið sem er um 10 þúsund krónur en ég er ekki viss um að það passi inn í heimilsbókahaldið hjá mörgum eldri borgaranum sem hefur mátt þola að ríkisstjórnin hafi fært skattbyrðina á lægri launin og tekjutengt lífeyrisgreiðslur þannig að algengt er að um 70% af greiðslum úr lífeyrissjóðum renni beina leið aftur til ríkisins.   

Fréttastjóri RÚV sakar þingmann um skæting

Óðinn Jónsson fréttastjóri RÚV fór mikinn á heimasíðunni minni www.sigurjon.is og sakaði undirritaðan bæði um skæting og vera að leita sér að málstað.  Ég vona svo sannarlega að fréttastjórinn sjái að sér og sýni hófstilltari viðbrögð við eðlilegri og málefnalegri gagnrýni á fréttaflutning útvarps allra landsmanna..

Vill RÚV ekki leiðrétta mjög vafasaman fréttaflutning - má ekki styggja stjórnvöld?

Síðasta haust varð uppi fótur og fit í fjölmiðlum þar sem fjallað var um spá um hrun allra fiskistofna heimsins 2048. Það átti að heita að spáin byggði á vísindum.

Ég benti fréttastofu RÚV og íslenskum fjölmiðlum á að þessar fréttir væru vægast sagt byggðar vafasömum grunni en ég fjallaði talsvert um þá staðreynd á heimsíðunni minni sl. haust. Það eru staðreyndir að þeir sem komu að gerð falsspárinnar hafa verið fengnir til starfa af íslenskum stjórnvöldum til þess að taka út íslenska kvótakerfið og vera sérstakir hátíðagestir íslenskra stjórnvalda.

 

-------------------------------------------------

Grein af heimasíðunni minni frá því í haust.  

Miðvikudagur 8. nóvember 2006

Þögn íslenskra fjölmiðla

Íslenskir fjölmiðlar hafa algerlega þagað yfir því að dómsdagsspá um eyðingu fiskistofna hafi í raun verið beita fyrir fjölmiðla og ekkert annað.

---

Í óðagoti við að koma fréttatilkynningu út um dómsdagsspána sem greindi frá eyðingu fiskistofna 2048 var óvart sent bréf til fjölmiðla sem sýndi samskipti höfundar skýrslunnar við samstarfsmenn sína. Samskiptin greindu frá því að helsta ástæðan fyrir framreikningunum til ársins 2048 væri sú að það yrði að búa til beitu fyrir fjölmiðla. Það er óhætt að fullyrða að helstu fjölmiðlar heimsins hafi kokgleypt beituna en tilgangurinn var sá að vekja áhuga þar sem fullyrt var að lítill áhugi væri á innihaldi skýrslunnar nema fyrirsjáanleg væru einhver endalok á næstu áratugum.

Mér finnst sérstaklega áhugavert að Morgunblaðið sýni þessum tíðindum ekki meiri áhuga en raun ber vitni þar blaðið gerði þessa spá að forsíðufrétt sinni á dögunum. Hið sama má segja um Ríkisútvarpið sem gerði þessari skýrslu „góð“ skil.

Ég benti norska blaðinu Fiskaren á þessa frétt. Þar var brugðist strax við og ég á einnig von á að Fishing News taki málið upp.