Ögmundur beygir Steingrím

Steingrímur J. Sigfússon hefur lengi verið fylgismaður óréttláts kerfis í sjávarútvegi og skrifaði m.a. bók, Róið á ný mið, sem var óður til kvótakerfisins með strandveiðaívafi eins og ég hef áður getið um. Hann samþykkti á sínum tíma illræmt framsal veiðiheimilda sem valdið hefur ómældri byggðaröskun, en skýringin á því má vera að hann átti einhvern tímann lítinn hlut í útgerðarfyrirtæki fyrir norðan þar sem menn töldu að sala á óveiddum fiski í hafinu væri framfaraskref. Það snerist fljótlega upp í andhverfu sína, einmitt á norðausturhorni landsins, þannig að Steingrímur greiddi byggðunum í Norður-Þingeyjarsýslu hvað þyngstu höggin sem þær hafa orðið fyrir með atkvæði sínu og málflutningi á Alþingi. 

Fyrir 10 árum nýtti hann ekki tækifærið sem Valdimarsdómurinn gaf til að vinda ofan af kvótakerfinu heldur gerðist sekur um að halda uppi ruglanda í málinu. Stjórnvöld sneru út úr dómnum með þeim afleiðingum að sjómenn sem brotið var á leituðu réttlætis hjá mannréttindanefnd Sameinuðu þjóðanna eftir að hafa þvælst allan þann tíma um „réttarkerfið“ hér og mannréttindanefndin úrskurðaði kerfið óréttlátt fyrir ári.

Lesendur síðunnar hafa eflaust tekið eftir því að vinstri grænir undir forystu Steingríms J. Sigfússonar hafa ekki beitt sér gegn mannréttindabrotunum. Málflutningur Atla Gíslasonar og Steingríms J. Sigfússonar verður oft þvælinn þegar talið berst að sjávarútvegsmálum, s.s. þegar rætt er um réttlæti og jafnræði, og þeir reyna að beina talinu að vistvænum veiðum og fara í alls kyns útúrdúra um atvinnuskapandi verkefni fyrir konur þegar grundvöllur kerfisins er til umræðu.

Það hefur helst verið von í Ögmundi Jónassyni og nú er að vona að hann nái að sveigja gamla Sám frá Gunnarsstöðum. Af Vikulokunum í morgun mátti manni skiljast að Ögmundur væri kominn langleiðina með að venja hann.

Athugasemdir

[Númi (IP-tala skráð) 20.12.2008 kl. 21:44]

Hef mikið álit á Ögmundi.

[Gunnar Skúli Ármannsson, 20.12.2008 kl. 23:58]

Sæll Sigurjón,

ég tók líka eftir þessu hjá Steingrími í morgun. Hann var mjög afdráttarlaus í skoðun sinni. Það vakti athygli mína. Hvort þetta er söluvara hjá Steingrími er ekki gott að segja. Aftur á móti finnur hann eins og fleiri að núna er öll þjóðin farin að tala um kvóta og fisk. Þannig getur verið að hann sé að sveiflast eftir almenningsálitinu eins og hver annar vinhani. Vonandi er um varanlega breytingu að ræða hjá Steingrími. Þú verður að skilja seinaganginn í Steingrími, hann er nefnilega svo vistvænn-það gerjast hægt.

[Aðalsteinn Júlíusson, 21.12.2008 kl. 16:02]

Gott að vekja máls á þessu Sigurjón.  Við skulum vona að Gunnarsstaðabóndinn sé að vitkast.  Kerfið er fyrir löngu gengið sér til húðar og ef einhvern tímann er tækifæri til að breyta því, þá er það núna og ekki seinna en strax.  Ef við bíðum þá getur það orðið of seint.  Kvótaeign útgerðarmanna er að meirihluta í skuld tel ég og sumt að sliga þá, í erlendri myntkörfu.  Ég held að það væri ágætt að skoða hvernig eignarhaldið er í raun og veru á kvótanum.  Eru það ekki bankarnir sem eiga kvótann að mestu?  Ríkið þarf að leysa þetta til sín og koma á réttlátu kerfi, sem menn geta keypt sig inn í, allir sem vilja að ákveðnum skilyrðum uppfylltum.  Dagakerfi er ágæt leið og síðan sér veðurfarið um að takmarka sóknina, amk. hjá smábátum.  Það er nú lítið orðið eftir hér á Norðausturlandi nema smábátar þannig að það er nú staðreynd að gæftir stjórna þessu að mestu leyti.

Það kemur kannski að því að Frjálslyndir sem ötulastir eru í að vekja máls á þessu óréttlátasta kerfi sem til er í vestrænum heimi, fari að hafa erindi sem erfiði og að menn fari að hlusta á það sem þeir hafa fram að færa.

Við vonum það, amk við sem áhuga höfum á sjómennsku og viljum réttlátara kerfi.

Með jólakveðju,

Aðalsteinn Júlíusson, Húsavík.

[Georg Eiður Arnarson, 21.12.2008 kl. 18:05]

Sæll Sigurjón , set þessa grein inn á Heimaklett . kv .