Hvers vegna er sýkta síldin ekki veidd?

Í nokkur ár hefur það verið ráðlagt að takmarka mjög veiðar á síld á þeim forsendum að stór hluti stofnsins sé sýktur af sníkjudýri sem dragi hana til dauða. Sýkta síldin er jafn gott og verðmætt hráefni til bræðslu og heilbrigð. Hvers vegna í ósköpunum er síldin þá ekki veidd fyrst að hún er hvort er eð að drepast?

Ég get ekki séð nokkra einustu ástæðu til þess að vernda sérstaklega dauðvona fiska - hvers konar rugl er látið viðgangast?

Ástæðan er eflaust sú að það hefur ekki verið starfandi sjávarútvegsráðherra á Íslandi frá því að Matti Bjarna var í brúnni.

Í fréttum af rannsóknum Hafró kemur ekki fram hve stofninn mældist stór sem var þó upphaflegt markmið leiðangursins.  Það verður fróðlegt að fylgjast með niðurstöðu á stofnstærðarmælingunni þar sem að þetta er þriðja árið sem að stór hluti stofnsins mælist dauðvona en samt hefur stofninn mælst 100 þúsund tonnum stærri á milli mælinga.

 

Sýking í síld lítið í rénun

Katrín Júlíusdóttir til viðræðna um stefnumörkun

Í orði hefur það verið stefna Samfylkingarinnar að tryggja eignarhald þjóðarinnar á orkuauðlindum en á borði hefur stefnan verið að selja útlendingum orkuna. Sú stefna kom upp á yfirborðið í framgöngu Össurar Skarphéðinssonar og Dags B. Eggertssonar í REI málinu og nú í sölunni á Hitaveitu Suðurnesja til Magma Energy.  Síðan REI málið kom upp árið 2007 hefur verið ljóst að það þyrfti að treysta varnir fyrir því að orkuauðlindir glutruðust ekki úr höndum landsmanna.  Í stað þess að reisa varnir þá hefur Samfylkingin ásamt Steingrím J. verið að útlista fyrir erlendum fjárfestum hvar götin væru í löggjöfinni.

Vert er að staldra örlitla stund við aðferðafræðina við söluna og skúffufyrirtækið sem að Samfylkingin hefur "góðkennt".  Er hægt að sjá það fyrir að Norðmenn hefðu selt olíuauðlindir sínar til skúffufyrirtækis í Svíþjóð? Ég er viss um að svo sé ekki og í framhaldinu er rétt að fara yfir hvort að ábyrgðir og tryggingar fyrir skuldbindinum sem varða kaupin séu eingöngu í skúffufyrirtækinu í Svíþóð sem líklega verður álíka mikið hald í ef til kastanna kemur og fræg eignarhaldsfélög á borð við Stím.

Það var sérkennilegt að hlýða á viðtal við Katrínu Júlíusdóttur iðnaðarráðherra á Rás 2 í dag, en hún skýrði furðuleg vinnubrögð ráðuneytisins með því að vísa á að unnið væri vélvirkt innan þess lagaramma sem væri í boði.  Ekki vottaði fyrir skýrri stefnumörkun hjá stjórnmálamanninum um hvert ætti að halda varðandi ráðstöfun orkuauðlinda þjóðarinnar en slegið var úr og í með óskýrum áherslum um að salan væri ekki henni alveg að skapi. Ráðherrann lagði engu að síður áherslu á að aðrar orkuauðlindir sem eitthvað önnur umgjörð væri um, væru falar.  Í framhaldinu væri rétt að Samfylkingin gerði einhverja söluskrá til þess að kjósendur jafnt sem kaupendur geti áttað sig á því hvert flokkurinn er að fara.

Ríkisstjórnin hefur verið krafin svara um hvort áframhald eigi að verða á sölu auðlinda þjóðarinnar og sömuleiðis hvort að sölunni á orkuauðlindum Suðurnesjamanna til skúffufyrirtækisins verði ekki rift. 

Svör ráðherra hafa vægast sagt verið óskýr - eitthvað stendur þó til að koma fram með nýtt frumvarp í haust um erlendar fjárfestingar og Katrín Júlíusdóttir sagðist í viðtalinu á Rás 2 vera til viðræðna um lagasetningu og þá væntanlega stefnumörkun.

 

 

 

Íslensk lög einungis útskýrð

Katrín og krimmarnir

Ég tek undir með Petrínu Baldursdóttur að fréttirnaraf því hvernig Katrín Júlíusdóttir leiðbeindi Magma Energy að fara fram hjá lögum með stofnun platfyrirtækis í Svíþjóð, koma ekki á óvart.  Salan er í samræmi við stefnu AGS að selja náttúruauðlindir landsins hratt og örugglega.  Sömuleiðis hefur Katrín Júlíusdóttir sýnt það að hún vill helst starfa á gráu svæði en hún semur við stórtæka bankaræningja um sérstakan skattaafslátt til atvinnuuppbyggingar. 

Allir sem eitthvað velta þessum furðulegu málum fyrir sér ættu að gera sér fullljóst að skúffan í Svíþjóð og skattaafslátturinn til fjárglæframannanna til að reisa gagnaverið var stofnað til með vitund og vilja Steingríms J. Sigfússonar formanns Vg.

Það er merkilegt hvað hann hefur komist lengi upp með að leika tveim skjöldum.

Iðnaðarráðuneyti leiðbeindi

Mun Jóhanna Sigurðardóttir axla ábyrgð á klúðrinu?

Umboðsmaður Alþingis spyr Seðlabankann og Fjármálaeftirlitið réttu spurninganna, varðandi ólögleg tilmæli stofnananna til fjármálafyrirtækja.  Sömuleiðis liggur fyrir að tilmælin voru samin fyrir tilstilli ríkisstjórnarinnar og hún lagði blessun sína yfir þau.

Í framhaldinu hljóta að vakna upp spurningar um hvort að Jóhanna Sigurðardóttir muni axla ábyrgð á klúðrinu?

Umboðsmaður óskar eftir skýringum

Steingrímur J. verðlaunar Icesavekálfa

Það er gaman að sjá hve Steingrímur er léttur í lund.  Það má vel skilja gleði Steingríms enda nýbúinn að rétta af dóm Hæstaréttar og fréttir bárust af því í dag að hann væri á fullu að koma Jóni Sigurðssyni fyrrum stjórnarformanni Fjármálaeftirlitsins inn í embætti stjórnarformanns Þróunarbanka Evrópu.  Jón Sigurðsson afrekaði það m.a. í störfum sínum í FME að sitja fyrir í bæklingi Landsbankans sem notaður var við markaðssetningu á Icesave í Hollandi rétt áður en íslenska bankakerfið hrundi til grunna. Það verður án ef mikill fengur að fá þennan mikla reynslubolta inn í Þróunarbanka Evrópu.

Steingrímur er mikill áhugamaður um Icesave og tókst fyrir örfáum dögum að þrýsta Hollendingum og Bretum til þess að semja um ólögvarðar kröfur. Sömuleiðis tókst Steingrími að kreista í gegnum þingið sérstökum skattaafslætti til Björgólfs Thors til þess að hann hefði ráð á að byggja upp gagnaver.

Það má s.s. fastlega gera ráð fyrir því að fjármálaráðherrann haldi með Hollandi fyrst að Norður- Kórea datt slysalega út úr keppni.

Steingrímur á HM-fundi

Ekkert spurst til millistjórnanda AGS, Steingríms J. Sigfússonar

Ekki vantaði yfirlýsingagleði Steingríms J. Sigfússonar þegar búsáhaldabyltingin stóð sem hæst og sömuleiðis einarða andstöðu hans við AGS og Icesave. Á þeim tíma naut Steingrímur dyggrar aðstoðar harðlínu flokksmannsins Álfheiðar Ingadóttur. Hún var sögð hafa verið í beinu sambandi við mótmælendur og hvetja þá til stórhættulegra verka.

Nú er öldin önnur, Steingrímur J. Sigfússon er orðinn millistjórnandi hjá AGS og er það staðfest af formanni viðskiptanefndar að hann starfi algerlega í skugga Franek Rozwadowski. Steingrímur er orðinn svo skuggsækinn að hann virðist ekki hafa látið sjá sig í dag.

Ég er þeirrar skoðunar að það sé orðið löngu tímabært að þau flokkssystkinin velti því fyrir sér í hvaða sporum þau séu stödd og ákveði í framhaldinu að virða dóm Hæstaréttar og koma AGS úr landi.

Æsir upp í manni réttlætiskenndina

Skoðum naflann á ræðukóngi Alþingis Pétri Blöndal

Pétur Blöndal er mjög reiður út í lántakendur fyrir það að vilja ekki og geta ekki borgað  möglunarlaust af stökkbreyttum lánum. Þingmaður Sjálfstæðisflokksins hefur sagt eins og frægt er orðið að lántakendur horfðu einungis á naflann á sér. Eflaust má sjá Pétur Blöndal í varnarlínu  fyrir AGS og Seðlabankann, ásamt félögum sínum Merði Árnasyni og Gylfa Magnússyni, þegar lántakendur mótmæla ólöglegum tilmælum Más Guðmundssonar. 

Pétur Blöndal, ræðukóngur Alþingis til þriggja síðustu þinga, flutti fjölmargar misgáfulegar og langar ræður á síðasta þingi. Ekki er úr vegi að fara yfir það sem Pétur sagði um löng ræðuhöld fyrir þremur árum:

Ég tel að menn eigi að geta meitlað hugsanir sínar þvílíkt í orð að þeir komi þeim frá sér á 15 mínútum í hæsta lagi og ef þeim tekst það ekki geta þeir komið aftur í ræðustól eins og þessi tillaga gerir ráð fyrir og ég bind miklar vonir við.

 Og svo hélt  hann áfram:

En það sem gerðist hér einu sinni var að minni hlutinn á Alþingi beitti meiri hlutann ofbeldi, hann beitti hreinlega ofbeldi með því að tala út í eitt um eitthvert ákveðið mál til þess að fresta einhverju öðru máli og tókst það furðuoft. Ég ætla að vona að menn hætti slíku og það lýðræði fái að ríkja inni á Alþingi að þeir þingmenn eða sá meiri hluti sem þjóðin hefur kjörið og kosið yfir sig fái að ráða með eðlilegum hætti á Alþingi en þurfi ekki að hlusta á einhverjar óskaplegar umræður með því markmiði að ná að stöðva eitthvert mál.

Ég er viss um að það geti verið gagnlegt fyrir Pétur Blöndal að skoða aðeins betur eigin nafla. Á það ekki einungis við um hneykslun hans  á löngum ræðuhöldum heldur ekki síður lofræður um fjármálakerfið.

Burt með Jóhönnu Sigurðardóttur

Margir efast ekki um vilja núverandi forsætisráðherra Jóhönnu Sigurðardóttur til að gera vel, þó svo að þeim fari fækkandi. Flestum er hins vegar ljóst að Jóhanna er algerlega vonlaus í að veita þjóðinni forystu.  Í kjölfar hrunsins lofaði hún að slá skjaldborg um heimilin m.a. með því að taka yfir lán í erlendri mynt og finna lausn á þeim vanda lántakanda. Athyglisvert er að horfa á viðtal á Stöð 2, við Jóhönnu frá því í okt. 2008 þar sem að hún sparar ekkert við sig í að blása út fyrirhugaðar aðgerðir.  Efndir Jóhönnu og Samfylkingarinnar voru að gera nánast ekki neitt og leyfa fjármögnunarfyrirtækjunum að tuddast á fólkinu.

Loksins eftir að Hæstiréttur skaut skildi fyrir lántakendur með stökkbreytt lán, degi áður en forsætisráðherra las upp ræðu ræðuskrifara á Austurvelli, þá virðist sem að Jóhanna hafi farið fram úr til þess að gera eitthvað. Ekki var það til annars en að fá illa launaðan Má Guðmundsson Seðlabankastjóra sem á reyndar mikla sök á glæfralegri peningamála og vaxtastefnu þjóðarinnar til þess að snúa út út dómi Hæstaréttar, almenningi í óhag og beina ólöglegum tilmælum til fjármálafyrirtækja. 

Stjórnvöld með Jóhönnu í broddi fylkingar höfðu náið samráð við AGS, fjármálafyrirtæki en ekki fulltrúa lántakenda eða neytenda.  Ríkisstjórnin hefur algerlega brugðist að veita forystu og leysa hnúta með almennum aðgerðum en stað þess horft á og vísað málum til úrlausna í dómsölum.   Í framhaldinu er rétt að spyrja hvort að þessi ríkisstjórn sé til einhvers gagns?

Ekki get ég séð að svo sé og á það við nánast við flesta stóra málaflokka s.s. hag heimila, sjávarútvegsmál og eflingu atvinnulífs.  

Fé án hirðis með liðlega 30% fjárins

Pétur H. Blöndal skoraði feitt á Landsfundi Sjálfstæðisflokksins á kostnað stjörnuþingmannsins Bjarna.  Eflaust hefði hann sigrað ef hann hefði beitt sér en hann lýsti því yfir að hann hefði svo sem ekki neinn sérstakan áhuga á sigri og að leiða Sjálfstæðisflokkinn.

Bjarni sem vildi ná Sjálfstæðisflokknum saman með óljósum yfirlýsingum sem allir armar flokksins hefðu svo sem getað sætt sig við, átti í vök að verjast. Stjórnmálaspekingar hafa lesið það út úr úrslitunum að Bjarni hafi eitthvað sem kallast veikt umboð.  Aðrir hafa bent réttilega á að Pétur hafi í raun verið fulltrúi óánægju aflanna líkt og Besti flokkurinn á Landsfundi Sjálfstæðisflokksins. Rétt eins og sá Besti hefur Pétur horft aðeins á naflann á sér og skarað eld að sinni köku. 

Líkt og fé án hirðis fékk Besti flokkurinn liðlega 30% fylgi en spyrja má hvort að í gerjun stjórnmálanna muni Pétur í náinni framtíð leiða flokk Besta flokks sjálfsgræðis og kaupleigufyrirtækja. Eitt er víst að Jón Gnarr getur skaffað starfandi framkvæmdastjóra fyrir flokkinn.

Ólögleg tilmæli í þágu fjármálafyrirtækja

Það er merkilegur fjandi að stjórnvöld sem sváfu á verðinum á meðan bankarnir voru rændir innanfrá og tóku stöðu gegn krónunni og almenningi skulu nú vakna til þess að beina ólöglegum tilmælum til fjármálafyrirtækja.  Fyrirtækjanna sem hafa gengið hart fram í að innheimta ólögleg stökkbreytt lán. Það er fróðlegt að fara stuttlega yfir yfirlýsingu stjórnavalda.

Fjármálaeftirlitið og Seðlabanki Íslands beina því eftirfarandi tilmælum til fjármálafyrirtækja:
 
1.       Lánasamningar sem að mati viðkomandi fjármálafyrirtækis innihalda óskuldbindandi gengistryggingarákvæði sbr. framangreinda dóma Hæstaréttar verði endurreiknaðir. Í stað gengistryggingar og erlends vaxtaviðmiðs skal miða við vexti sem Seðlabanki Íslands ákveður með hliðsjón af lægstu vöxtum á nýjum almennum óverðtryggðum útlánum eða ef verðtrygging er valin lægstu vöxtum á nýjum almennum verðtryggðum útlánum og beitt er þegar óvissa ríkir um lánakjör sbr. 18. og 4. gr. laga nr. 38/2001 um vexti og verðtryggingu, nema aðilar semji um annað. 

18. gr. vaxtalaga, sem vísað er til, kveður á um skyldu kröfuhafa (lánveitanda) til endurgreiðslu til skuldara. 18. gr. vísar ekki til neinnar heimildar fyrir kröfuhafa. 

Með ákvæðinu eiga sko skuldarar rétt skv. gengistryggingadómunum en ekki lánveitanda eins og snúið er út úr í tilmælum um ólöglegt athæfi. 

Í tilmælunum er einnig vísað til 4. gr. vaxtalaga að því er varðar heimildir fjármálafyrirtækja til að endurákvarða vexti. Skilyrði þess að umræddu ákvæði verði beitt er að vaxtaprósenta sé ekki tiltekin í lánasamningi. Þegar af þeirri ástæðu verður ákvæðinu ekki beitt þar sem öll húsnæðislán, sem og bílalán, kveða nú þegar á um tilteknar vaxtagreiðslur.

Með þessu athæfi eru stjórnvöld að hvetja til lögbrota og upplausnar samfélagsins.

 

Í þágu almannahagsmuna