Ríkisstjórn Íslands er búin að missa trú á íslensku krónuna

Ég hlýddi á viðskiptaráðherra í ríkisstjórn Íslands, Björgvin G. Sigurðsson, í fréttaþættinum Ísland í dag á Stöð tvö í kvöld. Þar lýsti hann yfir vantrú á íslenska gjaldmiðlinum og taldi hann ekki eiga framtíðina fyrir sér. Þessi orðræða og afstaða ráðherra í ríkisstjórn Íslands hlýtur að vera afar óheppileg nú þegar gjaldmiðillinn sveiflast um heilu prósentin frá degi til dags. Yfirlýsing sem þessi á viðkvæmum tímapunkti er alls ekki til þess fallin að auka tiltrú og stöðugleika í samfélaginu.

Seðlabankinn hefur haft það hlutverk að halda aftur af verðbólgu með því að hækka vexti og sporna gegn ákvörðunum stjórnvalda á umliðnum misserum sem hafa sumar hverjar gengið í þveröfuga átt og aukið á þensluna, s.s. með að auka útgjöld ríkisins meðan þensla ríkir. Að kenna krónunni um ójafnvægið í íslensku efnahagslífi er barnalegt, hún er bara verkfæri. Árinni kennir illur ræðari.

Í lokin er rétt að huga að því að taka upp evru á Íslandi en það verður að gera með öðrum hætti og í öðru efnahagsumhverfi en Björgvin G. Sigurðsson leggur til. Til þess að við getum tekið upp evru þarf að ríkja stöðugleiki, verðbólga verður að vera lág og vextir sömuleiðis. Upptaka evrunnar er í sjálfu sér alls ekki leiðin til að ná fram stöðugleikanum. Það er líka betra að koma inn í myntsamstarf ríkja með fullri reisn frekar en eins og flóttamenn að forðast heimatilbúinn óstöðugleika.

Það verður fróðlegt að fylgjast með viðbrögðum annarra og vita hvort þau eru í takt við viðbrögð fagráðherrans.

   

Athugasemdir

[Guðmundur Jónas Kristjánsson, 21.8.2007 kl. 00:20]

Íslenzkur ráðherra sem hefur ekki einu sinni trú á íslenzkri gjaldmynt á
tafarlaust að segja af sér, eða ríkisstjórnin öll hafi hún misst trúna á
íslenzku krónunni..............

[Baldur Fjölnisson, 21.8.2007 kl. 00:38]

Sigurjón, markaðir eru að snúast og þeir eru að verðleggja áhættu inn í sín verð. Sem var alltaf fatalt þar sem alþjóðlegt fjármálakerfi tryggir jú sjálft sig gegn hruni og byggist því augljóslega fyrst og fremst á trausti - alveg eins og hver annar keðjubréfafaraldur. Þegar menn missa tiltrú á kerfinu og hætta að taka mark á eignum þess á massafjölmiðlum er kerfið dauðadæmt. Confidence games byggjast jú fyrst og fremst á confidence. 

Hér heima erum við með risavaxið og ofurskuldsett bankaapparat sem fyrir löngu hefur vaxið ríkisvaldi og seðlabanka yfir höfuð. Þetta er grátbroslegur brandari. Den mere kloge narrer den mindre kloge eins og alltaf. Þess vegna er Dabbi í seðlabankanum og þess vegna minnist Geir Haarde etv. fyrst á þessa alvarlegu hluti á næsta ári.  

Við erum með mjög alvarlegt rof þarna. Við getum ekki varið krónuna. Fall hennar þýðir innflutta verðbólgu. Við þekkjum söguna. Verðbólga hefur áður komið við sögu hér á landi raunar verið landlæg. Nú erum við í þeirri stöðu að stýriaðilarnir, seðlabanki og ríkisstjórn eru máttvana dvergar í gíslingu braskara og gjaldeyrisspekúlanta. Ríkissjóður Íslands er í raun gjaldþrota vegna þess að skattgreiðendur munu neyðast til að skaffa sombíunum í seðlabankanum fullnægjandi gjaldeyrisvarasjóð til að regúlera krónuna. Sem mun aftur rústa lánshæfi skattgreiðenda (ríkissjóðs) og bankanna. Og svo framvegis. Þessi vitleysa dafnar á skorti á umræðu en Björgvin virðist vera að herða sig upp í að ræða þessi mjög svo krítísku málefni. 

[Guðrún María Óskarsdóttir., 21.8.2007 kl. 02:38]

Þessi ríkisstjórn samanstendur því miður að virðist af mönnum sem tala sitt í hverja áttina , sitt á hvað sem nefnt hefur verið tækifærismennska.

kv.gmaria.

[Jóhann Elíasson, 21.8.2007 kl. 09:50]

Þessi stöðugleiki, sem Geir H Haarde talar um í kosningabaráttu og á tyllidögum, er einfaldlega ekki til staðar og efnahaggsstjórnun er í molum ef hún er nokkur.  Þetta sjá allir sem eitthvað þekkja til málanna.  Þó hagvöxtur hafi verið hér á landi undanfarin ár er sá hagvöxtur að mestu borinn uppi af einkaneyslu sem aftur er borinn uppi af lántökum með öðrum orðum þá er "góðærið" sem verið hefur hér á landi "undanfarin ár" byggt á falsi og blekkingum.  Eins og þú bendir á í grein þinni þá hefur krónan sveiflast um 1% á dag undanfarið og við svoleiðis aðstæður getur enginn atvinnuvegur þrifist til lengdar og kallar þetta á róttækar aðgerðir og get ég ekki betur séð en að skipta um gjaldmiðil sé einhver besta leiðin í stöðunni og þá verður um leið að sækja um aðild að ESB.  Það eina "slæma", sem umsókn um aðild að ESB gæti hugsanlega haft í för með sér, er að illa tenntir og vanhæfir "blýantsnagarar" Seðlabanka Íslands yrðu atvinnulausir (ekki hafa þeir sannað tilverurétt sinn hingað til).  Það hafa verið rök margra að Ísland missti sjálfstæði sitt gagnvart miðstýrðu valdi Brussel, en EES samningurinn gerir það að Ísland verður að taka upp reglugerðir ESB sama hvað er sagt (þessar reglur koma til okkar óvænt)  er þá ekki betra að vera með fulltrúa í Evrópuráðinu og vita þá að von er á reglugerð til að framfylgja?  Það er líka notað sem rök á móti ESB-aðild að við missum forræðið yfir fiskimiðunum, við erum ekki með neitt forræði yfir fiskimiðunum eingöngu LÍÚ, ég get ekki séð að þetta séu nokkur rök.  Þessi evru-umræða er bara af því góða og mættu jafnvel fleiri málsmetandi menn taka þátt í henni.

[Ívar Pálsson, 21.8.2007 kl. 14:03]

Sigurjón, þetta er ekki spurning um trú á gjaldmiðilinn, heldur raunsæi. Hvert er rétt gengi krónunnar? Ekki uppblásið krónubréfagengi með 800 milljarða vaxtamunarblöðru alþjóðlegra braskara, heldur gamaldags vöruskiptajöfnuður. Sammála Baldri með margt varðandi Seðlabankann. Það yrði glapræði að verja fyrra platgengi með inngripum, sem færa tugmilljarða frá skattgreiðendum til þess að milda högg spekúlantanna á nokkrum klukkutímum. Krónan er bara úrelt eins og skildingurinn, tökum upp Evru án tilfinningasemi, en látum ESB batteríið eiga sig.

[Haukur Nikulásson, 21.8.2007 kl. 15:51]

Ég er sammála því að viðskiptaráðherran er að tala eins og bjáni. Þetta er maðurinn sem á að gæta hagsmuna íslendinga og hann gerir það ekki með því að lýsa því yfir opinberlega að gjaldmiðlillinn okkar sé bara drasl sem eigi að henda! Gildir hér einu hvort það er satt eða ekki. Ég hélt að það væri eitthvert vit í þessum dreng, það reyndist vera stórlega rangt metið. Hann hefur ekkert vitrænt innihald og talar bara í aðfengnum lánuðum Evrópusambandsfrösum.

Íslendingar geta farið að nota Evrur og dollara ef þeim sýnist svo. Það er ekkert sem stoppar það og sumir reyndar byrjaðir. Ég er líka sammála Ívari og fleirum að láta ESB eiga sig. Hvernig dettur fólki í hug að við yrðum betur settir sem nýlenda frá miðstýrðri Evrópu?!