Útgerðarmenn láta bjóða sér hvað sem er og stórmeistaralygi

Margt orkar tvímælis við stjórn fiskveiða, s.s. að hægt sé að færa aflakvóta landshorna á milli, eins og frá Grímsey til Vestmannaeyja og frá Grundarfirði til Austfjarða. Það sjá allir að út frá líffræðinni er þetta dauðans della, og hvað þá að trilla inni á Eyjafirði sé að taka frá togara á Halamiðum.

Nú bárust fréttir af gríðarlegri veiði við Grænland sem togari veiddi á nokkrum dögum, vel á annað þúsund tonn af þorski sem hlýtur að vera drjúgur hluti þess sem leyft er að veiða allt þetta ár. Samkvæmt ráðgjöf Alþjóðahafrannsóknaráðsins á þessi þorskur ekki að vera til, ráðgjöf frá árinu 1993 til ársins 2007. Samkvæmt ráðgjöfinni áttu engar veiðar að fara fram á þessu árabili. Öll veiði sem samt sem áður var ekki mikil var því vel umfram ráðgjöf.

Fyrir árið 2007 var gefinn út kvóti upp á 4.875 tonn sem nú hlýtur að vera löngu uppurinn.

Þessi gríðarlegi afli og fréttir af mikilli fiskgengd við Grænland segja bara það að ráðgjöf Alþjóðahafrannsóknaráðsins fyrir Grænland sé röng. Það sem væri rökrétt að gera núna fyrir íslenskar hafrannsóknir væri að merkja fisk við Grænland og kanna hvort merkin skili sér á Íslandsmiðum þannig að menn þurfi ekki að þrasa um hvort grænlenskur fiskur hafi komið eða ekki. Margir sjómenn telja það hafa gerst en geta ekki sýnt fram á það. Íslenskir útgerðarmenn láta bjóða sér ráðgjöf hér heima sem byggir á sömu röngu forsendunum og ráðgjöfin við Grænland sem augljóslega er röng.

Hér virðist sem t.d. Guðmundur Kristjánsson í Brimi sem hefur yfir að ráða öflugu og stórglæsilegu skipi sætti sig við niðurskurð sem byggður er á fáránlegum forsendum, t.d. að veiða ekki fisk sem er vanhaldinn. Í stað þess að stuðla að því að ráðgjöfin sem augljóslega er röng verði tekin til gagnrýninnar endurskoðunar verja samtök útgerðarmanna stórfé í einhverja „rannsóknarstöðu“ innan HÍ þar sem Helgi Áss Grétarsson virðist hafa það verkefni að hagræða sannleikanum og framleiða stórmeistaralygi. Í ýmsu sem hann lætur frá sér er sannleikanum hagrætt svo að ekki sé dýpra í árinni tekið. 

Athugasemdir

[Hallgrímur Guðmundsson, 20.8.2007 kl. 19:15]

Alveg er ég sammála þér Sigurjón, þessir hreppaflutningar á kvótum er algjör geggjun. Ráðgjöfin frá Alþjóðahafrannsóknarráðinu dæmir sig sjálf og einnig Hafró þetta eru sömu grautarhausarnir. Hvert var þorskurinn að fara sem menn voru að flýja á Hampiðjutorginu í vor? Hvernig væri að menn færu að rannsaka eitthvað sem máli skiptir á vitrænan hátt? Þegar menn fóru að benda á t.d. gríðarlegt magn þorsks á Hampiðjutorginu sagði Hafró, við vitum af þessu þetta er í bókhaldinu, og komust upp með þessa djö....... dellu. Hvernig er það hægt að ein aum stofnun kemst upp með það að staðhæfa það að
þeir viti nákvæmlega um alla helv.... titti sem um hafið synda? Eru staðreyndirnar sem menn fengu í hausinn við Kanada og nú á þver öfugan hátt við Grænland ekki nægar til þess að ráðamenn vakni og hugleiði það að fiskifræðin er ekki nákvæmari en þetta? Sem sagt byggt á spádómum mis vitra manna.

[Sigurgeir Jónsson, 20.8.2007 kl. 23:21]

Engum nema einstökum félögum í Frjálslyndaflokknum, allavega ekki hin síðari ár, hefur dottið það í hug að hægt sé að banna skipum að veiða, nema í þeim firði þar sem lögheimili skipsins er.Það hlýtur að vera um einhverja fljótfærni í málflutningi að ræða.Þingmenn flokksins hafa verið að ympra á þessu.Ég legg til ykkar vegna, að þið minnist ekki meira á þetta.

[Sigurjón Þórðarson, 21.8.2007 kl. 18:05]

Það hafði samband við mig maður sem vildi fá rökstuðning fyrir því að Helgi Áss Grétarsson sem gegnir "rannsóknarstöðu" í HÍ sem greidd er af LÍÚ, hagræddi svo sannleikanum að það mætti vel kalla það framleiðslu stórmeistaralygi.

Áður en lengra er haldið er rétt að minna á að nýlega mátti lesa í leiðara Morgunblaðið að kostaði lögfræðingurinn Helgi Áss færi með vitleysu og orðhengilshátt og tók Morgunblaðið þar með undir sjónarmið sem ég hafði sett fram hér á blogginu í pistli sem hafði yfirskriftina Keypt vísindi í Háskóla Íslands.

Það sem varð til þess að ég lét þessi orð falla í ofangreindri grein um að Helgi hagræddi svo sannleikanum að ætla mætti að hann hefði það verkefni helst hjá LÍÚ að framleiða stórmeistaralygi var ný grein Helga sem bar yfirskriftina Kvóti á silfurfati en í henni dregur  "fræðimaðurinn" upp alranga mynd af breytingu á fiskveiðiflotanum sem stundað hefur veiðar við strendur landsins á umliðnum áratugum.  Helgi Áss getur í engu flota erlendra skipa sem stundaði veiðar í stórum stíl fyrir þorskastríðin en Kristinn Pétursson vinur minn gerði ágæta grein fyrir því í pistli á heimasíðu sinni.

Í grein sinni Kvóti á silfurfati segir Helgi Áss að "aflamarkskerfið hafi komið til framkvæmda árið 1991"  og hafi ætlunin verið a að stöðva stækkun flotans og halda veiðum innan hóflegra marka en síðan hafi margar breytingar verið gerðar á kerfinu sem hafa holað meginreglur þess.

Þetta er auðvitað stórtæk hagræðing á sannleikanum og hlýtur að geta talist stórmeistaralygi hjá Helga, þar sem flestar breytingar stjórnvalda á síðustu 15 árum hafa miðað að því að festa aflamarkið í  sessi og bæði fjölgað tegundum sem bundnar eru í kvóta og afnumið sóknarkerfi minnstu báta. 

Í sjálfu sér er ekkert við því að segja að sérfræðingar útbúi einhliða álitsgerðir og reki beinan áróður fyrir hagsmunasamtök en þegar það er gert dulbúið í einhvern fræðilegan búining rannsókna við Háskóla Íslands er allt annað uppi á teningnum.  Háskóla sem annt er um orðspor sitt getur ekki látið slíkt viðgangast.

 Það er mín skoðun að útgerðarmenn þ.e. þeir sem ætla að starfa áfram í greininni verði að íhuga þá stöðu sem upp er komin síminnkandi sókn á sama tíma og stjórnvöld boða minni þorskkvóta á næstu  árum.   Í stað þess að leggja áherslu á að fara yfir fiskveiði"ráðgjöf" sem augljóslega er vafasöm þá ákveður LÍÚ að verja fjármunum í að kosta rannsóknir í lögfræði sem er að mati Morgunblaðsins að öðrum þræði vitleysa og orðhengilsháttur.