Björgvin G. Sigurðsson er allur að koma til

Mér sýnist sem Björgvin Guðni hafi haft gott af því að losna út úr ríkisstjórn. Mér sýnist sem hann sé að verða afturbata.

Í dag birtist vefgrein eftir hann þar sem hann lýsir yfir harðri og einarðri andstöðu gegn kvótakerfinu. Hann hafði meira að segja gert sér ferð niður á bryggju til að hitta Ásmund Jóhannsson sem ríkisstjórnin braut á mannréttindi og kostaði nokkrum tugum milljóna upp á málavafstur til að halda við óréttlætinu, en mannréttindanefnd Sameinuðu þjóðanna úrskurðaði ríkisstjórn Samfylkingar og Sjálfstæðisflokks samt í óhag.

Ríkisstjórnin sem Björgvin studdi og sat í hirti síðan ekki um að virða álitið og hélt óhikað áfram að brjóta á ungnum sem öldnum sjómönnum, s.s. Ásmundi kallinum.

Batnandi mönnum er best að lifa. Nú er að vonast til þess að Björgvin sýni afstöðuna í verki, ekki bara í snakki við sjómenn heldur í kröftugum ræðum síðustu dagana fyrir þingslit þar sem hann krefur mannréttindabrjótinn Steingrím J. um að láta af brotastarfsemi sinni. Það eina sem Steingrímur þarf að byrja á er að gefa út reglugerð þar sem leyfðar eru handfæraveiðar. Þegar handfæraveiðarnar voru frjálsar og hvað mestar voru þær samt innan við 5% af heildarþorskafla.

Þessi afstaða ríkisstjórnar Samfylkingar og Vinstri grænna markast nánast af mannvonsku, að virða menn ekki viðlits og rétta ekki hlut þeirra sem hafa sótt réttlæti alla leið til útlanda þegar innlend stjórnvöld og dómstólar hafa gjörsamlega brugðist. Þá er nú gott til þess að vita að Björgvin er kominn með þeim á árarnar - nema þetta sé kosningaropi í honum.

Frjálslyndi flokkurinn er eina svarið

Ég hef ákveðið að bjóða mig fram í 2. sætið á lista Frjálslynda flokksins í Norðvesturkjördæmi. Það kom vart annað til greina vegna þess að stefnumál flokksins í sjávarútvegsmálum eru forsenda fyrir jákvæðri byggðaþróun í Norðvesturkjördæmi. Það er ekki merkilegt, kerfið sem Frjálslyndi flokkurinn hefur barist gegn með oddi og egg þar sem ekkert af markmiðum kerfisins hefur náðst, s.s. svokölluð uppbygging þorskstofnsins. Kerfið hefur þvert á móti leitt atvinnugreinina í algjört skuldafen sem flestir málsmetandi menn eru sammála um að hafi verið upphafið að efnahagshruninu.

Kerfið hefur verið úrskurðað óréttlátt af sjálfri mannréttindanefnd Sameinuðu þjóðanna og að því beri að breyta. Öll stjórnmálaöfl sem vilja láta taka sig alvarlega ættu að setja það á oddinn að endurskoða kerfið - strax. Í stað þess hefur fjórflokkurinn slegið þagnarmúr um raunverulegar breytingar og dregið lappirnar árum saman. Steingrímur J. hefur núna tekið við kefli Einars Kristins Guðfinnssonar og heldur óhikað áfram að brjóta mannréttindi á sjómönnum og svipta dreifðar byggðir réttinum til atvinnu.

Ólíkt öðrum stjórnmálaöflum sér Frjálslyndi flokkurinn augljós tækifæri við endurskoðun fiskveiðistjórnunarkerfisins og verða þá hinar dreifðu byggðir mótorinn við að endurreisa efnahagskerfið og byggja upp nýtt og öflugt Ísland.

Framtíðin er björt ef - og aðeins ef - við breytum þeim kerfum sem hafa orðið okkur fjötur um fót. Guðjón Arnar Kristjánsson býr yfir gríðarlegri þekkingu á sjávarútvegsmálum og það er bráðnauðsynlegt að hún verði nýtt til þess að vinda ofan af kerfinu og koma á meiri sátt og skynsemi við stjórn fiskveiða.

Ég sækist eftir 2. sæti í Norðvesturkjördæmi

Mistök urðu við útgáfu kjörseðils vegna póstkosningar Frjálslynda flokksins í Norðvesturkjördæmi. Þar kemur fram að ég sækist eftir 1.-5. sæti sem er ekki rétt. Hið rétta er að ég sækist eftir 2. sætinu á listanum.

Get ég ekki örugglega treyst á þig?

Minnisvarði um stjórnmálaklúbbinn

Fjórflokkurinn stendur í miklum björgunaraðgerðum fyrir efnahagslífið. Það er svo mikið að gera að sérstakur saksóknari hefur ekki fengið nein almennileg mál til rannsóknar á heilum mánuði. Það er búið að bjarga BT-tölvuverslununum og Apple-umboðinu sem selur líka tölvur, tískuvöruverslun í Kringlunni að ógleymdum Mogganum og nú á að setja 13 milljarða í byggingu tónlistarhússins á hafnarbakkanum. Liðsmenn VG hafa verið svo uppteknir við að slökkva elda í Mogganum að þeir hafa ekki mátt vera að því að hugsa um mannréttindabrot á sjómönnum og hafa fremur en hitt stuðlað að áframhaldi þeirra.

Ég á satt að segja rosalega erfitt með að skilja þessa forgangsröð meðan íslensk iðnfyrirtæki sem eru í framleiðslu fá ekki nokkra fyrirgreiðslu. Það er helst að ég skilji þó alla milljarðana sem settir eru í tónlistarhúsið þar sem hálfkarað húsið er leiðinleg áminning fyrir klúbbmeðlimi á leið í vinnuna - hvort sem hún er í Ráðhúsinu í Tjörninni eða Alþingishúsinu við Austurvöll - um fjármálalega óstjórn og dellu undanfarinna ára. Hvergi fór fram upplýst og gagnrýnin umræða um kostnaðinn við þetta hús og því var laumað inn í heimildarákvæði í fjárlögum. Heimildarákvæði eru annars helst notuð til að taka ákvörðun um sölu eða kaup á prestsbústöðum en ekki um tugmilljarðaframkvæmdir.

Fordómafull ruglutófa á Mogganum

Það er merkilegt að lesa enn einn haturspistil starfsmanns ríkisstyrkta blaðsins, Morgunblaðsins, sem var rétt í þessu að komast í hendurnar á útgerðaraðlinum. Leigupenni útgerðaraðalsins ríkisstyrkta, Kolbrún Bergþórsdóttir, virðist gera sér far um að ráðast á minnsta flokkinn á Alþingi af mikilli ósanngirni, s.s. að við sem höfum verið fulltrúar hans á Alþingi séum eitthvert sérkennilegt fólk, illa þenkjandi og þaðan af verra.

Eitt af því sem virðist vera eitur í beinum blaðamanns LÍÚ er að Frjálslyndi flokkurinn beitir sér gegn kvótakerfinu og hún lætur líta út sem það sé eina málið sem flokkurinn hafi beitt sér í fyrir utan nauðsynlega umræðu um útlendinga. Þetta er helbert kjaftæði þar sem stefnuskrá Frjálslynda flokksins varar m.a. sterkt við skuldasöfnun þjóðarbúsins. Ætli þetta tvennt, barátta gegn skuldasöfnun og óréttlátu kvótakerfi, réttlæti ekki fullkomlega tilvist flokks í þjoðfélagi sem glímir við hrun fjármálakerfisins einmitt vegna kvótakerfisins og skuldasöfnunar. Hinir flokkarnir hafa þetta ekki á stefnuskrá sinni.

Þegar sá þingmaður sem sjálfskipaðir fulltrúar leyfilegrar umræðu töldu hvað öfgafyllstan í umræðunni, Jón Magnússon, er genginn í Sjálfstæðisflokkinn og honum hefur verið tekið þar opnum örmum minnist enginn á að hann sé rasisti og ali á andúð í garð útlendinga - hann er kominn í rétta liðið og búinn að gefast upp á að sýna fjórflokknum andóf. Kolbrún Bergþórsdóttir virðist gefa Jóni Magnússyni þá einkunn, bara við það að ganga úr flokknum, að hann hafi af góðmennsku sinni og sterkri réttlætiskennd reynt að vísa flokksfélögum sínum veginn, en hreinlynd sál Jóns hafi verið úthrópuð og hann hrökklast að lokum úr flokknum.

Hvað verður um frjálsa og hlutlæga fjölmiðlun þegar skuldugi kvótaaðallinn er kominn með Moggann og Fréttablaðið er hjá Þorsteini Pálssyni?