Finnski kúr Samfylkingarinnar

 Til að átta sig á því sem er að gerast í efnahagslífi þjóðarinnar hefur verið algjörlega vonlaust að stóla á greiningardeildir bankanna og spá fjármálaráðuneytisins, hið sama má segja um það sem hefur komið frá Seðlabankanum og alls ekki hefur verið hægt að treysta á viðskiptakálfa dagblaðanna. Einhvern tímann gerði ég samantekt á öllum þessum spám, sendi nokkrum blaðamönnum og sýndi þeim fram á hversu vitlausar spárnar væru, segðu lítið og hefðu lítið forspárgildi.

Þeir sem fengu samantektina senda gerðu ekkert með hana enda var þá „góðæri“ og allir ánægðir.

Ein helsta leiðin til að átta sig á stöðu mála er að fara inn á malefnin.com. Þar er að finna ýmsa skarpa penna, s.s. Dodda, Ganglera og bekk. Einnig er skynsamlegt að skoða hagtölur eins og þær sem koma beint af skepnunni, t.d. hjá Hagstofunni og Seðlabankanum. Reyndar má bæta því við að Villi Egils hjá Samtökum atvinnulífsins hefur oftsinnis haldið því fram að ekkert væri að marka tölurnar frá Seðlabankanum. Hann bar brigður á upplýsingar þaðan um erlendar skuldir þjóðarbúsins en nú virðist sannleikurinn hafa læðst aftan að honum.

Nú er Samfylkingin að boða einhverjar hókus-pókus-leiðir út úr efnahagsvandanum en hún vill sem kunnugt er ekki veiða meiri þorsk og ekki spara í utanríkisráðuneyti Ingibjargar, heldur hækka vexti og bregða með því fæti fyrir atvinnulífið. Síðan á að fara einhverjar óskilgreindar leiðir og er umræðan um sumt eins og verið væri að kynna einhverja meiriháttar megrunarkúra, sbr. danska kúrinn, finnsku leiðina. Ein leið  Samfylkingarinnar er að taka upp evru en óraunhæft er að það geti orðið fyrr en eftir þrjú, fjögur ár þannig að nú boða samfylkingarmenn finnska kúrinn sem er illa skilgreind leið.

Samfylkingunni líst illa á norska kúrinn sem Frjálslyndir bjóða upp á, en hann gæti mögulega virkað strax með því að taka upp norsku krónuna. Svo virðist sem ástæða Samfylkingarinnar sé sú að það gæti spillt fyrir evrukúrnum eftir fjögur ár, megruninni sem virðist sú eina rétta að mati Samfylkingarinnar.

Athugasemdir

[Guðrún María Óskarsdóttir., 3.11.2008 kl. 00:03]

Sæll Sigurjón.

Það nýjasta er að finna í ályktun UV, þess efnis að stjórnarandstaðan og Sjálfstæðisflokkurinn ráfi um villigötur saman, maður veltir fyrir sér hvar Samfylkingin er þá ?

kv.gmaria.

[Gestur Guðjónsson, 3.11.2008 kl. 00:47]

Það er hlálegt að heyra Samfylkinguna tala um finnsku aðferðina til að reynda að eigna sér hana, þegar að allt það lagaumhverfi sem sett var um sprotafyrirtæki og nýsköpun voru leidd í lög hér á Íslandi í tíð Jón Sigurðssonar í iðnaðar- og viðskiptaráðuneytinu.

Það bíður einfaldlega eftir að komast almennilega af stað. Að það verði pláss fyrir nýsköpun í hagkerfinu.

Það sem vantar er fjármagn og lægri stýrivextir og er bara tímaspurning hvenær það kemur og þá er bara að slá í klárinn.

[Sigurjón Þórðarson, 3.11.2008 kl. 09:48]

Það skiptir afar miklu máli að skapa frjóan jarðveg og skilyrði fyrir nýsköpun en það verður að hafa það í huga að venjulega tekur það einhver ár fyrir slíkar hugmundir að þroskast og drjúgur hluti  góðra hugmynda nær ekki að blómgast. 

Gestur mér sýnist einmitt að stýrivaxtahækkunin sé frekar til að leggja stein í götu þess að reynt sé að hleypa af stokkunum nýjum fyrirtækjum og ferskum hugmyndum til atvinnusköpunar.

[Gestur Guðjónsson, 3.11.2008 kl. 09:57]

Eins og ég skrifaði, þá er stýrivaxtahækkunin óhjákvæmileg, ef menn ætla sér að vera með frjálst flæði gjaldeyris.

Hins vegar verður ríkisstjórnin að koma með mótvægisaðgerðir fyrir atvinnulífið, einhverskonar bjargráðalánveitingar til að koma atvinnulífinu í gang á ný.