Vandi Bjarna Harðar er vandi Íslands

Í Kastljósinu í gær var rætt um nýja skýrslu ríkisendurskoðanda um Þróunarfélag Keflavíkur. Bjarni sótti að fyrrum aðstoðarmanni Geirs Haarde sem varðist með skýrslu ríkisendurskoðanda sem skjöld í málinu. Efnisatriði þessa máls eru þannig að staða Bjarna hefði átt að vera auðveld þar sem ljóst var að menn sátu hringinn í kringum borðið, ættmenni og innstu koppar í búri flokksins væru kaupendur og seljendur. Gerðir voru samningar án útboðs fyrir þúsundir milljóna, og rekstrar- og stjórnunarkostnaður fjögurra manna battarís er vel á annað hundrað milljónir á árinu 2007. 

Því miður tókst Bjarna ekki alveg nægilega vel að verja borðleggjandi málstað og hefur honum þó oft tekist ágætlega vel upp. Ég fór að velta fyrir mér hvort ástæðan fyrir því að Bjarna gekk ekki sem skyldi væri sú að Ríkisendurskoðun hefði fyrir örfáum árum, á árinu 2005, slegið skjaldborg um hæfi Halldórs Ásgrímssonar  til að ráðstafa Búnaðarbanka Íslands til nákominna, með að vísu aðstoð Geirs Haarde. Þá eins og nú sá Ríkisendurskoðun ekkert athugavert við það. Samfylkingin gerði það hins vegar og höfð voru uppi stór orð en nú berst grafarþögn úr þeim herbúðum. Það er einnig umhugsunarvert að þá, við ráðstöfun Búnaðarbankans, var notuð nákvæmlega sama vörn og nú, verkefnið væri svo gott og hefði skilað svo miklu, sem sagt helgaði tilgangurinn meðalið.

Nú eru þær raddir þagnaðar þar sem glæfraleg lántaka bankanna er farin að valda venjulegum fjölskyldum búsifjum. Reyndar eru fréttir Bloombergs með þeim hætti í dag að svo gæti farið að vegna skuldatryggingarálagsins á Kaupþingi (gamla Búnaðarbankanum) og Glitni (gamla Íslandsbanka) yrðu bankarnir ríkisvæddir á ný.

Það skyldi þó aldrei verða, fimm árum eftir einkavinavæðingu bankanna, að staðan yrði sú sama og var í byrjun árs 2003 en hún hljóðaði upp á einn einkabanka og tvo ríkisbanka.

Vandinn er sá í hnotskurn að grams æðstu ráðamanna þjóðarinnar með kvótann, banka og aðrar eigur ríkisins hefur lengi staðið svo lengi yfir að margur er orðinn meðvirkur í Jeltsínsku ástandi. 

Athugasemdir

[Gylfi Björgvinsson, 28.3.2008 kl. 06:53]

Gott hjá þér  Sigurjón  eins  og  svo oft áður. Heitir þetta ekki löglegt enn siðlaust    eins og  góður maður  orðaði það

[Guðjón Sigþór Jensson, 28.3.2008 kl. 08:03]

Já það er einkennilegt hve ýmsar mikilvægar persónur í stjórnsýslunni og pólitíkinni eru flæktir rækilega í þetta mál. Bjarni Harðarson var kannski ekki heppilegasti þátttakandinn í Kastljósinu í  gær. Gott ef Atli Gíslason hefi verið í staðinn.

Mosi

[Ellismellur (IP-tala skráð) 28.3.2008 kl. 08:37]

Af hverju er yfirleitt verið að púkka upp á þennan gormælta sorpritasala frá Selfossi eins og hann sé eitthvert númer í pólitík?

[Sigurjón Þórðarson, 28.3.2008 kl. 11:41]

Mosi ég gæti sem best trúað því að Atli verið betri og ekki síður Grétar Suðurnesjamaður.

Ellismellur: Bjarni er ekki sem verstur en hann þyrfti að velta betur fyrir sér stjórn fiskveiða en ef hann gerði það, þá batnaði hann mikið.

[Ari Guðmar Hallgrímsson, 28.3.2008 kl. 12:44]

Ég er sammála þér Sigurjón með það að það hefði kannski verið betra að fá einhvern annan til að taka þátt í þessu spjalli, þar sem andmælandi hans virtist ekki haf neitt til málana að leggja sem bitastætt gat talist.

Það er ekki nauðsynlegt að vera með svona orðaleppa þó menn séu ekki sammála. Ég hef aldrei komið í bókabúðina hans Bjarna, en hef ástæðu til að halda að hún sé ekkert frábrugðin öðrum bókabúðum. Og algjör óþarfi að nota málgalla sem er lítt áberandi til að gera grín að honum. Ég er ekki framsóknarmaður en svona skrif þjóna engum tilgangi hver sem á í hlut .

Kveðja

[Sævar Einarsson, 28.3.2008 kl. 16:27]

Reyndar er Glitnir alveg óskyldur gamla Íslandsbanka sem fór á hausinn fyrir hálfri öld ef ekki meira, Glitnir ef ég man rétt er stofnaður upp frá Alþýðubankanum og Iðnaðarbankanun en já Bjarni hefur oft á betri spretti en þennann.