RÚV skrúfar frá slorkrananum

Ríkisútvarp fiskveiðiþjóðarinnar - þar sem nálægt því önnur hver króna sem kemur í kassann vegna vöruútflutnings er vegna fiskveiða - einkennist enn meira af kranafréttamennsku þar sem skrúfað er frá fréttum héðan og þaðan í heiminum gagnrýnislaust. Skemmst er að minnast þess þegar Ríkisútvarpið skrúfaði frá falsvísindum um að allur fiskur í heimshöfunum yrði uppurinn 2048 og sneri síðan við fréttum af skyndilegri þorskþurrð við Kanada upp úr 1990 þar sem bent var á að breyttar umhverfisaðstæður hefðu verið ein meginorsökin fyrir minni þorskveiði og að veiði hefði verið ofmetin. Í seinna tilfellinu neitaði Ríkisútvarpið að leiðrétta ranga frétt sem verður að segja að er stórundarlegt. Ég benti Páli Magnússyni á missögnina en hann hefur kannski verið upptekinn við bílaþvott, a.m.k. lét hann sér mistökin í léttu rúmi liggja. Kannski hitti ég illa á hann - eða kannski er hann bara hrifinn af krananum.

Í fréttum í hádeginu var enn á ný skrúfað frá og sagt frá breskum sjávarútvegi, greint frá vandræðum enskra smábátasjómanna og kvæðinu síðan vent í kross og greint frá uppgangi við Peterhead í Skotlandi þar sem aflaverðmæti var sagt hafa tvöfaldast á síðustu fimm árum. Þessar fréttir komu mér verulega á óvart vegna þess að þorskveiðin hefur verið skorin gríðarlega niður í Skotlandi,  ef ég man rétt fór ICES fram á þorskveiðibann og enn meiri niðurskurð á aflaheimildum á síðustu árum, annað hvort þorskveiðibann eða enn meiri niðurskurð heilt yfir.

Ég gæti sem best trúað því að þessi aflaaukning í höfninni í Peterhead stafi fyrst og fremst af auknum veiðum stærri skipa á uppsjávartegundum, s.s. makríl og kolmunna, og hafi lítið að gera með að vera sett í tengsl við veiðar smábáta.

Ég hef á tilfinningunni að gagnrýninni og góðri fréttamennsku um sjávarútvegsmál hafi hrakað verulega eftir að menntamálaráðherra tók þá ákvörðun að leggja niður þáttinn Auðlindina sem var sérstakur fræðiþáttur um þessi mál.

Athugasemdir

[Grétar Rögnvarsson, 25.3.2008 kl. 14:37]

Alveg er þér hjartanlega sammála Sigurjón, þær fréttir sem koma í Ruv af sjávarútvegsmálum  eru oft furðulegar og illa ígrundaðar, já og þetta með auðlindina þetta var sá þáttur sem allir sjómenn og fólk í sjávarbyggðum hlustaði á, og beið eftir, það er nú ekki sparað á öllum sviðum sýnist manni hjá Ruv, en mér skilst að auðlindin hafi verið svo dýr þáttur, það er allavega sú skýring sem maður hefur fengið.

[Stefán Bogi Sveinsson, 25.3.2008 kl. 18:29]

Þú sem sagt veist ekkert um málið, en gagnrýnir samt fréttina!

[Sigurjón Þórðarson, 25.3.2008 kl. 19:39]

Stefán Bogi 

Jú jú ég tel mig vita eitt og annað og gæti þess vegna tekið upp tólið og slegið á ágætan kunningja sem er formaður samtaka útvegsmanna sem eru mjög  gagnrýnin á sjávarútvegsstefnu Evrópusambandsins.

Ég reikna með að 70 til 80% af því magni sem landað er í Peterhead sé uppsjávarfiskur sem hækkað hefur gríðarlega í verði og slatti er skelfiskur og humar en það er búið að vera að stýra "hvítfiskveiðimönnum" í humar.  Það að tengja misáreiðanlegar löndunartölur í höfninni í Peterhead  við afkomu enskra smábátasjómanna þ.e. undir 10m  er út í hött.

[Jóhann Kristjánsson, 26.3.2008 kl. 09:44]

Rúv er handónýtt málgagn siðblindra og spilltra ákveðinna pólitískra afla í þjóðfélaginu. Ég myndi treysta svöngum ísbirni betur en rúv.

[Örvar Már Marteinsson, 26.3.2008 kl. 11:23]

Ég veit ekki með Peterhead en ég er hjartanlega sammála því að fréttaflutningnum hafi farið hrakandi eftir að auðlindin var tekin af dagskrá. Það var í raun algerlega óskiljanlegt af ríkisfjölmiðli, sem á ekki að hafa gróðasjónarmið að leiðarljósi heldur þjónustu, að þátturinn skuli hafa verið sleginn af. Hann var á Rás 1 og menn sem vildu hlusta stilltu bara inn á hann þannig að hann truflaði ekkert þá sem vildu halda sínu striki og hlusta á hina venjulegu síbylju.

Nei, Leiðarljós og leðurtuðruspark var látið ganga fyrir.

[Hafsteinn Viðar Ásgeirsson, 27.3.2008 kl. 21:55]

Það er nú mála sannast, að það eru svo sárafáir menn á fjölmiðlunum yfir höfuð sem eru færir um að sinna fréttum af sjávarútvegsmálum. Það er kannski einna helst á DV. Á mogga höfum við Hjört sem oftar en ekki virkar eins og starfsmaður frá Samherja eða LÍÚ, en hefur talsverða þekkingu. Hitt er bara allt útá túni hvað varðar fréttir af sjávarútvegsmálum...