Jarðbundinn stjörnufræðingur

Ég var að hlusta á Gulla stjörnufræðing tala um efnahagsmál á Rás 2 í dag. Hann hafði ýmislegt til málanna að leggja og var mjög jarðbundinn. Hann var nokkuð ósáttur við fjármálamógúlana sem hafa magnað upp góðærið en eru núna að draga upp svarta mynd af stöðu mála.

Ráð Gulla voru að mörgu leyti skynsamlegri en ýmissa annarra sem hafa látið sig málið varða, s.s. ungu sjálfstæðismannanna Bjarna og Illuga sem vildu hleypa verðbólgunni á hraðara skeið en verið hefur og samfylkingarmannanna sem halda að eina ráðið sé að skipta um mynt þó að allir ættu að vita sem eitthvað kynna sér málið að ekki er í myndinni að taka upp evru nema ná fyrst efnahagslegum stöðugleika.

Ég held að margt væri vitlausara en að Gulli yrði ráðinn í Seðlabankann með Davíð Oddssyni og Halldóri Blöndal sem fulltrúi hins jarðbundna Íslendings til að koma skikki á fjármálin.

Athugasemdir

[Steinn Hafliðason, 1.3.2008 kl. 17:41]

Sæll Sigurjón,

Gaman að heyra að Gulli var í útvarpinu, afar gáfaður náungi þar á ferð. Hvenær var dag var hann í útvarpinu?

[Sigurjón Þórðarson, 1.3.2008 kl. 18:13]

Gulli veit sínu viti en hann var um hádegið á Rás 2.

[Steinn Hafliðason, 1.3.2008 kl. 18:37]

Þakka þér fyrir þessar upplýsingar.

[Herbert Guðmundsson, 1.3.2008 kl. 21:38]

Síðan hvenær er Gulli stjörnufræðingur? Síðast þegar ég vissi titlaði hann sig stjörnuspeking, sem er allt annar handleggur. En auðvitað geta jafnt stjörnufræðingar og stjörnuspekingar verið jarðbundnir, eftir atvikum, alla vega í göngulagi.

Helsta tenging þeirra við Seðlabankann gæti verið að ná sambandi við stjörnurnar innan úr svarta kassanum á Kalkofnsvegi 1 - eða er það ekki númer eitt? Jú, búinn að fletta því upp, meira að segja líka 101! En hver kann á þennan svarta kassa? Það er málið.

[Guðrún María Óskarsdóttir., 2.3.2008 kl. 03:12]

Sæll Sigurjón.

Gulli veit hvað hann syngur hvar og hvenær sem er.

kv.gmaria.

[Jóhann Elíasson, 3.3.2008 kl. 18:01]

Já, það er öruggt að Gulli yrði mun betri í Seðlabankanum en Davíð og fleiri en ég held að til þess yrði Davíð að "fara" því að mínum dómi getur enginn sem er með einhvern smá snefil af "sjálfstæði" unnið með Davíð Oddssyni.                                

[Steinn Hafliðason, 3.3.2008 kl. 21:09]

Smá misskilningur hjá mér, hélt að þú værir að tala um þennan Gulla sem er með doktorsgráðu. Ég þekki ekkert til Gulla stjörnuspekings. Takk samt

[Steinn Hafliðason, 3.3.2008 kl. 21:10]

doktorsgráðu í stjarneðlisfræði auðvitað

[Jens Guð, 6.3.2008 kl. 11:43]

  Davíð Oddsson er ekki minni stjörnuglópur en Gulli.  Bara öðruvísi.