Dindill LÍÚ var á fréttavakt Stöðvar 2 í kvöld

Stöð 2 hefur að undanförnu fjallað með furðulegum hætti um svokallað skötuselsfrumvarp sem felur í sér smávægilegar breytingar á umdeildri fiskveiðilöggjöf.  

Í stað þess að Stöð 2 hafi sett málið í samhengi við hvort breytingin kæmi á móts við jafnræði þegnanna og álit mannréttindanefndar Sameinuðu þjóðanna um brot á á atvinnuréttindum sjómanna, þá hafa lagabreytingarnar verið matreiddar eftir uppskriftum úr kokkabók LÍÚ.

Í kvöld var kynntur til sögunnar „aflakóngur“ smábáta, Arnar Þór Ragnarsson, sem tók það sérstaklega fram einhverra hluta vegna að hann hefði ekkert á móti Pólverjum. Boðskapur Arnars var í stuttu máli sá að örlitlar breytingar á stjórn fiskveiða í átt til álits mannréttindanefndar Sameinuðu þjóðanna fæli í sér gríðarlegt óréttlæti og óhagkvæmni.

„Fréttamaður“ Stöðvar 2 sá ekki ástæðu til þess að draga þá staðreynd fram að útgerðarfélagið Nóna sem gerir út aflatrillu aflakóngsins hefur að sögn Fréttablaðsins ekki verið rekið með hagkvæmari hætti en svo að félagið stóð í sérstökum viðræðum við banka vegna ofurskuldsetningar tveggja trilla félagsins. Skuldirnar námu í lok árs 2008 5,3 milljörðum króna en félagið tapaði á því ári 2,5 milljörðum. 

Félagið Skinney-Þinganes á 98% hlut í útgerðarfélaginu Nónu en það er vel hægt að rökstyðja að það félag hafi í gegnum tíðina notið pólitískra tengsla við útfærslu reglna við stjórn fiskveiða. 

Stöð 2 sá enn og aftur enga ástæðu til þess að taka það fram að breytingunum er ætlað að mæta breyttu veiðimynstri og auka veiðiheimildir hér fyrir norðan og vestan.

Stöð 2 fjallaði heldur ekki um að það er ekki verið að taka veiðiheimildir af neinum heldur auka þær og aukningin mun skila þjóðarbúinu tekjuaukningu í erlendum gjaldeyri upp á vel á annan milljarð króna árlega og beinar tekjur ríkisins aukast um 240 milljónir króna.

Mér finnst þessi fréttaflutningur með ólíkindum og ekki síður að enginn fjölmiðill skuli fjalla með gagnrýnum hætti um forsendur kvótakerfisins sem átti að skila auknum afla. Eftir áralanga stjórnun með aflakvótum er niðurstaðan endalausar deilur, brottkast og síminnkandi afli. Þorskaflinn nú er rétt um þriðjungurinn af því sem hann var fyrir daga kvótakerfisins og meira að segja einungis helmingurinn af því sem hann var á árabilinu 1918 til 1950.

Athugasemdir

[Jóhannes Laxdal Baldvinsson, 19.1.2010 kl. 04:24]

Sigurjón, hvaða hvaða. Afhverju ertu að andskotast út í Sjónvarpsstöð sem sýnir þó alla vega lit og fer út á land og talar við fólkið.  Ertu ekki sammála að það hefur lengi vantað að raddir hins vinnandi manns heyrist? Mér fannst þessi frétt fín. Þessi skipstjóri færði gild rök fyrir gagnrýni sinni á hógværan hátt. Benti á mismunun án þess að ráðast með gífuryrðum á sjavarútvegsráðherra sem er meira en hægt er að segja um marga aðra.

[Sigurjón Þórðarson, 19.1.2010 kl. 09:15]

Jóhannes sjónvarpsstöðin dregur ítrekð fram mjög bjagaða mynd af þeim smávægilegu breytingum sem til stendur að gera á illræmdu kvótakerfi.

Í fyrsta lagi þá stunda umræddir línubeitningabátar ekki skötuselsveiðar en veiðin á línu á fisknum er hverfandi. Þess vegna er þetta píp um óréttlæti og óhagkvæmni  illskiljanleg.

Varðandi málflutning skipsstjórans að öðru leyti, þá finnst mér gagnrýni hans koma um hagkvæmni koma úr allra hörðustu átt eins og ég benti hér að ofan þá er hvíla á útgerðinni nokkurra milljarða kúlulán sem að öllum líkindum lenda að stórum hluta á almenningi að greiða.

Það er í sjálfu sér ekkert sem bannar útgerðinni að róa að fyrir vestan eða norðan til þess að nýta umræddan leigukvóta sem er til skipta en aukning á leigukvóta verður líklega til þess að lækka verðið á leiguverði fyrir sunnan þannig að breytingin mun einnig koma þeim til góða sem róa frá Suðurlandi.

[Vilhjálmur Jónsson (IP-tala skráð) 19.1.2010 kl. 09:16]

Góðan dag Sigurjón.

Ekki vil ég blanda mér í þessa umræðu um sjónvarpsviðtalið, finnst reyndar ekki mikið til um gífurorðatón þinn.

Hinsvegar þótti mér sérstakt að lesa ræðu Jóns ráðherra á ráðstefnu um laxamál í Frakklandi, en hún er birt á vef ráðuneytisins.

Þar nefnir ráðherrann Ragnar SF sem dæmi um dugnað íslenskra fiskimanna og segir 2 menn þar um borð hafa veitt 1370 tonn á sl fiskveiðiári. Nú vita menn sem á sjó eru að áhafnir þessarra vélabáta telja 4 menn minnst.

Er óvitaskapur ráðherrans viðlíka í flestum málum?

Með kveðju, Vilhj

[Ursus, 19.1.2010 kl. 13:24]

Hressilegur pistill. Fínt að brjóta kvótakerfið aðeins upp. LÍÚ Friðrik er búinn að rembast heilmikið fyrir útgerðarauðvaldið, en tekist þannig til að hann verður að sigla heim!

[Jóhannes Laxdal Baldvinsson, 19.1.2010 kl. 17:15]

Vilhjálmur, Ég tel næsta víst að vanþekking Jóns Bjarnasonar á sjávarútvegsmálum sé mikil. Þessvegna var Guðjón Arnar ráðinn honum til halds og trausts að undirlagi Steingríms J.  Að Addi Kitta Gau skuli hafa byrjað uppstokkun kvótakerfisins á Skötuselskvóta fyrir vin sinn Grétar Mar er bara skrýtið. Hver getur gert út á skötusel án þess að eiga kvóta í öðrum fisktegundum? Og leigukvóti er í dag ófáanlegur. Ergó, þeir sem ætla að gera út á skötuselinn, sem vinur og flokksbróðir var svo góður að redda, verða að fleygja öllum meðafla í sjóinn.

Ég er ekki að tala máli kvótabraskara, fjarri því, en mér finnst skipta miklu að vel sé að breytingum staðið.  Nær væri fyrir ráðherrann að gera breytingar á flokkun fiskiskipa og hvar þau mega veiða. Það er t.d. ótækt að þessi litlu togskip undir 26 metrum fái að veiða uppað 3 mílum. Þessi skip eru jafnöflug og stórir togarar uppað 500 brúttó tonnum. Eins er með þessa hraðfiskibáta eins og Ragnar SF, sem fjallað var um hér að ofan. Sá bátur á ekki heima í smábátakerfinu.