Einsmálsflokkurinn

Fjórflokkurinn er í sárum. Eitthvað eru framsóknarmenn þó að leggja fram sín hefðbundnu yfirboð, s.s. 900 milljarða afskriftir, og trompa þannig 90% lánin sín sem slógu út fíkniefnalaust Ísland fyrir árið 2000. Sjálfstæðisflokkurinn er eins og hauslaus hæna sem boðar lækkun stýrivaxta á sama tíma og að maðurinn sem alltaf hefur rangt fyrir sér, a.m.k. alltaf þegar efnahagsmál ber á góma, sbr. jöklabréfin og styrk bankanna, og líka varðandi atvinnuleysistölur í kjölfar hrunsins. Tryggvi Þór Herbertsson segir að stjórnmálamenn eigi ekki að skipta sér af vaxtastiginu - sem þó er helsta kosningamál flokksins hans!

Það er helst að Vinstri grænir uni glaðir við sitt enda hefur farið fram ein mesta ríkisvæðing á atvinnutækjum einnar þjóðar ef frá eru taldar ríkisvæðingar sem fylgt hafa blóðugum byltingum.

Samfylkingin er með sitt eina mál á dagskrá, Evrópusambandið, þó að hér gangi þúsundir manna um án atvinnu, ríkissjóður sé galtómur og algjört kerfishrun blasi við. Flóttinn frá raunveruleikanum er að ræða Evrópusambandið í gríð og erg, það er engu líkara en að forystumenn telji að með því að setja umsóknareyðublað í póst hverfi öll vandamál þjóðarinnar eins og sjóðir bankanna skömmu fyrir októberhrun. Árni Páll, Björgvin og Katrín Júlíusdóttir tala reyndar svo flókið mál þegar Evrópuumræðan hitnar skil ég, saklaus sveitamaðurinn, varla hvað er í gangi en þykist merkja á látbragði þeirra að þau ræði öll heimsins gæði - að eigin mati. 

Í dag var ég svo heppinn að fá tækifæri til að ræða við nokkra girðingarverktaka frá Borðeyri og það sem þeir höfðu áhyggjur af, og stjórnmálaklúbburinn hefur greinilega ekki, er hvernig á að fylla í 150 milljarða fjárlagagatið. Þeir voru nokkuð skotnir í því að fara yfir tillögur Frjálslynda flokksins um að veiða meiri fisk enda sætir tíðindum ef trilla sést við innanverðan Húnaflóa.

X-F

Evrópustefnan verði á hreinu

Athugasemdir

[Gunnlaugur B Ólafsson, 20.4.2009 kl. 23:12]

Sigurjón - Þetta kemur nú úr óvæntri átt að einn flokkur taki út mál sem að hann leggur sérstaka áherslu á. Það pirrar frjálslynda að það sé aftur að koma þungi í Evrópuumræðuna, því þeir eru ekki búnir að leysa málið með hvernig hér á að bjóða upp á trúverðugan gjaldmiðil fyrir ferðaþjónustu, framleiðslu og atvinnulíf allt.

Hvernig stóð á því að samtök atvinnulífsins skiluðu inn skýrslu með Samfylkingunni ef að evran og samstrfið innan Evrópu er ekki hluti af lausninni í atvinnumálum og fjármálaumhverfi fyrirtækja og fjölskyldna? Með kærri kveðju, G

[Smári (IP-tala skráð) 20.4.2009 kl. 23:14]

Er ekki vinstri stjórnin bara búin?

[Smári (IP-tala skráð) 20.4.2009 kl. 23:17]

Björgvin og Árni Páll eru búnir að útiloka velferðarstjórn með þessu einstrengingslega tali sínu um skjóta umsókn um aðild að ESB. Það er engin sáttum þetta - og þeir ætla sér að reyna að keyra þetta ofan í kokið á Steingrími - rétt eins og þeir gerðu við Geir Haarde.

[Hallur (IP-tala skráð) 21.4.2009 kl. 01:52]

Sigurjón. Einsmálsflokkurinn Frjálslyndir eru að tryllast úr pirringi vegna þess að Samfylkingin er gjörsamlega búin að stela sviðinu í sjávarútvegsmálunum: Eina máli Frjálslyndra! Frjálslyndi flokkurinn er núna einskismálsflokkurinn. Til hamingju með það og njóttu síðustu kosningabaráttu flokksins.

[Sigurjón Þórðarson, 21.4.2009 kl. 06:41]

Frjálslynd eru í góðum gír en mér sýnist sem að ég hafi óvart komið við viðkvæman streng hjá Samfylkingunni.

Hvað varðar þá fullyrðingu að Samfylkingin hafi stolið sviði sjávarútvegsins þá er það einfaldlega staðreynd að oddviti Samfylkingarinnar Guðbjartur Hannesson hefur aldrei flutt ræðu um sjávarútvegsmál á Alþingi og hvað þá flutt þingmál um sjávarútvegsmál.

 Fyrir þá sem efast um þá fullyrðingu mína þá er hægt að ganga úr skugga um að svo sé.

[Sigurjón Þórðarson, 21.4.2009 kl. 06:43]

Störf oddvita Samfylkingarinnar í Norðvesturkjördæmi!

[Hallur (IP-tala skráð) 21.4.2009 kl. 17:43]

sigurjón þórðarson: guðbjartur hannesson er ekki eini maðurinn í samfylkingu þó að þú virðist halda það. hann hefur heldur ekki verið sá sem fer með forystuna í sjávarútvegsmálum flokksins. það ættirðu að vita kjáninn þinn. þú veist vel hvernig samfylking ætlar að standa að breytingum á kerfinu og hverjir það eru sem tala fyrir flokkinn í þessum málum. það eina sem þið í frjálslynda flokknum getið er að falsa skoðanakannanir sem sýna ykkur sjálfa með þrefalt meira fylgi en óháðar kannanir sýna. aumkunarverðar aðferðir og munu ekki virka.

[Sigurjón Þórðarson, 21.4.2009 kl. 23:26]

Hallur ertu ekki í góðu skapi?