Bretar hæstánægðir með Íslendinga

 Mikinn skugga hefur borið á samskipti Íslendinga og Breta vegna bankaklúðurs sem skrifast að miklu leyti á Samfylkingu og Sjálfstæðisflokk. Það er því virkilega ánægjulegt að sjá jákvæðar fréttir frá Bretum. Á BBC-vefnum er Íslendingum fagnað sérstaklega þar sem þeir eru byrjaðir að sigla aftur með fisk til Grimsby og fá í staðinn beinharðan gjaldeyri, kannski til að borga eitthvað af þessu Icesave-rugli til baka.

 Það er alveg víst að ef Frjálslyndi flokkurinn kemst í stjórn sjávarútvegsmála í kjölfar kosninganna mun það leiða til stóraukinna veiða og siglinga með fisk sem mun ekki einungis gleðja Breta og íslenska sjómenn, heldur verða búhnykkur líka fyrir þorra landsmanna.

Athugasemdir

[Haraldur Baldursson, 24.3.2009 kl. 15:29]

Siglum út úr þessum vanda á fiskveiðiflotanum, veiðum meira og vinnum okkur út úr þessari kreppu

[Róbert Tómasson, 24.3.2009 kl. 15:34]

Heill og sæll Sigurjón og takk fyrir síðast.

Bretar eru almennt heiðarleg og vinnusöm þjóð og þess vegna hljóp hland fyrir hjartað á þeim þegar hópur íslenskra útrásar smá krimma, reyndi að hafa af þeim fé.

Fátt er heiðarlegra og göfugra en að handsala sölu á íslenskum fiski á hafnarbakkanum í Grimsby, prufaði það sjálfur fyrir mörgum árum þegar ég var í siglingum og þetta kunna bretar að meta.

Það mun taka tíma en þetta er einmitt ágætis  leið til þess að ávinna okkur traust og virðingu aftur í bretlandi.

kveðja Róbert

[Jakob Þór Haraldsson, 24.3.2009 kl. 16:40]

Frekar augljóst að Frjálslyndi flokkurinn mun ekki fá einn þingmann í næstum kosningum.  Formaðurinn er þvi miður búinn að fá frítt spil til að rústa flokknum.  Vildi óska þess að flokknum hefði borið gæfa til að virkja t.d. þig & aðra betur í flokknum...  Reynist ég sannspár, þá vona ég að þið sem eruð í flokknum sjáið til þess eftir kosningar að Guðjón axli ábyrgð og hætti í stjórnmálum.  Maðurinn er "sjúkur í víðasta skilningi þess orðs" og mjög sorglegt hvernig farið hefur fyrir flokknum.

[Guðrún Hlín (IP-tala skráð) 24.3.2009 kl. 20:46]

Mín skoðun er sú að okkar aðal áhersla eigi að vera sú að skaffa 'Islensku landvinnslu fólki alla þá vinnu sem kemur úr sjó.Við eigum ekki að vera hráefnisskaffarar fyrir Breta né aðra en okkur sjálf.Engar aðrar þjóðir mundu haga sér eins og við höfum gert gagnvart fiskvinnslufólki.

[itg (IP-tala skráð) 24.3.2009 kl. 23:20]

Hvað ertu að meina?.  Breytist skoðun breta þó við seljum nokkra þorsktitti í Grimsby??.   Og heldur þú í alvöru að breska þjóðin hafi einhverja slæma skoðun á okkur í raun og veru.  Hún hefur nóg með sína fjármálasnillinga.  Þeir hafa verið miklu snaggaralegri en okkar. Bretar prenta pund sem aldrei fyrr og vita vel að það kemur að greiðsludegi.

[Sigurjón Þórðarson, 25.3.2009 kl. 00:20]

itg, ég var að benda á jákvæða frétt og lítið annað.

Guðrún, því miður er búið að koma málum svo fyrir að þetta er helsta leiðin nú um stundir til að selja fisk og fá þokkalegt verð fyrir hann.

Það er vert að velta fyrir sér að ef þorskveiðin væri svipuð og fyrir daga kvótakerfisins og aukningin væri öll notuð hér innanlands væri um meira magn að ræða í innlenda vinnslu þótt allur fiskur sem nú er landað væri fluttur beint út til útlanda.

[Árni Gunnarsson, 25.3.2009 kl. 00:26]

Framsóknarflokkurinn og Vinstri grænir eru búnir að halda sína landsfundi með glæsibrag. Að visu skiluðu báðir auðu í afstöðunni til kvótakerfisins og aukningar á aflaheimildum til smábáta á grunnslóð. Báðir eru sáttir við að mannlífið í sjavarþorpunum sé á uppboðsmarkaði LÍÚ.

Nú eiga Sjálfstæðisflokkur og Samfylking eftir að halda sína landsfundi og nú kemur brátt í ljós hvort þessir flokkar skilja hvaða lausnir eru nærtækastar til að byggja upp blómlegt atvinnulíf á landsbyggðinni.

Skila þeir líka auðu?

Endilega farið á síðuna hans Sigga Þórðar og horfið á Kastljósþáttinn frá 2007 um reynslu Færeyinga af kvótakerfinu. Horfið á þetta með athygli og horfið svo á það aftur á morgun. 

Færeyingar prófuðu kvótakerfið og hugsa til þess í dag með hryllingi. Þeir kölluðu til Jón Kristjánsson fiskifræðing sem Hafró gat ekki notað. Þetta var árið 2000 og síðan þá hafa Færeyingar notað sóknarkerfið og brottkast á fiski þekkist ekki lengur í Færeyjum og þeir segja:

-Allt sem Jón Kristjánsson hefur sagt frá árinu 2000 reyndist rétt, 100% rétt. Allt sem hinir fiskifræðingarnir sögðu reyndist rangt. 

[ThoR-E, 25.3.2009 kl. 07:40]

Veiddu Færeyingar ekki sig út úr kreppunni sinni .. á sínum tíma.

Ég man ekki betur.

[Sigurjón Þórðarson, 25.3.2009 kl. 09:20]

Ace, þeir gerðu það en mér finnst merkilegt að fylgjast með innlendum fjölmiðlum og þá er nánast enginn undanskilinn en það virðist eiga slá þögn um mannréttindabrotinn og hið augljósa að Færeyingar veiddu sig út úr kreppunni og hafa ekkert farið eftir niðurskurðartillögum þarlendra reiknisfiskifræðinga með þeim árangri að aflbrögð eru mjög góð efti áralanga umframveiði.

[Róbert Tómasson, 25.3.2009 kl. 10:09]

Margir góðir punktar komið fram hérna, ég vill fá að nota tækifærið og benda Guðrúnu Hlín á að gríðarlega stór hluti fiskvinnslufólks hér er innflutt vinnuafl sem skilar aðeins litlum hluta tekna sinna í veltu á innlendum markaði þar sem íslendingar fást ekki til fiskvinnslustarfa.

Fiskvinnslufyrirtæki eitt hér í Grindavík hafði um daginn, þrátt fyrir atvinnuleysi, ekki fengið eina einustu atvinnuumsókn frá íslendingum frá áramótum, en hins vegar allnokkrar frá útlendingum sem allir fengu vinnu.