Veit Björgvin G. Sigurðsson af þessari jólahótun Íslenskra verðbréfa?

Ég er ekki svo „heppinn“ að eiga mikinn sparnað, en það vill svo til að Norðlendingur einn sem ég þekki hefur lagt fyrir fé og sýnt ráðdeildarsemi. Ég fékk að sjá svakalegt bréf frá Íslenskum verðbréfum þar sem Norðlendingnum er stillt upp við vegg og honum „boðið“ að þiggja 71% af því sem hann hafði upphaflega lagt inn í sjóðinn og tapa þar með 29% af inneign sinni auk vaxta í heilt ár.

Mér finnst tilboðið vafasamt, m.a. í ljósi þess að viðtakanda er gefinn einungis 10 daga frestur til að stökkva á þetta „kostaboð“, ella er undir hælinn lagt hvað hann fær ef hann gengur ekki að boðinu með hraði. Um leið og hann gengur að boðinu verður hann að falla frá frekari kröfu ef meira reynist í sjóðnum þegar fram líða stundir.

Það sem er í öllu falli ljóst í mínum huga er að tilboðið og framkoman gagnvart viðskiptavininum er alls ekki í anda laga nr. 108/2007, um verðbréfaviðskipti, sem ganga út á að tryggja minni viðskiptamönnum ríkari neytendavernd gagnvart fjármálafyrirtækjum, s.s. með haldgóðum upplýsingum, og tryggja jafnræði og viðeigandi ráðgjöf. Reyndar má segja um framkomu allra bankanna gagnvart viðskiptavinum á síðasta ári að hún stangast á við framangreind lög. Ástæðan fyrir þessari auknu neytendavernd er að ekki er hægt að gera ráð fyrir því að sparifjáreigendur vakti sjóðina frá degi til dags eins og um fagfjárfesta væri að ræða. Það er rangt að halda viðskiptavinum í myrkrinu og gefa þeim aðeins rúmlega viku til að taka afdrifaríkar ákvarðanir sem varða stóran hluta ævisparnaðarins.

Og það er leitt að fjármálafyrirtækin virðast ætla að halda þessum viðskiptaháttum áfram.

Það eina sem Íslensk verðbréf hafa sér til málsbóta er að ríkið hefur enn sem komið er ekki lagt neina fjármuni í púkkið, enda var engin vonarstjarna Sjálfstæðisflokksins mér vitanlega í stjórn þessa sjóðs.

Athugasemdir

[Berglind Steinsdóttir, 18.12.2008 kl. 23:23]

Og til að kóróna mismununina ætlar skilanefnd Landsbankans að fella niður hluta þeirra krafna sem bankinn hefur á sjávarútvegsfyrirtæki vegna gjaldeyrisskiptasamninga.

[Óskar Þorkelsson, 18.12.2008 kl. 23:43]

Þetta var kallað fjárkúgun í gamla daga

[Skattborgari, 19.12.2008 kl. 00:24]

Það er ekki sama hver er. Ætli sá peningur sem verður ekki borgaður út þarna verði kannski notaður til að niðurfella hluta af skuldum sjávarútvegsins? Einhverjir þurfa víst að greiða þær á endanum.

Það er ótrúlegt þetta svínarí með bankana.

Kveðja Skattborgari.

[sigurvin (IP-tala skráð) 19.12.2008 kl. 02:40]

Alhyglisvert þetta með sjalfstæðismenn og stjórnir sjóðanna. En þarf ekki að útskýra þetta betur?

[Guðrún Hlín (IP-tala skráð) 19.12.2008 kl. 09:26]

Það er ömulegt að sitja áfram í RÁÐHERRASTÓL og sofa ÞYRNIRÓSASVEFNI.Kveðja G H A.

[Jóhann Elíasson, 19.12.2008 kl. 09:34]

Sukkið og svínaríið er með ólíkindum.  En það virðist ekki vera vilji til þess að taka á neinu, maður fer nú að halda að það sé eitthvað til í þessum tölvupósti sem gengur manna á milli þessa dagana.

[Þráinn Kristinsson (IP-tala skráð) 19.12.2008 kl. 10:19]

Þjófnaður.

[Jón Snæbjörnsson, 19.12.2008 kl. 11:13]

sorglegt ef rétt

[ThoR-E, 19.12.2008 kl. 11:46]

Þetta er alveg ótrúlegt og sýnir bara hverskonar siðferði er og hefur verið í þessum geira.

Ekki skrítið að efnahagskerfi landsins sé komið á hliðina.

[Ljónsmakkinn (IP-tala skráð) 19.12.2008 kl. 13:16]

Ég get alveg fullvissað þig um það að Björgvini G. Sigurðssyni er ekki kunnugt um þetta!

[Guðrún Hlín (IP-tala skráð) 19.12.2008 kl. 14:50]

Enda sefur hann.

[Berglind Steinsdóttir, 19.12.2008 kl. 16:18]

sigurvin, mér sýnist þingið kalla eftir því sama og þú gerir.

[Matthías Kristinsson (IP-tala skráð) 19.12.2008 kl. 16:21]

Mikið eruð þið Norðlendingar heppnir að fá þó 71% af innleggi ykkar til baka úr verðbréfasjóði. Ég lagði 150 þúsund krónur inn á Úrvalsvísitölusjóð Kaupþings fyrir hvert 6 barnabarna minna og átti þetta að verða menntasjóður fyrir þau þegar fram í sækir. Þegar lokað var fyrir viðskipti í sjóðnum stóð innistæðan í 75.234 krónum. Það var ekki hægt að taka út. Í meðförum skilanefndarinnar lækkaði þessi upphæð og fást nú aðeins 8.555 krónur greiddar, eða um 5,7% af innlögðum peningum. Það versta var að maður tók alltof mikið mark á Geir H. Haarde sem  talaði fram á síðustu stundu um það hve bankarnir stæðu vel, hefðu traustar undirstöður, ríkissjóður væri skuldlaus þó að hann skuldaði 29% af vergri þjóðarframleiðslu, og að allar kornhlöðurnar væru fullar. Og þessum manni ætlum við að treysta til að leiða þjóðina í gegnum hörmungarnar sem hann leiddi okkur í. 

[Berglind Steinsdóttir, 19.12.2008 kl. 16:42]

Matthías, þetta er hroðalegt. Ertu búinn að bíta úr nálinni með þetta?

Nú er altalað að endurskoðendur og lögfræðingar hafi líf flestra fyrirtækja í höndum sér en mig grunaði ekki að svona væri komið fyrir fleiri sjóðum. Var þinn lagður út sem áhættusækinn eða þvert á móti öruggur?

Við getum ekki sætt okkur við að misvitrar skilanefndir véli svona með framtíðina.

[Matthías Kristinsson (IP-tala skráð) 19.12.2008 kl. 17:07]

Þegar ég lagði þessa peninga inn fyrir barnabörnin bað ég um að þeir yrðu lagðir á innleggsreikning með hæstu vöxtum. Þjónustufulltrúinn fékk svo að ráða ferðinni sem fagmaður á sínu sviði. Mér sýnist að það sé lítið hægt að gera annað en að lýsa yfir vantrausti á ráðamenn þjóðarinnar, einkum forsætisráðherrann sem án efa hefur dregið fleiri en mig á asnaeyrunum með óábyrgu tali sínu. Hann á auðvitað að sjá sóma sinn í því að segja af sér eða sýna okkur allt kornið sem hann þóttist eiga í kornhlöðum sínum. Kannski hann hafi sent það til mölunar í svikamyllunum og síðan hafi mjölið verið notað til að baka brauðfætur undir þjóðina. Mér finnst að þetta eigi einna best við í dag:

Geir hefur mönnum glapið sýn,

Geir er sjálfumglaður.

Skyldi hann kunna að skammast sín?

Skyldi hann vera maður?

[Stefán Bogi Sveinsson, 19.12.2008 kl. 23:06]

http://stefanbogi.blog.is/blog/stefanbogi/entry/750081/