Boðorð númer eitt: Þú skalt ekki bera ljúgvitni gegn náunga þínum

Íslenska þjóðin hefur haft í vinnu hjá sér norskan hernaðarsérfræðing sem hefur ákaflega góða starfsreynslu hjá sjálfum Glitni banka og það í Noregi. Hann hefur eflaust skilað mjög góðri vinnu en samt er eins og að björgunaraðgerðir ríkisstjórnarinnar misskiljist eitthvað. Ég vil vitna m.a. í samtal við ágæta vinkonu mína, fréttamann hjá BBC, en hún spurði ítrekað af stakri kurteisi og umhyggju hvernig við hefðum það á klakanum. Mátti heyra að hún furðaði sig á því að enginn hefði sagt af sér þrátt fyrir allt sem á undan væri gengið.

Það er rétt að þjóðin spyr hvað virki ekki. Ég hef ekki mikla þekkingu, en þó einhverja, á þeim fræðum sem kallast almannatengsl en frá mínum bæjardyrum séð hefur ríkisstjórnin ítrekað brotið fyrsta boðorðið, þ.e. að segja satt og rétt frá.

Í öðru lagi hefur ríkisstjórnin aldrei virt boðorð númer 2 sem er að biðjast afsökunar. Reglan er sú að betra er að biðjast afsökunar þó svo að ekki hægt sé að rekja neikvæðar afleiðingar beint til verka viðkomandi aðila.

Í þriðja lagi hefur ríkisstjórnin enga áætlun um úrlausn mála en áætlunin sem uppi er nú, þ.e. að greiða Icesave, er allt önnur en sú sem var fyrir viku.

Í öllu þessu fári eru að þroskast alþýðufræði sem ganga út á það hvernig best sé að meta hvenær þau skötuhjúin Ingibjörg Sólrún og Geir séu að segja satt. 

Í þessum fræðum er það ekki talið traustvekjandi Þegar Ingibjörg Sólrún hlær um leið og það stendur upp á hana að svara spurningum en hvað Geir Haarde varðar eiga menn að gjalda varhuga við því þegar hann tekur í munn sér orðin sérstakt og að eitthvað sé rætt.

Greitt af Icesave reikningum

Athugasemdir

[Gunnar Skúli Ármannsson, 22.11.2008 kl. 00:06]

Alltaf góður Sigurjón,

í ríkissjónvarpinu kom greinilega fram að þau sögðu ósatt. Í sjálfu sér trúir maður öllu misjöfnu upp á Sjálfstæðismenn. Hitt er verra með Samfylkinguna. Þau hafa reynt að telja okkur trú um að þau séu svo góð og betri en hinir flokkarnir. Þegar á reynir eru þau alveg jafn miklir stólafíklar. Mottóið er greinilega, allt fyrir stólana og völdin. Því er um að ræða vaxandi trúnaðarbrest á milli ríkisstjórnar og alþýðu þessa lands. Vandamál er að mjög margir þingmenn og ráðherrar hafa setið ansi lengi og eru því í raun vanhæfir. Því þarf algjöra uppstokkun.

[Víðir Benediktsson, 22.11.2008 kl. 00:35]

Reyndar er boðorð nr. 1 "Ég er Guð þinn og þú skalt ekki aðra guði hafa" Bara eins og Davíð sjálfur hafi skrifað þetta en það er önnur saga. 

[Einar Þór Strand, 22.11.2008 kl. 10:13]

Sigurjón ég vona að þú gerir þér grein fyrir að þar sem þú hefur setið á þingi eftir 1990 er þá ertu ekki velkominn í framboð í næstu kosningum.

[Snorri Marteinsson (IP-tala skráð) 22.11.2008 kl. 10:18]

Sæll Sigurjón,

Það er ótrúlegt hvernig komið hefur verið fram við almenning í landinu á undanförnum 6-7 vikum. Talað í kring um hlutina endalaust, ítrekað logið framan í opið geðið á okkur o.s.frv.

Síðan eru þessir blaðamannafundir sér kapítuli út af fyrir sig, yfirleitt kemur ekkert markvert fram á þeim þar sem flest þar sem þar kemur fram hefur lekið í fjölmiðla yfir daginn og fátt kemur á óvart.

Forgangsröðunin er líka frekar sérstök og maður veltir því fyrir sér hvers vegna frumvarp um breytingu á þessum eftirlaunalögum sé ekki látið fara í gegn um nefndir Alþingis. Varðandi forgangsröðun, þá hefði skipt miklu máli á þessum tímapunkti að tilkynna um aðgerðir Ríksstjórnarinnar til að komast á móts við fyrirtækin í landinu eða tilkynna breytingar á ríkisstjórninni og fá inn trausta utanþingsráðherra (t.d. úr viðskiptalífinu).

Að lokum vil ég biðja alla sem þetta lesa, til að skoða myndband þar sem Geir H. Haarde sýnir sitt rétta andlit. Menn sem geta ekki haldið haus fyrir framan umbjóðendur sína og láta stjórnast af ytri aðstæðum, eiga ekki að gegna ábyrgðarstöðum í þjóðfélaginu!

http://gpetur.blogspot.com/

[Sævar Finnbogason, 22.11.2008 kl. 23:38]

Þú ert nú alveg ónýtur í boðorðunum. Þú veist augljóslega ekki að þetta með ljúgvitin er miklu aftar á listanum en hvaða hjátrú er leyfileg og hvernig réttast sé að stunda hana og svo grínið með hvíldardaginn, heiðra foreldra sína og hórdóminn.

Bann við lygum er í áttunda sæti ekki því fyrsta en þér er kanski vorkunn :) Samt er alltaf betra að vísa í hluti sem maður hefur staðgóða þekkingu á.

[Sigurjón Þórðarson, 23.11.2008 kl. 00:08]

Það er rétt að ég er ekki sá fróðasti um þessa bók, Biblíuna, en þó var mér fullljóst að þetta boðorð er ekki það fyrsta í umræddri bók, heldur nr. 8. Eftir lestur minn í almannatengslafræðum sem ég stunda nám í með öðrum fræðum er fyrsta boðorðið að segja aldrei ósatt. Síðan er meira um að biðjast afsökunar, koma með úrlausn o.s.frv.