Illa launar Ólína ofeldið

Ólína Þorvarðardóttir gekk nokkuð hart fram gegn menntamálaráðherra í þætti Sigurjóns M. Egilssonar í morgun en minna fór fyrir gagnrýni á eigin flokksmenn í ríkisstjórninni sem bera sameiginlega ábyrgð á stjórnarathöfum ríkisstjórnarinnar. Þannig er ljóst að Ingibjörg Sólrún Gísladóttir ber jafn mikla ábyrgð á Davíð Oddssyni og hver annar í ríkisstjórninni. Samfylkingin reynir að skjóta sér undan ábyrgð á billegan hátt, s.s. með bókunum á ríkisstjórnarfundum sem standast ekki stjórnskipunarlög.

Úr því sem komið er ætti ríkisstjórnin áður en hún klúðrar öllu til andskotans að fara frá og boða sem allra fyrst til kosninga.

Það kom mér nokkuð á óvart að Ólína skyldi taka Þorgerði Katrínu Gunnarsdóttur sérstaklega út úr breytunni, ríkisstjórn sem öll hefur meira og minna klúðrað málum, Þorgerður, Björgvin, Árni Matt, Ingibjörg eða Geir, í ljósi þess að mér virtist sem Þorgerður Katrín hefði frekar en ekki sýnt Ólínu velvilja í þeim vandræðum sem hún rataði í við stjórn Menntaskólans á Ísafirði.

Ég verð að lýsa mig sammála Ólínu með að Þorgerður ætti auðvitað að stíga af sviðinu en áður stæði það Geir og Ingibjörgu Sólrúnu nær.

Athugasemdir

[Sigurður Þórðarson, 16.11.2008 kl. 15:19]

 Ólína hefur stutt Samfylkinguna og maður hennar tekur þátt í sveitastjórnarmálum. Ólína er skeleggur talsmaður en ekki stjórnmálamaður og  alls ekki bundinn á neinn samtryggingarklafa. Sjálfur tók ég upp slagorð hennar:Burt með spillingarliðið, hvar í flokki sem það stendur!

[Ragnhildur (IP-tala skráð) 16.11.2008 kl. 16:17]

Eftir stendur spurningin "hvers vegna tók Ólína Þorgerði út úr breytunni"?