Einn bankastarfsmaður pottþéttur með starfið

Breytingarnar á Landsbankanum virðast ganga út á að breyta bankanum í einhvers konar sparisjóð. Það er mikil hætta á að mikilvæg þekking hverfi sem langan tíma geti tekið að byggja upp. Maður finnur til með fólki sem missir lifibrauðið og hefur sérhæft sig í störfum sem ekki er að sjá að mikil eftirspurn verði eftir á næstu mánuðum. Það kann þó að breytast hratt.

Skilaboð ríkisstjórnar Samfylkingar og Sjálfstæðisflokks eru nokkuð skýr, starfsmönnum Nýja Landsbankans og öðrum landsmönnum er sagt að standa og snúa bökum saman í efnahagsstorminum en um hvaða aðgerðir á að sameinast er alls óvíst og virðist sem málið snúist fyrst og fremst um að hafa ekki hátt um sofandahátt og skýra pólítíska ábyrgð forsætisráðherra á málinu.

Í miðjum samstöðuvaðlinum hefur Samfylkingin hleypt af stað áróðursherferð gegn stjórnendum Seðlabankans og líkt þeim við gereyðingarvopn og krafist afsagnar bankastjórnar. Markmiðið virðist vera að leita að blóraböggli og gera upp gamlar pólitískar sakir. Nú heyrast þær raddir að Kaupþing hafi fallið vegna yfirlýsinga seðlabankastjórans í Kastljósviðtali. Ég tel það af og frá, stjórnvöld fóru í mjög harkalegar aðgerðir gegn lánardrottnum Glitnis og Landsbankans og öllum mátti ljóst vera að þær gætu skaðað Kaupþing sem og síðar kom á daginn. Bresk yfirvöld ákváðu að bregðast við í stað þess að vera tekin í bólinu.

Einhverra hluta vegna neitar ríkisstjórnin algerlega að horfast í augu við eigin ábyrgð. Hvers vegna hefur ríkisstjórn Samfylkingar og Sjálfstæðisflokks ekki gert neitt þegar öllum er búið að vera fullljóst um langt skeið að hávaxtastefna bankans væri ekki að virka? 

Ekki finnst mér ólíklegt að sá bankastarfsmaður sem er í hve öruggasta djobbinu sé Davíð Oddsson en til þess að hreyfa við karli þarf líklegast að sprengja ríkisstjórnina.  

Um 500 missa vinnuna

Athugasemdir

[Elín (IP-tala skráð) 9.10.2008 kl. 13:28]

Þeir sem eftir eru verða boðin "ríkislaun"

[Árni Gunnarsson, 9.10.2008 kl. 22:23]

Sigurjón: Reiðin er afar sterkur þáttur í frumeðli manna og dýra. Reiðin elur af sér ósjálfráð viðbrögð hjá dýrum og hjá okkur mönnum er hún hættuleg þegar hún kemst yfir ákveðin mörk og tekur öll völd. Ég teldi það mikið slys í viðbót við langa pólitíska slysaröð ef ekki yrði brugðist við þeirri ógnarbylgju reiðinnar sem nú flæðir yfir okkar samfélag.

[Björn Heiðdal, 9.10.2008 kl. 23:17]

Hvaða mikilvægu þekkingu ertu að tala um?  Ertu kannski að tala um þekkinguna  "Hvernig eyði ég milljón á mánuði í flotta bíla og hús."

[Sigurjón Þórðarson, 9.10.2008 kl. 23:49]

Nei nei ég var ekki að tala um það Björn en það stóð til að stroka út heilu deildirnar sem sjá um erlend viðskipti en mér skilst að það sé búið að endurskoða þá ákvörðun.

[Björn Heiðdal, 10.10.2008 kl. 22:48]

Ef það var málið þá er hér eitthvað plott í gangi til að gera þjóðina alveg bjargarlausa.  Kannski er bara málið að senda okkur í gjörgæslu til IMF og selja síðan síðustu eignir þjóðarinnar fyrir smá gjaldeyri.  Nammi, namm.