Gríðarlega hátt verð

Nú er ljóst að ríkið leggur Glitni til 84 milljarða en bankinn hefur verið gullnáma stjórnenda sem hafa mokað milljörðum í eigin vasa í gegnum siðlausa kaupréttarsamninga. Eigendur bankans hafa stundað það að lána sjálfum sér og skáka sjóðum bankans í fyrirtæki sem ekkert hafa gefið af sér nema feita samninga fyrir stjórnendur fyrirtækjanna, s.s. Fl.

Það er rétt að halda því til haga að Geir Haarde og Árni Mathiesen hafa miklu frekar mært framgang fjármálafyrirtækjanna en hitt á síðastliðnum árum og fjármálaráðherrann sjálfur hagnast vel vegna sölu á stofnbréfum í Sparisjóði Hafnarfjarðar.

Verðið 84 milljarðar fyrir 75% hlut í Glitni er gríðarlega hátt ef mið er tekið af því að ríkið seldi FBA  á 14,4 milljarða en FBA var forveri Íslandsbanka og síðast Glitnis. 

 

Ríkið eignast 75% í Glitni

Athugasemdir

[Ketill Sigurjónsson, 29.9.2008 kl. 10:19]

Íslandsbanki var reyndar orðinn til löngu fyrir FBA. Þó svo þessir bankar hafi síðar sameinast.

[Sigurjón Þórðarson, 29.9.2008 kl. 10:24]

Það er rétt Ketill, ef ég man þetta rétt þá var það fifty fifty sameining.  

[Baldvin Baldvinsson (IP-tala skráð) 29.9.2008 kl. 10:34]

Já þetta er frelsið í hnotskurn.

Merkilegt nokk að í gegnum tíðina hefur þessi flokkur Sjálfstæðis í landinu staðið vörð fyrir því að frelsið fái að njóta sín. Þegar harðnar á dalnum koma þessir plebbar skríðandi eins og kjölturakkar til að fá klapp á kollinn fyrir að hafa gert mistök.  Þetta er dæmigert fyrir auðvaldið í þessu landi. Þeir hefðu átt að leyfa þessum vesalingum að fara á hausinn og taka afleiðingum eigin gjörða. Það vakna upp ótal spurningar þegar svona gerist í landi þar sem ekki er hægt að borga hinum almenna verkamanni sómasamleg laun. Hver eru skilaboð þessarar ríkisstjórnar til almennings til launþega, verkalýðfélaga og allra þeirra aðila sem eru að ramba á barmi gjaldþrots. Það er mikil skítalykt af þessu máli rétt eins og þegar Ríkið var alltaf að hlaupa til og bjarga Flugleiðum á sínum tíma með alskonar bjargráðum.

Ég vil þess stjórn burt, vil að Samfylkingin þrukkist út því hún hefur ekki gert annað en fægja stóla í þingsölum til þessa. Við þurfum fólk sem gerir hlutina og um leið og ég segi það getur Geir H áttað sig á því að þetta er örugglega ekki ein af þeim leiðum sem menn hafa verið að tala um til að koma fjármálunum í lag að koma inn í eitthvað fyrirtæki bara til að hygla vinum og vandamönnum sem ekki stóðu sig í stykkinu. 

Það þarf líka að skoða alla þessa kaupréttarsamninga sem gerðir hafa verið hjá fyrirtækjum og opinberum aðilum og rifta þeim öllum og þetta pakk borga til baka það sem það hefur verið að stela frá almenningi þessa lands.

Bestu kveðjur meðan reiðin er í lágmarki.

Baldvin Baldvinsson

[nonni (IP-tala skráð) 29.9.2008 kl. 10:53]

Hvernig dettur þér í hug að bera saman söluna á FBA vs þetta case? Það er eins stupid og hægt verður.

[Sigurjón Þórðarson, 29.9.2008 kl. 11:40]

Nonni, það væri ekki úr vegi að fá örlítinn rökstuðning með sterkum skoðunum þínum.

[Baldur Gautur Baldursson, 29.9.2008 kl. 15:13]

Æji hvað þetta er allt sorglegt. Þetta vekur bara vanlíðan hjá mér að hugsa um hvað hefur verið að gerast á Íslandi og með peninga íslensku þjóðarinnar!   Sárt, þrælsárt!

[Þórir Kjartansson, 29.9.2008 kl. 17:09]

Já, svona endaði þá hin ,,nýja hugsun og nýju leiðir" eins og Íslandsbanki auglýsti sem mest í byrjun.

[Bullukolla, 29.9.2008 kl. 17:23]

Ekki gleyma því strákar að við erum að leggja drög að sögu framtíðarinnar.  Spillingin mikla mun verða þar mikilvægur kafli ;)

[Ólafur R Sigurðson Skipsjóri úr Grindavík (IP-tala skráð) 29.9.2008 kl. 21:17]

Sæll Sigurjón fyrir gefðu að ég ræðst inná síðuna þína.

En mér langar að vekja atgli í þessum þrengingum sem gengur nú yfir þjóðina.

Samkvæmt áliti sjómanna allt í kringum landið hafa þeir bent á að veiða  mikið meira en nú er gert t,d, aukning um 70þ tonn á þorsk kvóta kæmu sirka 50 miljarða inn í hagkerfi þjóðarinnar höfum við efni á því að horfa framhjá þeirri staðreynd.

Þingmenn f listans hafa margoft bent á þessa staðreynd.

[Sigurður Þórðarson, 29.9.2008 kl. 22:29]

Góð ábending hjá aflaskipstjóranum úr Grindavík honum Ólafi R Sigurðssyni vini okkar. 50 milljarðar í  beihörðum gjaldeyri inn í hagkerfið væri sú vítamínsprauta sem dygði og vel það.

[Vilhjálmur Þorsteinsson, 29.9.2008 kl. 22:37]

Enn eitt geipið um kaupréttarsamninga frá manni sem skilur þá ekki.

Ef gengið í Glitni verður í kring um 2 (sem er verðið sem ríkið kaupir á) þá eru kaupréttarsamningar í bankanum gersamlega verðlausir.  Kaupréttur á genginu 10 (t.d.) er einskis virði ef hægt er að kaupa bréf á markaði á genginu 2.

Stjórnendur græða ekkert á kaupréttarsamningum nema gengið fari upp, það er einmitt hugsunin á bak við þá.

[Vilhjálmur Þorsteinsson, 29.9.2008 kl. 22:46]

P.S. Þar að auki er stærðfræðin röng hjá Sigurjóni, eins og gjarnan vill brenna við hjá Frjálslyndum.  Upphæðin sem ríkissjóður leggur inn í nýju hlutafé segir ekkert um það hvort bankinn sé dýrt metinn eður ei.  Það sem skiptir máli er matið á hlutnum sem fyrir er.  Glitnir er í þessum viðskiptum metinn á um það bil 1/8 af síðasta viðskiptaverði á markaðnum, og sirka 40% af bókfærðu eigin fé.  Þótt ég telji vissulega hugsanlegt að ofgreitt sé fyrir bankann, er fjarri lagi að tala um "gríðarlega hátt verð".

[Sigurgeir Jónsson, 29.9.2008 kl. 23:10]

Ef einhver vill kaupa bankann á því verði sem ríkið keypti hann á þá er verðið í lagi. Ef ekki þá er verðið of hátt.Það kemur fljótlega í ljós hvort verðið var rétt, því ekkert hefur komið fram sem segir að ekki verði opnað aftur með hlutabréf í bankanum í kauphöllinni.Kaupréttarsamningar sem stjórnendur fjármálafyrirtækja hafa haft er stór orsakavaldur í því hruni sem bankar eru að lenda í, í dag.Þeir sem þykjast hafa vit á fjármálum viðurkenna það að sjálfsögðu ekki, og þeir þurfa ekki endilega að vera í Frjálslyndaflokknum.Peningavitið er til að mynda ekki alltaf hjá þeim sem geta reiknað. Og hafa jafnvel próf til þess.En hvenær yfirtekur ríkið Selvogsbankann

[Sigurjón Þórðarson, 30.9.2008 kl. 00:27]

Þá vitum við það hjá Vilhjálmi Þorsteinssyni að 84 milljarðar er ekki há upphæð!

Bankinn var kominn í þrot og það var enginn sem rak eigendur bankans til þess að taka þessu boði og því hefði örugglega ekki verið tekið ef að aðrir hagstæðari möguleikar hefðu verið upp á borðum.

Sömuleiðis virðist sem að fulltrúi Samfylkingarinnar sé bara býsna ánægður með þá kaupréttarsamninga sem gerðir hafa verið á umliðnum árum og hafa gefið kraftaverkamanni á borð við Bjarna Ármannssyni milljarða í aðra hönd og minni spámönnum hundruði milljóna.

[Jón V Viðarsson, 30.9.2008 kl. 00:44]

Börsen í Danmörk fjallar um Glitnir og Ríkið og segir að Íslenska Ríkið hefði sennilega farið á hausinn ef Glitnir hefði rúllað yfir. Þeir vilja meina að ef annar banki fari á hausinn hér á Íslandi muni Ríkið ekki getað komið öðrum banka til bjargar þar sem Seðlabankinn þoli ekki meiri ágjöf. Miðað við þetta er traustið á Íslensku bankana í algjöru lámarki og ekki mikið sem má fara úrskeiðis. Þessi aðgerð var því mun ódýrari fyrir okkur heldur en að ríkið færi á hausinn.

[Jón V Viðarsson, 30.9.2008 kl. 01:17]

Þetta er hluti af grein Börsen sem fjallar um yfirtöku á Glitni.

"Man kunne have håbet, at statens overtagelse ville have givet tilliden tilbage. Men det, der sker, er, at statens størrelse i forhold til bankerne viser, at den ikke vil kunne redde bankerne, hvis det går galt. Folk bliver nu nervøse for, om selve den islandske stat går fallit. Så markedet opfatter dette her, som at staten forsøger at redde noget, den ikke kan, og det er en dårlig nyhed."

Det er dog ikke sandsynligt, at den islandske stat går under.

"Det ville overraske mig, hvis Island gik konkurs, men der er en reel bekymring for, at hvis Glitnir har så store problemer, så kan de andre banker også have dem. Og med statens størrelse er det ikke sikkert, at den kan redde dem," siger Tobias Thygesen og afslutter:
 

[Vilhjálmur Þorsteinsson, 30.9.2008 kl. 01:27]

Sigurjón, "gríðarlega hátt verð" er ekki það sama og "gríðarlega há upphæð".  84 milljarðar er vissulega gríðarlega há upphæð, en sem verð fyrir 75% af banka sem hefðu kostað 650 milljarða þremur dögum fyrr, er það ekki endilega gríðarlega hátt.

Það var einmitt sú staðreynd að bankinn var kominn í þrot sem rak eigendur hans til að taka þessu tilboði, sem þeir stórtapa á.  En töldu það væntanlega betra en ekkert.

Kraftaverkamaður eins og Bjarni Ármannsson var þrátt fyrir allt varkárari en sumir þeir sem nýlega hafa ráðið í bankanum.  Hann var látinn fara ekki síst vegna þess að nýjum eigendum Glitnis þótti hann of varkár.

Ég er nú enginn sérstakur "fulltrúi Samfylkingarinnar", en ég hef vissulega verið jafnaðarmaður í aldarfjórðung.

[Eggert Vébjörnsson (IP-tala skráð) 30.9.2008 kl. 02:17]

Vilhjálmur?

Er innistæða fyrir þessu háa verði hvort sem um gríðarlega háa upphæð er að ræða eða ekki.

Nú vita allir hvernig kaupin gengu fyrir sig þar sem sömu aðilar seldu sjálfum sér eignir og þær hækkuðu dag frá degi.

Þarf að tiltaka dæmi þar um?

Hverjir hafa ekki horft á börn blása sápukúlur og fyllast takmarkalausri aðdáun á sköpunarverkinu. Ekki ólíkt að líkja því við þessa blessuðu hámenntuðu bankastjóra sem að kunnu að diffra  og búa til sápukúlur. 

Rétttlætir það himinháa kaupréttar- og starfslokasamninga sem að vissulega eru innustæðulausir í dag hvað sem framgangi seðlabankans viðkemur.

Svei þessu krimmaliði. Svei þeim öllum.

[Landfari, 30.9.2008 kl. 09:03]

Þessir kaupréttarsamningar eru hættulegir því þrýstingurinn á að halda genginu háu verður svo mikill að hætt er við að menn grípi til örþrifa ráða til þess.

Hinsvegar var tekið fyrir alla svona samninga hjá Glitni þegar ný stjórn tók við á síðasta aðlfundi.

[Sigurjón Þórðarson, 30.9.2008 kl. 09:44]

Jón Viðar það er að vona að Börsen reynist ekki sannspár en margir hafa velt því fyrir sér hvað muni gerast fyrir íslenskt samfélag ef að Stoðir ná ekki að komast út úr greiðslustöðvuninni.

Vilhjálmur, það er naumast hvað helsti kóngur kaupréttarsamninganna Bjarni Ármannsson er heilagur í augum Samfylkingarinnar en þó svo að hann hafi verið sérstakur heiðurgsgestur jafnaðarmanna á síðasta landsþingi, þá finnst mér það vægast sagt sérkennilegt að jafnaðarmenn skuli hvað eftir annað bera í bætifláka fyrir siðlausa kaupréttarsamninga í hæstu hæðum.

Ég vil taka undir með Eggerti um sápukúluverðið á eignasafni og það er spurning hvað af þessu eru eignir eða veð hjá fyrirtækjum skuldsett eru upp fyrir rjáfur s.s. íslensk sjávarútvegsfyrirtæki.

Landfari - það er vonandi að eitthvað hafi skánað með nýrri stjórn sem tók við hjá Glitni fyrr á árinu en það eru samt sem áður ýmsir sem telja að núverandi stjórnendur hafi ekki gengið heiðarlega fram þegar MEST varð gjaldþrota,

Það væri eftir öðru ef að ríkið setti sömu menn í stjórn og forystu fyrirtækisins sem hafa komið fram fyrir alþjóð og haldið því fram að rekisturinn sé mjög traustur og það sé langt frá því að bankinn þurfi á aðstoð ríkisins að halda.

Auðvitða eiga þessir menn að fara og ég held að t.d. Þorsteini Má sé hollara að einbeita sér að rekstri eigins fyrirtækis.. 

[Árni Gunnarsson, 30.9.2008 kl. 10:22]

Það er rétt hjá Vilhjálmi að kaupréttarsamningar í Glitni eru ekki mikils virði í dag. Þessir kaupréttarsamningar segja hinsvegar afar skýra sögu um viðhorf stjórnendanna til þess álitamáls! hverjir eigi að njóta hagnaðarins af góðum rekstri. Hvort það eigi að vera eigendur bankans og þar með vinnuveitendur stjórnenda eða stjórnendurnir sjálfir.

[Landfari, 30.9.2008 kl. 13:07]

Ertu enn á því að þetta sé gríðarlega hátt verð.

Ríkissjóður búinn að "græða" yfir 200 milljarða bara í morgun á þessum kaupum.

[Sigurjón Þórðarson, 30.9.2008 kl. 13:28]

Já ég er þeirrar skoðunar að þetta sé mjög hátt verð en það á eftir að koma í ljós á næstu mánuðum en ég ætla rétt að vona svo sé ekki.

Hitt er annað mál bankinn verður verðmætari með aðkomu ríkisins en hann fær þá meiri tiltrú en það er ólíkt traustara að ríkið eigi bankann en ef um er að ræða FL eða Stoðir sem tapað hafa 2 milljörðum á mánuði.

Aukið traust á Glitni getur hins vegar aukið vanda hinna bankanna en ég heyrði í manni sem á nokkra tugi milljóna inn á bók hjá Kaupþingi sem velti því fyrir sér hvort að peningarnir væru ekki orðnir öruggari í ávöxtun hjá Glitni eftir ríkisvæðinguna.

[Vilhjálmur Þorsteinsson, 1.10.2008 kl. 00:04]

Sigurjón, þú gætir vel hafa tapað atkvæðum 11.000 hluthafa í Glitni með þessu kjánalega útspili, a.m.k. væri það mjög verðskuldað.  Ekki eru þeir sáttir við verðið sem ríkið keypti bankann á, meðan þú hefðir væntanlega viljað hafa það mun lægra, sbr. lýsinguna "gríðarlega hátt".