Mikill maður fallinn frá

Bobby Fischer setti mark sitt á skáklíf heimsins, og sömuleiðis íslenskt þjóðlíf, síðustu fjóra áratugi, allt frá því að heimsmeistaramótið var haldið hér árið 1972, í skákeinvígi aldarinnar í Laugardalshöll. Fischer lenti í ótrúlegum væringum gagnvart bandarískum stjórnvöldum vegna brota á viðskiptabanni þegar hann tefldi í fyrrum Júgóslavíu. Þær hremmingar skoluðu honum hingað til Íslands eftir langa dvöl í japönskum fangelsum.

Ég kynntist kappanum aðeins persónulega þegar ég fiskaði hann upp þar sem hann sat á bekk fyrir utan Kjörgarð á Laugaveginum í sumar sem leið. Ég tók hann tali en þar sat meistarinn klæddur til útiveru með vasaútvarp, sem hann hlýddi á BBC í, og þrjá farsíma. Ég bauð honum að borða með mér kjúkling úr Melabúðinni meðan við sátum og ræddum landsins gagn og nauðsynjar og heimsstjórnmálin. Það er óhætt að segja að það samtal hafi tekið á sig skringilegt flug og dýfur og ég, sveitamaðurinn Sigurjón, átti fullt í fangi með að fylgja meistaranum eftir. Honum var mjög umhugað um umhverfismál og bandarísk stjórnvöld sem hann taldi sitja á launráðum við sig.

Við vinirnir, við Valgeir Tómas Sigurðsson, komum því til leiðar að Fischer fór í lystireisu í sumar með Valgeiri norður til Siglufjarðar þar sem Fischer og japönsk vinkona hans áttu góðar stundir í nokkra daga. Hann gat verið skemmtilega kenjóttur og það sem honum þótti hvað skemmtilegast á Siglufirði og taka öðru fram var hafragrauturinn sem hann gat látið ofan í sig í ómældu magni.

Ísland er fátækara land þegar Fischer er fallinn frá. Við getum verið stolt af því að hafa tekið vel á móti honum og létt honum síðustu æviárin. Vinir hans sem komu því til leiðar að hann fékk íslenskan ríkisborgararétt eiga þökk skilda.

Skákmenn minnast Fischers

Athugasemdir

[Sveinbjörn Skúlason (IP-tala skráð) 18.1.2008 kl. 12:23]

Mikill maður fallinn frá? Bobby Fischer er einn mesti gyðingahatari sem uppi hefur verið og afneitaði þjóð sinni sem hefur staðið ótrauð að baki við íslendinga. Við getum verið ánægð að þessi mannvera er horfinn inn í eilífína, heimurinn er betri á eftir.

[Gunnar (IP-tala skráð) 18.1.2008 kl. 12:51]

Sveinbjörn, þú ert klikkaður.

Lifi Fischer í minningunni. 

[Guðmundur G. Hreiðarsson (IP-tala skráð) 18.1.2008 kl. 12:55]

Sveinbjörn. Stendur Ísraelsþjóðin ótrauð að baki Íslendinga? Vorum það ekki við sem komum með afgerandi hætti að stofnun ríkis þeirra? Önnur samskipti kannast ég ekki við; nema ef vera skyldi þegar Forsetafrúin okkar var niðurlægð þarna suður frá. Þótt menn gangi ekki heilir til skógar, þá geta menn samt verið miklir; það var Fischer ótvírætt.

[Sigurjón Þórðarson, 18.1.2008 kl. 13:07]

Sveinbjörn:  Mín tilfinning var sú að Fischer gerði aldrei flugu mein. 

Að mínu mati  átti hann það til að vera vænisjúkur og sjá óvini fyrir á fleti hverju. Ég er ekki frá því að digurbarkalegar yfirlýsingar í allar áttir hafi verið ákveðin varnarviðbrögð hjá karli.

[Sigurður Þórðarson, 18.1.2008 kl. 14:39]

Þek undir með þér mannlífið er sannarlega fátæklegra hér á Fróni eftir fráfall þessa mikla meistara. Ég átti stundum tal við Fischer og þá kom fyrir að hann viðurkenndi að heilsan mætti vera betri og hafði hann sínar skýringar á því sem ég læt liggja milli hluta. Þess vegna stundaði hann gönguferðir og sund, kyti lífrænar vörur í Yggdrasil og passaði mataræðið. Blessuð sé minning Bobby Fischer.

[íris (IP-tala skráð) 18.1.2008 kl. 19:01]

Heyr Heyr Sveinbjörn..  um að gera að hylla gyðingahatara sem gerði okkar mannlíf engu ríkara á meðan við hendum pólitískum flóttamönnum öfugum út úr landinu...... hef aldrei vitað um land sem er með eins mikla minnimáttarkennd og ísland...  how do you like iceland??

[Guðrún Jóna Gunnarsdóttir, 18.1.2008 kl. 23:05]

Það gæti svo sannarlega átt við að geislunin í fangelsinu hafi valdið nýrnabilun Fisher´s

Ég tek undir með höfundi að merkur maður er fallinn frá og sjónarsviptir af honum. Tel þig lánsaman Sigurjón að hafa kynnst honum og það með eftirminnilegum hætti. Ekki viss um að margur hefði staldrað við og boðið honum að snæða með sér kjúkling. Flott hjá þér

[Árni Gunnarsson, 19.1.2008 kl. 22:23]

Fyrir mér er Fisher ákveðið "symbol."

Andleg bilun hans var það mikil að hann hefði sennilega ekki komist til pólitískra valda á Íslandi.

[Guðrún María Óskarsdóttir., 21.1.2008 kl. 01:26]

Blessuð sé minning Bobby Fischer.

Einvígi hans við Spassky hér á sínum tíma, gerði það að verkum að maður drukknaði í áhuga á skáklistinni, svo mjög að ég skar út taflmenn úr kertum, til að geta telft, þar sem tafl var ekki til.

kv.gmaria.