Að byggja upp þorskstofninn

Það er alltaf hollt að velta fyrir sér grundvallarforsendum ef hlutirnir virðast ekki virka. Ef það kviknar t.d. ekki á neinni ljósaperu í húsinu þá er skynsamlegt að kanna hvort öryggið sé farið eða athuga hvort hafi rafmagnið slegið út í stað þess að hamast á öllum rofum tímunum saman. 

Að sama skapi er skynsamlegt að ígrunda forsendur veiðiráðgjafar Hafró sem gefa skýrt til kynna að uppbyggingarstarf síðustu áratuga hafi alls ekki gengið upp. Það er stöðugt klifað á því að það sé nauðsynlegt að byggja upp hrygningarstofninn til þess að geta fengið meiri nýliðun og veitt þá meira seinna. Forsendur þessa hljóta annað hvort að vera að því fleiri fiskar sem hrygna þeim mun hærri ættu lífslíkur seiða að vera eða að lífslíkur þorskseiða séu alltaf þær sömu og með því að fjölga hrygnum með minnkuðu veiðihlutfalli fáist meiri nýliðun. Hvort tveggja gengur í berhögg við viðtekna vistfræði þar sem lífslíkur seiða ættu miklu frekar að minnka en aukast þegar meiri mergð er á ferðinni og vandséð er að hægt sé að stækka stofn sem augljóslega skortir fæðu þar sem mælingar sýna að vöxtur er í sögulegu lágmarki. Það er rétt að hafa í huga að hver hængur og hrygna í hrygningarstofni  í jafnvægi koma á legg að jafnaði 2 kynþroska fiskum af  öllum þeim milljónum seiða sem parið framleiðir.  Fyrir hrygningarstofn sem er að vaxa gífurlega hratt eða um 50% þá eru fiskarnir ekki fleiri en 3 sem parið skilar áfram.    

Stjórnvöld stjórna ekki einungis með því að ákveða leyfilegt heildarmagn sem veitt er heldur er markvisst verið að vernda smáfisk með því að loka veiðisvæðum ef mikið er um undirmálsfisk í veiði. Nú, á miðju ári, er búið að beita skyndilokunum sem aldrei fyrr sem bendir augljóslega til þess að mikið er um smáfisk og er það í hrópandi mótsögn við skýrslu Hafró um að þeir árgangar sem von er á inn í veiðina á næstu árum séu óvenju litlir. 

Lokun veiðisvæða og markviss friðun á smáfiski hlýtur að leiða til þess að sjómenn verða að sækja í stærri fisk til þess að ná því heildarmagni sem þeim er úthlutað. Auðvitað leiða þessar stjórnvaldsaðgerðir til þess að sótt er enn meira en ella í stóra hrygningarfiskinn sem stjórnvöld segjast vera að byggja upp til þess að fá meiri nýliðun. Það rekst því hvað á annars horn í „besta kvótakerfi í heimi“.

Ábyrg stjórnvöld hljóta að taka núverandi forsendur kvótakerfisins til gagngerar endurskoðunar og gaumgæfa rök þeirra sem hafa sett fram vel rökstudda gagnrýni á núverandi fiskveiðstjórn.

Athugasemdir

[Guðrún María Óskarsdóttir., 22.6.2007 kl. 01:48]

Góð grein Sigurjón.

kv.gmaria.

[Sigurður Pálsson (IP-tala skráð) 22.6.2007 kl. 17:42]

Sæll Sigurjón,flott grein,eftir nýjustu fréttum er Össur ekki farinn að komast nærri stefnu okkar í FF,með því að taka Hafró frá Sjávarútvegs-ráðuneitinu og þar á meðal LÍÚ og hlusta meira á Jón Kristjánsson og þín sjónarmið og hugsa meira um líffræðis málin heldur en um þessi arfavitlausu togara og netarall sem vísindi Hafró hafa byggst á að mikklu leiti á?

[Sigurjón Þórðarson, 22.6.2007 kl. 22:48]

Össur er með grein á vefnum sínum þar sem að hann gagnrýnir skipulag rannsókna en tekur í einu og öllu undir afrakstur þess skipulags.  Ég  er að setja saman nokkrar línur um skrif Össurar sem birtast vonandi hér á vefnum.