Er rétt að fréttamenn RÚV lýsi yfir stuðningi við baráttusamtök sem eru í nánum tengslum við stjórnmálaflokk?

Magnús Þór Hafsteinsson skrifaði grein á bloggsíðu sína í fyrradag þar sem hann gerði grein fyrir áhyggjum sínum af því hve iðulega væri hallað á þingmenn Frjálslynda flokksins. 

Kristinn H. Gunnarsson hefur einnig gert ítarlega grein fyrir einkennilegum vinnubrögðum RÚV á heimasíðu sinni. Í fréttum í mars sl. fór Björg Eva Erlendsdóttir með rangfærslur um staðreyndir og gerði lítið úr mjög alvarlegri gagnrýni á fundarstjórn forseta Alþingis sem var kölluð deilur um keisarans skegg.

Ég hef áður greint frá því að það er eitthvað mikið að á fréttastofu ríkisútvarpsins og hef sagt frá vanstilltum skrifum Óðins Jónssonar fréttastjóra á heimasíðunni minni. Fréttastjóri „útvarps allra landsmanna“ sagði að ég væri með skæting og í leit að einhverjum málstað þegar ég benti á slæleg vinnubrögð fréttastofu RÚV.

Ástæðan fyrir þessum ofsafengnu og ýktu viðbrögðum fréttastjóra RÚV var að ég gerði alvarlegar athugasemdir við það að fréttastofa ríkisútvarpsins hirti ekki um að leiðrétta augljósar rangfærslur í fréttum sem vörðuðu fiskveiðistjórn. 

Það er grafalvarlegt að almenningur í landinu getur ekki treyst því að fréttir ríkisútvarpsins séu leiðréttar strax og fréttastjóri veit að farið hefur með rangfærslur.

Í dag barst mér tölvuskeyti frá flokksmanni í Frjálslynda flokknum sem benti á að Björg Eva Erlendsdóttir sem er einn af fréttamönnum ríkisútvarpsins eins og áður segir hafi lýst yfir stuðningi við Framtíðarlandið. Framtíðarlandið er í nánum tengslum við Íslandshreyfinguna og má sjá að kosningabarátta Íslandshreyfingarinnar er keyrð í kjölfar undirskriftasöfnunar og auglýsingaherferðar Framtíðarlandsins.

Björg Eva fréttamaður segir í stuðningsyfirlýsingu sinni

að ég hef von um að þetta framtak ýti við stjórnvöldum og að þau taki ákvörðun í máli sem varðar þjóðina alla. Það er þeirra hlutverk, en ekki Landsvirkjunnar, álfyrirtækja eða heimamanna

Nú síðustu vikurna hefur Björg Eva Erlendsdóttir orðið uppvís að því að dylgja um meintan ágreining innan Frjálslynda flokksins vegna auglýsingar um málefni innflytjenda. Það gerði hún án þess að ræða við forystumenn Frjálslynda flokksins um málið. 

Það er greinilega eitthvað mikið að hjá fréttastofu ríkisútvarpsins.

Athugasemdir

[Andrés Vigf. (IP-tala skráð) 8.4.2007 kl. 17:32]

Sæll  Sigurjón

Nú eruð þið að upplifa það sama og við starfsmenn Alcans í Straumsvík höfum þurft að þola af hálfu RÚV síðustu 12 vikurnar fyrir kostningarnar um stækkun þar sem sannleikanum  var hagrætt hvað eftir annað og talað máli Sólar í Straumi í öllum fréttaflutningi enda er réttnefni á RÚV :  Sól í Efstaleiti.

 kveðja

Andrés Vigf.

[Sigurjón Þórðarson, 8.4.2007 kl. 17:55]

Sæll Andrés

Það er augljóst að Björg Eva hefur verið bullandi vanhæf í fréttaflutningi af stækkun álversins í Straumsvík. 

[Einar Ben, 8.4.2007 kl. 20:20]

Það er deginum ljósara að Björg Eva er ekki hæf til að fjalla um fréttir tengdar kosningum til alþingis, þar sem að hún er bullandi hlutdræg, kannski má segja að fréttastofan sé það öll.

Bjarni Fel. er einn mesti aðdáandi Arsenal á Íslandi sem og gallharður KR ingur, samt hefur það ekki haft áhrif á lýsingar hans frá leikjum þessara liða, er ekki vert að restin af fréttastofu RUV taki sér þann heiðursmann til fyrirmyndar.

kv. af skaga.

[Sigurjón Þórðarson, 8.4.2007 kl. 20:46]

Úr 5. grein siðareglna blaðamanna  

 

5. grein

Blaðamaður varast að lenda í hagsmunaágreiningi, til dæmis með því að flytja fréttir eða frásagnir af fyrirtækjum eða hagsmunasamtökum

þar sem hann á sjálfur aðild.

[Sigurður Pálsson (IP-tala skráð) 8.4.2007 kl. 22:19]

Sæll Sigurjón, er ekki kominn tími á að selja þessa stofnun sem heitir RúV,en ætti með réttu að heita áróðusmiðill sjálfgræðgis flokkana.Fólk er skikkað til að borga af þessum miðli og á eftir að hækka núna þegar nefskatturinn er kominn á,(allavega fyrir stórar fjölskyldur)Því má RÚV ekki fara á afruglara eins og stöð2 og þeir borga sem þennan miðil vilja.Því ekki er þetta sá öryggis ventill sem það var fyrir 20 árum síðan.Stöð 2 0g Bylgjan hafa verið á undan með fréttir td af jarðskjálftum sem hafa verið hér við land.
Kveðja Sigurður Pálsson

[Guðrún María Óskarsdóttir., 8.4.2007 kl. 23:29]

Góð samantekt Sigurjón og stórnauðsynleg.

kv.gmaria.

[Hafsteinn Þór Hafsteinsson (IP-tala skráð) 9.4.2007 kl. 11:11]

Þarna kemur nú kannski skýring á ýmsum málum, en það er bráðnauðsynlegt að almenningi sé ljóst ef fréttamenn eru í pólitískum samtökum, eða yfirlýstir stuðningsmenn.

Bara til að fólk geti sett upp "rétt gleraugu", og lagt síðan sitt mat á "fréttirnar"

 Kveðja Hafsteinn Þór 

[Sigurjón Þórðarson, 9.4.2007 kl. 13:13]

Það er mjög nauðsynlegt að fara yfir fréttaflutning RÚV af stækkun álversins í Straumsvík og kanna aðkomu Bjargar Evu Erlendsdóttur í Framtíðarlandinu.