Bjarna þótti leiðinlegt að fjölmiðlarnir tækju ekki þátt í samsærinu

Það var fyndið, viðtalið við Bjarna Harðarson í ríkissjónvarpinu áðan, en hann ,,lenti í" því í kvöld að missa gagnrýni tveggja Skagfirðinga á varaformann Framsóknarflokksins út til allra fjölmiðla, gagnrýni sem átti að vísu að skila sér þá leiðina - en nafnlaust.

Vörn Bjarna var ámátleg og verður örugglega kærkomin handónýtri ríkisstjórn í ámátlegri viðleitni hennar í að gera ekki neitt. Í stað þess að biðja Valgerði afsökunar og segjast hafa hlaupið á sig, jafnvel slá á þráðinn til frúarinnar á Lómatjörn, sneri Bjarni sig í snörunni og kenndi fréttastofunni um að hafa ekki tekið þátt í falsinu.

Hvað er þetta með þingmenn Suðurlands, alltaf í einhverju klúðri? Ekki þarf að fjölyrða um Árna Johnsen, Árni Matt. heldur svo lögheimili með Pólverjum á Kirkjuhvoli, Atli Gíslason er í tómu tjóni út af maðkaveiðimennsku sinni og Björgvini verður ekki við bjargað í Icesave.

Ég ætla að vona að minn maður, Grétar Mar, smitist ekki af þessari óáran.

Athugasemdir

[guðrún hlín adolfsdóttir (IP-tala skráð) 10.11.2008 kl. 22:49]

Er ekki bara hægt að tala um TÆKNILEG mistök.

[Jakobína Ingunn Ólafsdóttir, 10.11.2008 kl. 22:57]

Framsóknarflokkurinn virðist ekki vera í náðinni hjá fjölmiðlum

[Árni Gunnarsson, 10.11.2008 kl. 23:41]

Já en- Sigurjón: Mikið óskaplega var þetta nú notalegt innlegg frá þessum ágætu vinum mínum í Skagafirðinum!

[Sigurjón Þórðarson, 10.11.2008 kl. 23:49]

Já það reyndist svo að tæknileg mistök Bjarna kæta mjög stjórnarliða - Ekki ber á öðru ef lesinn er nýjasti pistill stórmennisins Össurar Skarphéðinssonar.  Einhvern veginn taldi ég fyrir fram að dr. Össur myndi sýna þessum póstsendingum Bjarna meiri skilning í ljósi þess að hann hefur sjálfur misstigið sig hrapalega á lyklaborðinu s.s. þegar hann sendi Bónusfeðgum hótun á enskri tungu hér um árið.

Pólitísku tíðindin í skrifum starfandi leiðtoga "jafnaðarmanna" á Íslandi hljóta að vera að hann hrósar fyrrum stjórnarmanni í Fl Group fyrir viðbrögð sín þegar grunur lék á milljarða króna misferli í opinberu hlutafélagi sem fólust m.a. í því að þaga yfir meintum lögbrotum í stað þess að kæra þau til yfirvalda.

[Guðrún María Óskarsdóttir., 11.11.2008 kl. 01:08]

Sæll Sigurjón.

Það er búið að vera mikið að gera á Suðurlandi um helgina safnahelgi, kanski liggur skýringin þar

kv.gmaria.

[Sigurjón Þórðarson, 11.11.2008 kl. 09:20]

Ég tók eftir því að Valgerður vildi ekkert ræða "notalegt innihald" bréfs Skagfirðinganna tveggja sem hún fordæmdi Bjarna fyrir að dreifa. 

[Eiríkur Guðmundsson, 11.11.2008 kl. 10:42]

Klúður Bjarna kom sér vel fyrir Valgerði. Það dreifði athyglinni frá því að samflokksmenn hennar eru að kalla eftir því, að því er virðist, að hún axli einhverja ábyrgð á ástandinu sem uppi er í þjóðfélaginu núna. 

Núna er Bjarni búinn að segja af sér, og þá fara menn vonandi að veita efni bréfsins meiri athygli.