Aðgerðablaðamennska Morgunblaðsins

Fréttir Morgunblaðsins af Flokki fólksins eru orðnar hálfbroslegar. Það dylst fáum að Andrea Sigurðardóttir formaður Hvatar félags sjálfstæðiskvenna í Reykjavík sem starfar jafnframt sem blaðamaður á Morgunblaðinu, er ekki að skrifa hér hlutlæga frétt um smávægilegan formgalla á skráningu Flokks fólksins.  

Líklegast mun þessi aðgerðablaðamennska formanns Hvatar ekki hafa önnur áhrif en að draga úr trúverðugleika annarrar umfjöllunar miðilsins og er það miður þar sem að Hádegismóum er að finna margt ágætt starfsfólk sem lætur ekki pólitískt kapp bera fagmennskuna ofurliði.

Við í Flokki fólksins munum auðvitað, bæta úr þessum formgalla og formfesta jafnframt betur gróskumikið innra starf Flokks fólksins.

 

Flokkur fólksins fær ekki styrk í ár

Athugasemdir

[jósef Ásmundsson (IP-tala skráð) 22.1.2025 kl. 15:03]

Enginn flokkur á að fá styrk frá þjóðinni. Þingmenn eru fulltrúar þjóðarinnar og hver þingmaður á að vera óháður gagnvart öðrum þingmönnum . Nóg að þingmaður þiggi laun fyrir þingsetuna. Punktur.

[Jón Magnússon, 22.1.2025 kl. 17:25]

Það stoðar lítt að ráðast á blaðamanninn í þessu sambandi. Var eitthvað rangt, sem blaðamaðurinn hefur eftir formanni Flokks fólksins? Ef ekki, þá skiptir engu máli hvort hún er formaður Hvatar, Sjálfstæðisflokksins eða Dýraverndunarfélagsins. Hvort sem um lítilfjörlegan formgalla er að ræða, þá er hann fyrir hendi og var ekki bætt úr þó að formaður Flokks Fólksins segist hafa vitað af honum og hún hafi tekið við fjármunum og fénýtt þá þó hún hafi vitað að til þess hefði hún ekki heimild. Er eitthvað ranglega sagt í fréttinni. 

[Sigurjón Þórðarson, 22.1.2025 kl. 17:56]

Telst það nú orðið að ráðast að fólki ef  upplýst er um að viðkomandi gegni trúnaðarstörfum í Sjálfstæðisflokknum?

Í fréttinni er sagt að Ff verði af styrknum í ár en það er alls ekki útséð um að svo verði þrátt fyrir umræddan fromgalla á skráningu, en formaður Hvatar virðist einhverra hluta gefa sér það og setja það í fyrirsögn!

[Ásgrímur Hartmannsson, 22.1.2025 kl. 18:08]

Ad hominem.

Gerðu betur.

[Wilhelm Emilsson, 22.1.2025 kl. 19:44]

Er það ekki rétt að Flokkur fólksins fékk peninga sem hann átti ekki rétt á og að formaður flokksins segist ekki ætla að borga þá til baka? Ég myndi ekki kalla það "smávægilegan formgalla".

[Sigurjón Þórðarson, 22.1.2025 kl. 20:43]

Nei alls ekki það er ekki rétt hvernig færðu það út?

[Wilhelm Emilsson, 23.1.2025 kl. 02:55]

Ég las eftirfarandi á Vísi.is: “Skrifstofa Alþingis hefur staðfest að Flokkur fólksins uppfylli ekki skilyrði fyrir úthlutun fjárstyrkja til stjórnmálaflokka. Flokkurinn hefur þegið 240 milljónir króna þrátt fyrir að vera enn skráður sem „félagasamtök“ í fyrirtækjaskrá.”

 

Og ég las þetta á mbl.is: “Inga Sæ­land, formaður Flokks fólks­ins og fé­lags- og hús­næðismálaráðherra, seg­ist hafa verið meðvituð um að Flokk­ur fólks­ins upp­fyllti ekki laga­skil­yrði vegna op­in­berra styrkja stjórn­mála­flokka.

 

Flokk­ur­inn ætli sér þó ekki að skila þeim 240 millj­ón­um sem flokk­ur­inn hef­ur fengið frá hinu op­in­bera í trássi við lög.”

 

Er þetta rangt?

[Sigurjón Þórðarson, 23.1.2025 kl. 07:33]

Flokkur fólksins var rétt skráður en lögum var síðan breytt gott ef ekki það var ekki það herrans ár 2022, með þeim hætti að skrá ætti stjórnmálaflokka með öðrum hætti en sem félagasamtök þ.e. sem stjórnmálaflokk. Samþykktum flokksins verður breytt í febrúar í samræmi við lögin. Það er rétt að taka það fram að í rannsóknarblaðamennsku formanns Hvatar á þessu "stóra" máli er þess ekki getið að það er misbrestur á því að önnur stjórnmálaðöfl hafi gengið frá skráningu í samræmi við breytt lög.  Auðvitað mun Ff fara að kröfum stjórnvalda ef koma fram óskir um einhver skil á fjármunum, en það er nánast útilokað að til þess komi.

[Wilhelm Emilsson, 23.1.2025 kl. 16:45]

Takk fyrir svarið, Sigurjón. Inga Sæland sagði í viðtali, "Við vissum af þessum formgalla." Þegar lög breytast, eins og oft gerist, þurfa einstaklingar, félagasamtök og stjórnmálaflokkar að fylgja lögunum. Getum við ekki verið sammála um það? Þegar Inga er spurð hvort hún þurfi að skila peningunum, svarar hún, "Það munum við ekki gera."