Óli Björn ætti að líta sér nær

Óli Björn Kárason skrifar í dag ábúðarmikla grein um vanda Sjálfstæðisflokksins í Morgunblaðið og má lesa á milli línanna að Óli Björn telji að flokkurinn sé fórnarlamb málamiðlanna í samstarfi Vg og Framsóknar, en er það svo?

Það er áhugavert að fara yfir söguna og skerpa myndina við lítinn bæ t.d. Siglufjörð þegar Óskar Halldórsson -Íslandsbersi, mætti með sína lifrarpotta á Sigló og hóf þar framleiðslu fyrir um 100 árum síðan. Í þá daga streymdu bátarnir lestaðir að bryggju og árið 1924 var þorskaflinn a.m.k. 110 þús tonnum meiri en hann er í ár. Líklegast hefur aflinn verið mun meiri en þau 320 þús tonn sem eru skráð, þar sem þá var öldin önnur og ekki löggiltar vigtar eða drónar Fiskistofu yfir hverri löndun í þorpum landsins. 

Er Sjálfstæðisflokkurinn tilbúinn til þess að taka gagnrýna umræðu um fiskveiðiráðgjöf sem skilar minni afla í öllum nytjategunum til þess að skapa svigrúm fyrir nýliðun og frelsi í útgerð? Nei svo er alls ekki, en á síðasta þingvetri studdi Óli Björn og Sjálfstæðisflokkurinn að grásleppan færi inn í kerfi árangursleysis og samþjöppunar. 

Vissulega er hægt að hefja mjög takmarkaðar strandveiðar í nokkrar vikur á ári, en þá þarf viðkomandi að  greiða á annan tug prósenta hærri hafnargjöld en einokunarútgerðin úr Vesmanneyjum sem heldur nú um stundir á megninu á af útræðisrétti Fjallabyggðar.  Er Sjálfstæðisflokkurinn  að tala fyrir auknu frelsi til handfæraveiða? Svarið er nei - hann berst gegn frelsi fyrir litla sjálfstæða manninn og fyrir fákeppni örfárra auðmanna.

Ef Óskar Halldórsson kæmi nú 100 árum síðar endurfæddur til Siglufjarðar þá kæmi hann að harðlæstum dyrum í sjávarútvegi og alls óvíst að hann gæti reynt fyrir sér jafnvel með krabbagildrur eða hvað þá annað. Sjálfstæðisflokkurinn hefur búið svo um hnúta að öll nýsköpun er bönnuð í sjávarútvegi nema þá að hún sé sérstaklega leyfð.

Vandi Sjálfstæðisflokksins er að æ fleiri af þeim sem hafa stutt flokkinn geta ekki lengur lokað augunum fyrir því að flokkurinn er fyrst og fremst flokkur þröngra sérhagsmuna.

Hvorki sjálfstæði veitingamaðurinn né hagsýna húsmóðirin kaupa þá dellu Óla Björns og félaga að það sé öllum til góða að koma á einokun án nokkurs aðhalds á úrvinnslu kjötafurða á Íslandi. Vissulega eru okurvextirnir sem Sjálfstæðisflokkurinn býður upp ágætir a.m.k. til skamms tíma litið fyrir fjármagnseigendur sem ráð flokknum, en hræðilegur fyrir almenning og þá sem  í nýsköpun og uppbyggingu á fyrirtækjum.

 

 

 

Athugasemdir

[Sigurður Þorsteinsson, 8.8.2024 kl. 16:13]

Held Sigurjón minn að þú ættir líka að horfa þér dálítið nær. Þeð er hreinn loddaraskapur að halda því fram að Sjálfstæðisflokkurinn haldi uppi vaxtastigi í landinu. Reikna að sú fullyrðing þín stafi af þekkingarskorti hvernig vaxtastig þróist. Get alveg tekið undir með þér gagnrýni á þá ákvörðun að setja kvóta á veiði á grásleppu. Dylgjur þínar að minnkandi veiði á þorski sé einum flokki að kenna er bara annað form á loddaraskapnum. Kvótinn var nauðsyn, en deila má um útfærslu hans. Er nokkuð sannfærður um að í komandi framtíð verður kvóti smábáta aukinn. Þannig fæst meira líf á minni staði. Bíð spenntur eftir að sjá hvort sameining kjöliðnaðarstöðva verði til þess að hækka verð á kjötafurðum. Þá er ljóst að það þarf að bæta kjör bænda. Hef lítið heyrt frá þér þar. Sveinn Margeirsson hafði manndóm til þess að berjast fyrir heimaslátrun, eitthvað sem kerfiskarlinn þú hefur nú ekki gert. Þú ert nú í flokki sem ekki er stjórntækur. Það væri áhugavert að þú tækir þig til að gagnrýna eigin flokk, áður en það verður of seint. 

[Sigurjón Þórðarson, 8.8.2024 kl. 17:37]

Minnkandi veiði á þorski er vegna þess að það er bannað að veiða meira en ráðgjöf Hafró segir til um.  Það er meira en lítið furðulegt að enginn annar málsmetandi stjórnmálamaður fiskveiðiþjóðar annar en Inga Sæland sé tilbúinn til að setja spurningamerki við ráðgjöf sem gefur minni afla í öllum tegundum og vel ríflega 110 þús tonna minni þorskafla en Íslandsmið gáfu þegar skipakostur var rýr fyrir 100 árum síðan. Ef það er að vera að stjórntækur að þínu mati að vilja halda uppi vaxtastigi og koma á einokun kjötafurðum, þá erum við ekki sammála um skilgreiningu á hvað sé það að vera stjórntækur.

[Sigurður Þorsteinsson, 8.8.2024 kl. 18:57]

Já, já. Inga Snæland veit betur en sérfræðingar Hafrannsóknarstofnunar, og meira en sérfræðingar okkar varðandi Covid. Ég er enginn sérfræðingur á þessum sviðum en þegar Inga Snæland og hennar lið með Ragnari Ingólfssyni meðtöldum fer að fjalla um efnahagsmál þá eru þau að bulla. Faðir minn vann í Seðlabankanum svo ég Þ þekki allvel hvernig þar er unnið, sjálfur vann sem sérfræðingur á þessu sviði í nokkur ár. Svo vinna sérfræðingar saman bera saman bækur sínar án þess að blanda því við flokkapólitík. Skil vel af hverju Ólafur Ísleifsson fékk nóg af svona málflutningi. 

[Sigurjón Þórðarson, 8.8.2024 kl. 22:48]

Burt séð frá allt og öllu hvað þér finnst um mig, Ingu eða einhvern út í bæ þá sé ég það að þú er gagnrýninn og greindur. Hvað finnst þér um það að leggja það til að dregið sé úr veiði á fiski sem hefur greinilega ekki nægjanlegt æti þar sem meðalvöxtur er langt undir meðallagi?  

Ertu inn á því að friða sveltandi fisk vegna þess að sérfræðingur segir að það sé rétt út frá líkani sem vel að merkja aldrei hefur gengið upp.

[Sigurður Þorsteinsson, 9.8.2024 kl. 07:53]

Sigurjón verð að viðurkenna að ég hef ekki þá þekkingu á lífríkinu að taks afstöðu til þessa. Þetta er nær þinni sérfræðiþekkingu. Það skipti mjög miklu nú er að ná verðbólgunni niður þá skiptir mestu að sveitarfélögin á höfuðborgarsvæðinu fari að taka á sínum þætti m.a. Bjóða upp á lóðir á mun lægra verði. Verkalydhreifingin með atvinnulífinu og opinberum aðilum i að taka þátt. Flokkur fólksins þar að spila með. Þú hefðir þurft að vera í forystu fyrir næstu kosningar einn flokkur þarf að leggja áherslu á þá sem minnst mega sín það gera sósíalistar alls ekki og ég veit ekki hvort VG kæmist í grunninn frá gæluverkefnum sínum.