Grípur rektor inn í störf prófessors Baldurs?

Enn og aftur kemur Baldur Þórhallsson í fjölmiðla og skreytir sig með prófessorstign við Háskóla Íslands, æðstu menntastofnun þjóðarinnar. Í kvöld birtist hann gleiður á skjánum og lýsti fjálglega stöðu mála innan Sjálfstæðisflokksins og pólitískri stöðu fyrrum borgarstjóra, lýsti því yfir að Vilhjálmur væri í þröngri stöðu. Sem áður voru þessar yfirlýsingar fræðimannsins ekki rökstuddar, hvað þá að einhverjar rannsóknir hafi legið að baki þessari niðurstöðu. Mér finnst fráleitt að fræðimaður á sviði stjórnmála skuli nefna aðeins annan þeirra sem bar ábyrgð á framvindu mála í REI-málinu og hlaupa alveg yfir þátt hins, þ.e. Björns Inga Hrafnssonar, þegar hann ræðir pólitíska stöðu þeirra og flokka þeirra.

Ég get ekki betur séð en að Björn Ingi Hrafnsson beri síst minni ábyrgð á klúðrinu sem varð til þess að skyndilega var búið að einkavæða orkuauðlindir almennings. Ég held að fólk sjái í gegnum þetta og að Baldur stundar pólitískan spuna til að koma höggi á Sjálfstæðisflokkinn sem er dulbúið í fræðilegan búning. Ég er ekki viss um að þessi ráð sem hann veitti forsætisráðherra um að grípa inn í og koma Vilhjálmi frá í borgarstjórn hafi verið veitt af umhyggju fyrir Sjálfstæðisflokknum eða almannahagsmunum. Ef almannahagsmunir hefðu ráðið för hefði hann frekar beint sjónum sínum að Birni Inga Hrafnssyni. Hann situr í meirihlutanum sem hefur völd og raunveruleg áhrif á hvernig greitt verður úr þessu hneyksli sem REI-málið óneitanlega er.

Athugasemdir

[Friðrik Guðmundsson (IP-tala skráð) 16.10.2007 kl. 23:24]

Prófessorar eiga auðvitað að passa sig, svo sem. En af hverju ætti rektor að grípa inn í vegna þessa prófessors þegar annar stjórnmálafræðiprófessor hefur um árabil "túlkað" stjórnmálin, á hlutdrægan hátt, án aðgerða? Báðir eiga auðvitað að gæta fræðilegrar óhlutdrægni, en það má ekki skamma bara annan þeirra, eða hvað?

[Sigurður J. (IP-tala skráð) 17.10.2007 kl. 00:14]

Fáum prófessorum hjá HÍ tekst að fjalla um stjórnmál á óhlutdrægan hátt.

[Baldur McQueen (IP-tala skráð) 17.10.2007 kl. 00:19]

Sigurjón.  Þetta þykir mér dálítið hörkuleg árás.

1. Getur ekki verið að Baldur hafi rætt Björn Inga við fréttamenn?  Það eina sem við áhorfendur vitum er að þessi ákveðna frétt sneri að meintum erjum innan sjálfstæðisflokks og viðtalið því væntanlega klippt til að falla að efninu.

2.  Baldur "skreytir" sig ekki með prófessorstign, held ég fari rétt með þegar ég fullyrði að hann hafi aldrei minnst á það í örstuttu viðtali.  Það gerðu hins vegar fréttamenn í tvígang, auk þess sem starfsheiti var ritað undir nafni Baldurs meðan hans bútur var spilaður.

3.  Sem fræðimaður veistu að það er eitt að leggja mat á aðstæður út frá þeirri þekkingu sem maður býr yfir og varpa fram áliti þar að lútandi - annað að fullyrða um eitthvað líkt og það sé ritað í stein.

Annars hlýt ég að vera að misskilja þig eitthvað, því varla ertu í alvöru að gagnrýna Baldur fyrir að framvísa ekki rannsóknum í 63 sekúndna örviðtali til að "sanna" að staða fyrrum borgarstjóra sé veik?

[Þórir Kjartansson, 17.10.2007 kl. 08:35]

Mér finnst yfir höfuð óþolandi hvað fréttamenn eru gjarnir á að fá allskonar álitsgjafa, sem eru allt of pólitískir og  innvígðir inn í einhvern stjórnmálaflokk og geta þar af leiðandi ekki  talað hlutlaust um það mál sem til umræðu er.

[Sigurjón Þórðarson, 17.10.2007 kl. 09:16]

 Ég get ekki fallist á að þessi pistill sé hörkuleg árás en ég nota sama orðalag og Baldur gerði í því í fréttaviðtali á Stöð 2 sem vitnað er til.

Baldur hefur einnig lagt vana sinn í að setja olnbogann í Frjálslynda flokkinn án þess að kynna sér í nokkru það sem hann er að fjalla um.

[Anna Ólafsdóttir (anno) (IP-tala skráð) 17.10.2007 kl. 10:41]

Er þér virkilega alvara Sigurjón? Ertu virkilega þeirrar skoðunar að kalla eigi stjórnmálafræðinga sem starfa við háskólastofnanir á teppið ef þeir svara spurningum fréttamanna með einhverjum þeim hætti sem einhverjum pólitíkusum mislíkar? Tek undir hvert orð sem Baldur McQueen skrifar hér fyrir ofan. 

[Sigurjón Þórðarson, 17.10.2007 kl. 12:11]

Rektor hlýtur að hafa metnað fyrst hún vill koma skólanum á lista yfir þá 100 bestu í heimi. Þá verður að taka á því þegar „fræðimenn“ koma ítrekað fram með illa rökstudd álit í nafni háskólans. Sömuleiðis ætti hinn metnaðarfulli rektor að fara yfir að hagsmunasamtök eins og LÍÚ séu með einhverjar kostaðar rannsóknarstöður til að koma að fyrirframgefinni niðurstöðu.

[Hreiðar Eiríksson (IP-tala skráð) 17.10.2007 kl. 14:07]

Já, þetta er athyglisverð hugmynd.  Því ekki að kalla menn almennt til ábyrgðar, og beita þá viðurlögum, ef þeir hafa ekki "réttar" skoðanir.  Minnir svolítið á "útlendingastefnu" FF.

Annars get ég ekki skilið að maður sem hefur verið svo svikinn og niðurlægður af hálfu félaga sinna í FF skuli sífellt kyssa vöndinn og ganga erinda flokksins

[Gísli Baldvinsson (IP-tala skráð) 17.10.2007 kl. 14:33]

Hmmm...mér sýnist minn kæri Sigurjón að þú sért kominn út í horn á eigin síðu. Ekki það að þú verst fimlega en hér ertu á hálum ís. Fréttamaðurinn hefði kannski átt að tala við Hannes Hólmstein?

[Sigurjón Þórðarson, 17.10.2007 kl. 15:59]

Það er rétt að vel meinandi Samfylkingarfólk sem hefur í gegnum árin gagnrýnt harkalega Hannes Hólmstein, velti því fyrir sér hvort að rétt sé  að  skrifa nú upp á vinnubrögð  prófessors Baldurs, sem eru jafnvel vafasamari en þau sem Samfylkingarfólk hefur gagnrýnt áður.

Ódýrar órökstuddar pólitískar yfirlýsingar  dulbúnar í fræðabúning eru jafn ómerkilegar  hvort sem viðkomandi álitsgjafi kemur úr herbúðum Sjálfstæðisflokksins eða Samfylkingarinnar.

[Gestur Guðjónsson, 17.10.2007 kl. 22:08]

Við skulum ekki gleyma að eiginmaður Baldurs er í nefndum og ráðum fyrir hönd Samfylkingarinnar og má í því ljósi telja vafasamt að líta megi á hann sem hlutlausan.

[Sigurjón Þórðarson, 17.10.2007 kl. 23:37]

Bjarni ég er ekki viss um að við höfum sama skilning á ofangreindum skrifum á síðunni. 

Vissulega greinir mönnum á og það er tekist á en ég sé fátt sem getur beinlínis valdið sorg.