Borgarafundur - hvaða ábyrgð ber verkalýðshreyfingin á ofurlaununum?

Í kvöld verður haldinn borgarafundur sem hefur alla burði til að verða forvitnilegur, forkólfar verkalýðsfélaganna sitja fyrir svörum og væntanlega verður farið yfir ástæður hruns fjármálakerfisins. Hreyfingin skipaði fulltrúa í stjórn lífeyrissjóða sem möndlaði með fé almennings og fjárfesti í félögum sem greiddu ofurlaun, kaupréttarsamninga og starfslokasamninga. Forkólfarnir keyptu líka af sjálfum sér og seldu sjálfum sér og skrúfuðu upp verð á félögunum sem nú eru hrunin. Afleiðingarnar eru gríðarlega alvarlegar fyrir samfélagið eins og öllum hlýtur að vera ljóst.

Það sem mér hefur alltaf þótt sérkennilegast er að fylgjast með tvískinnungnum, þ.e. að forkólfar verkalýðshreyfingarinnar hafa hneykslast á ofurlaununum og kaupréttarsamningunum í kvöldfréttatímunum en daginn eftir mæta fulltrúar þeirra galvaskir hjá stjórnum lífeyrisfélaga til að fjárfesta í þessum sömu félögum.

Hver skilur þetta ráðslag?

Athugasemdir

[Ásthildur Cesil Þórðardóttir, 8.12.2008 kl. 11:15]

Ætli þessum fundi verði einhversstaðar útvarpað ?  Mig langar að fylgjast með honum. 

Svo vil ég segja Sigurjón minn, að þú komst rosalega vel fyrir í Silfrinu, góður eins og alltaf, meira svona.  Þetta er nefnilega málið hjá okkur.  Eini flokkurinn sem alltaf hefur talað skýrt fyrir nýrri sjávarútvegsstefnu. 

[Sigurjón Þórðarson, 8.12.2008 kl. 11:24]

Ég þakka þér fyrir Ásthildur en það er miklu minna mál að breyta núverandi stefnu í sjávarútvegsmálum en að halda áfram þessari eyðimerkurgöngu.  Breytingarnar á stefnunni er augljósasta og auðveldasta leiðin til að afla meiri gjaldeyris.

Ég hef heyrt það hér í nokkrum í Skagafirðinum að það sé áhugi á að fylgjast með fundinum en reikna má með að RÚV sinni hlutverki sínu og útvarpi  fundinum til okkar sem búum utan Höfuðstaðarins. 

[Rannveig H, 8.12.2008 kl. 11:43]

Ætli að þeir fari nokkuð að taka upp á því hjá RUV að fara sinna hlutverki sínu sem útvarp allra landsmanna. Ég tek heilshugar undir hvert orð í færslunni og vona að það komi fram spurningar til þessara manna í þessa veru sem þeir varða látnir svara.

Þú varst flottur í Silfrinu en hefðir þurft að fá betri tíma. Vonandi að Egill fái þig fljótt aftur. Í framhaldi af því finnst mér óskiljanlegt að forysta FF hafi þig ekki í framlínu flokksins.

[Gunnlaugur B Ólafsson, 8.12.2008 kl. 11:50]

Samfylkingin hefur ætíð verið á móti kvótakerfi og talsmenn hennar verið á þeirri línu löngu áður en Frjálslyndi flokkurinn varð til. Höldum staðreyndum réttum.

Nýji tónn frjálslyndra er að vilja gera lítið úr þeim vísindalega grunni sem veiðiheimildirnar eru byggðar á. Þannig ná þeir eyrum kröftugra sjómanna sem hafa fordóma gegn menntun og vita allt best sjálfir.

Sigurjón ég taldi að gamni að þú ert með neikvæðni út í Ingibjörgu Sólrúnu tíu sinnum á tveimur mánuðum og Samfylkinguna mun oftar. Á sama tíma minnist þú einu sinni á formann ykkar Guðjón Arnar.

Segir þetta eitthvað um "fiskveiðistefnuna" í pólitík? Mbk,  G

[Sigurjón Þórðarson, 8.12.2008 kl. 12:14]

Mér finnst þessi skrif jafnaðarmannsins Gunnlaugs hér að ofan vera umhugsunarverð, þar sem gert er lítið úr viðhorfum sjómanna þessa lands sem efast með réttu um stjórn fiskveiða sem gerir ráð fyrir því að hægt sé að flytja aflaheimildir frá Grímsey til Vestmanneyja.  Árangurinn af þessu bulli er sá að nú er veitt af þorski um 30% af því sem veitt var fyrir daga "uppbyggingarinnar" á þorskstofninum.

Það er mikill misskilningur að það  sé einhver nýr tónn að talsmenn Frjálslynda flokksins efist um þessa reiknisfiskifræði sem notuð hefur verið hér á Íslandi við stjórn fiskveiða. 

Ég hef flutt erindi á fjölmörgum fundum hér á landi og erlendis s.s.  Englandi, Skotlandi, Írlandi, Norður Írlandi og  í fyrirheitnu borg Samfylkingarinnar sjálfri Brussel og það í fiskveiðinefnd Evrópusambandsins um að núverandi stefna sem byggir á að veiða minna til að veiða meira seinna geti ekki gengið upp og muni ekki ganga upp.

Ég væri fyrsti maður til að hrósa Samfylkingunni ef hún lét af yfirhylmingu með spillingunni og sömuleiðis hætti að brjóta mannréttindi og færi að úrskurði Mannréttindanefndar Sameinuðu þjóðanna.

[Árni Gunnarsson, 8.12.2008 kl. 12:23]

Gunnlaugur: Er það misminni að Ingibjörg Sólrún hafi lýst yfir sátt við kvótakerfið á fundi hjá LÍÚ, fyrir tveimur árum ef ég man rétt?

[Hallgrímur Guðmundsson, 8.12.2008 kl. 12:41]

Gulli minn er samfylkingin í alvörunni á móti kvótakerfinu? Því miður þá verður þú aðeins að opna augun fyrr staurblindri trú þinn á flokkinn. Samfylkingin flýtur áfram eins og flotkúkur og gasprar það sem þeir halda að sé inn í það og það skiptið, sorgleg staðreynd.

Samfylkingin vil í raun setja sjálfsögð og stjórnarskrárvarinn mannréttindi á frjálsan markað sjá hér. Til hvers erum við með stjórnarskrá, til hvers erum við aðilar að mannréttindasáttmála Sameinuðu Þjóðanna, til hvers eru lögin um stjórn fiskveiða ef þetta er allt hunsað og selja skal sjálfsögð mannréttindi okkar á frjálsum markaði?

[Gunnlaugur B Ólafsson, 8.12.2008 kl. 13:00]

Ég vil nú dansa mjúklega svo ég troði Sigurjóni, mínum ágæta fyrrverandi vinnufélaga ekki of mikið um tær, né heldur Halla mínum ágæta uppeldisbróður úr austrinu. Erum við ekki allir meira og minna blindir? Ekki hef ég fundið neinn endanlegan sannleika.

Mér finnst alltaf svolítið verið að fiska í gruggugu þegar meginþungi umræðu fer í að sverta flokk eða forystumann hans. Reyndar er ég búin að hamast svolítið á VG síðustu vikurnar. Það er að mestu af því að mér þykir svo vænt um þá og ég er fyrir vonbrigðum með þá að reka innantóma klisjupólitík.

Einar frá Hvalnesi er sagður hafa tekið miklar hláturrokur í viðtali í útvarpsviðtölum við Stefán Jónsson. Lengst hló hann þegar hann tjáði sig um hvað verkfræðingar gætu verið "veettlausir". Hann hefði örugglega verið stuðningsmaður Frjálslyndra?

Eru frjálslyndir ekki sundurlaus her einhverra einstaklinga sem vaða út um allt með gífuryrðum, en engin forysta? Þú vitnar einu sinni í Guðjón Arnar á löngu tímabili meðan tilfinningaflæðið liggur allt til Ingibjargar. Er ekki Ástþór Magnússon nýr og öflugur liðsmaður flokksins, sem stefnir þar á frama?

[Sigurjón Þórðarson, 8.12.2008 kl. 13:27]

Segir það ekki sína sögu að tryggir liðsmenn Samfylkingarinnar telja að það sé verið að sverta forystumann Samfylkingarinnar ef sannleikurinn er sagður s.s. um stuðning hennar við áframhaldandi mannréttindabrot.  Samfylkingin ætti að hafa það í huga að mannréttindi eru algild og líka fyrir sjómenn og verkafólk.

Varðandi vísindin og reiknisfiskifræðina þá ganga vísindin út á gagnrýna hugsun og efa en ekki blinda trú.  Trú Samfylkingarinnar á reiknisfiskifræðina er einkennileg þar sem reiknisfiskifræðin gengur þvert gegn viðtekinni vistfræði og hefur ekki haft nokkurt forspargildi um vöxt og viðgang fiskistofna.

[Netamaðurinn (IP-tala skráð) 8.12.2008 kl. 15:01]

Svo maður prjóni nú áfram leistinn sem Sigurjón fitjar upp á, þá er alveg makalaust hvað allt líffræðimenntað fólk hefur miklar efasemdir gagnvart teoríum Hafró. Enda eðlilegt, margt af þessum formúlum fyrir ákvarðanatöku virðast ekki samrýmast nokkrum vísindalegum rökum. Af því Sigurjón nefnir einmitt flutning á aflaheimildum milli fjarlægra landshluta, þá er náttúrulega deginum ljósara að þorskstofn er ekki einn við landið heldur margir stofnar. Veiðiheimildirnar eru útreiknaðar miðað við skuttogara, sem fara eins og logi yfir akur um fiskimiðin í stað þess að horfa til staðbundinna stofna og veiðiþols þeirra.

[Þórður Magnússon (IP-tala skráð) 8.12.2008 kl. 17:44]

Ég ætla að frekjast hér inn með smá pistil sem ég setti inn á netið á öðrum vettvangi:

Mér hefur verið hugleikið afhverju verkalýðsforystan er ill sjánleg á þessum umbrota tímum og niðurstaða mín er sú að verkalýðsforystan á ekki lengur samleið með fólkinu í landinu. Það sem ég meina er að verkalýðshreyfinginn er jú langstærsti leikarinn á svið lífeyrissjóðanna. Lífeyrissjóðirnir eru í dag langstærstu fjármagnseigendur landsins, svo stórir að allt annað bliknar við hliðina á þeim. Guðrún Helgadóttir sagði fyrir mörgum árum þegar lífeyrissjóðirnir voru miklu minni að miðað við eignir þeirra þá gætu þeir ráðið nokkurnveginn öllu því sem þeir vildu ráða. Síðan þá hafa lífeyrissjóðirnir stækkað mikið.

Hvernig velst fólk í svona embætti þ.e. í stjórn lífeyrissjóða, er það kosið í opnum kosningum? Nei það er tilnefnt af verkalýðsforystunni og atvinnurekendum og svo situr það til eilífðarnóns líkt og um erfða góss væri að ræða. Aldrei hef ég heyrt um opið prófkjör eða hreina kosningu til slíkra stjórna. Þessi sama verkalýðsforysta/lífeyrissjóðir sitja svo í krafti hlutafjáreignar í öllum stjórnum allra stærstu fyrirtækja landsins. Ekki skrýtið að komið sé fram við þetta fólk likt og um hálfguði væri að ræða, vald þeirra er nær algert. Þetta getur ekki verið heilbrigt.

Nú er alltaf verið að óska eftir úrbótatillögum og ætla ég mér að leyfa mér að koma með eina hér:

1. Stjórnir lífeyrissjóða skulu kosnir í kosningum almennra félagsmanna og hefur hver félagsmaður atkvæðarétt sem innistæða hans í sjóðnum tryggir honum. Slíkt er gert á öllum hluthafafundum, menn hafa atkvæðarétt í samræmi við hlutafjármagn. Almennur sjóðsfélagi er náttúrulega alveg eins og hluthafi í hlutafélagi.

2. Enginn stjórnamaður má sitja í meir en þrjú kjörtímabil - 3 x 2ár. Þarna er um of mikla fjármuni að ræða til þess að menn geti eignast embættin, jafnvel í krafti vel fjármagnaðar kosningabaráttu.

3. Lífeyrissjóðum sé bannað að eignast stórann hluta í fyrirtækjum sem einnig eru með fólk í vinnu frá þeirra eigin verkalýðsfélagi. Það er ekki eðlilegt að stór hluthafi semji um laun starfsmannanna sem svo vinna hjá sama fyrirtæki.

[guðrún hlín adolfsdóttir (IP-tala skráð) 8.12.2008 kl. 18:43]

Til að fá  BREYTINGAR og losna undan þessari SPILLINGU þurfum við að losna undan veruleika ÞRÆLSINS, BARNANA okkar vegna,og styrkja hvort annað í nýrri RÉTTLÆTISBARÁTTU.Sýnum þessum spillingaröflum að þjóðin verður að fá breytingar STRAX.

[Víðir Benediktsson, 8.12.2008 kl. 22:02]

Ef samfylkingin er á móti kvótakerfinu leynir hún því afskaplega vel. Man að vísu eftir einhverri fyrningarleið sem Ingibjörg boðaði fyrir kosningar ´03 en hef ekki heyrt forkólfana minnast á sjávarútveg síðan. Reyndar var það skelfingin ein að hlusta á Ingibjörgu tala um sjávarútveg. Henni er margt betur gefið en það.

[Hallgrímur Guðmundsson, 8.12.2008 kl. 23:14]

Það er mikið rétt við Gulli erum uppeldisbræður og ekki mér vitanlega annað en góðir vinir. Það breytir því samt ekki að spurningunum svaraði hann ekki frekar en aðrir úr hans flokki.

Fimlega er umræðunni dreif um holt og hæðir og forðast eftir fremsta megni að horfa á raunveruleikann og svara efnislega því sem spurt var um. Ekki trúi ég öðru en Gulli komi hér aftur og geri bragabót á þessu.

[Hólmfríður Bjarnadóttir, 9.12.2008 kl. 00:15]

Sigurjón

Ég verð að segja það að þú virðist ekki hafa kynnt þér vel starf og innviði verkalýðshreyfingarinnar og ég tala nú ekki um Lífeyrissjóðina í landinu. Um hvoru tveggja eru til lög frá Alþingi og starfsreglur Lífeyrissjóðanna eru skýrar og aðgengilegar á heimasíðum þeirra.

Hjá sjóðunum hefur frá upphafi verið fylgt aðhaldssamri stefnu um áhættu fjáfestingar. Hygg ég að þar megi ef til vill finna ágæta fyrirmynd að fjarfestingastefnu annarra peningastofnana. Yfirleitt eru það þeir sem ekki þekkja skipulag og uppbygginu sjóðanna sem hæst gagnrýna þá.

Varðandi ofurlaun þá hafa forsvarsmenn verkalýðshreyfingarnnar gagnrýnt þau réttilega og munu örugglega gera áfram. Það sem virðist trufla ýmsa nú um stundir eru trúlega umfjöllun um launakjör og fleira sem varða formann VR.

Það félag er mjög stórt á okkar mælikvarða og Lífeyrissjóður þeirra mjög öflugur. Formaður VR á að sjálfsögðu sæti í stjórn Lífeyrissjóðsins og tók á þeim forsendum sæti í stjórn Kaupþings.

Þar með var hann  kominn í hóp þeirra sem þáðu ofurlaun og það var vissulega ekki viturlegt.

Það má hins vegar ekki dæma kollega hans út um allt land, í félögum af öllum stærðum eftir þeim mistökum sem hann gerði.

[Vilbogi Magnús Einarsson (IP-tala skráð) 9.12.2008 kl. 00:30]

Hólmfríður mín kæra hættu að draga rassgatið eins og ormaveikur hundur við það að verja þetta gerspillta pakk. Hvaða hagsmuna ert þú að gæta? ég spyr.

En að þér Sigurjón hvað ætlar FF að gera með innan við 3% fylgi eru menn virkilega saddir af 12 ára þinasetu og sætta sig við það að flokkurinn lognist útaf. Eins og virðist vera með FF forystuna komin á góð eftirlaun og þá steinliggur þetta. 

Mér blöskra dugleysi þinna manna. Ef einhvertímann er lag á Íslandi fyrir fólk og flokka með heilsteyptar skoðanir þá er það núna. Nei menn liggja að landi og róa ekki, ekki hægt að merkja það að þarna séu 2 skipstjórar í þingliðinu. Það er ræs FF

[Guðrún María Óskarsdóttir., 9.12.2008 kl. 00:32]

Sæll Sigurjón.

Þú varst frábær í Silfrinu í gær.

Verkalýðshreyfingin er og hefur verið handónýtt afl og það fennir ekki í sporin frá því skattleysismörkin voru fryst með vitund þeirra hinna sömu manna.

Miðstjórnarapparat eins og ASÍ er algjörlega óþarft og einungis kostnaður sem lendir á launþegum sem auðvitað borga.

kv.gmaria.

[Jakobína Ingunn Ólafsdóttir, 9.12.2008 kl. 01:17]

Geir Haarde hefur alvald til þess að halda núverandi pólitískum öflum við völd út kjörtímabilið. Við losnum ekki við þessa spilltu stjórnmálamenn sem þiggja mútur frá auðmönnum, í formi boðsferða í snekkju Jóns Ásgeirs, leynistyrki í kosningasjóði, hálauna störf fyrir börn og ættingja eða aðkomu þeirra að stjórnum fyrirtækja, jólagjafir osfr, nema að gera byltingu.  Við getum valið um að láta þetta lið hneppa börnin okkar í ánauð eða að gera byltingu. Svo einfalt er málið. Það er alvarlegt mál að Geir Haarde og hans lið setur milljóna skuldir á bak hvers einstaklings sem birtist á fæðingadeildinni. 

Burt með ríkisstjórnina, við viljum hreint og óspillt Ísland.

[Netamaðurinn (IP-tala skráð) 9.12.2008 kl. 06:57]

http://www.mbl.is/mm/frettir/innlent/2008/12/09/ysa_greindist_med_somu_syki_og_sild/

Nú hefur gamli sjóhundurinn mestar áhyggjur af þessu.

[Vilhjálmur Jónsson (IP-tala skráð) 9.12.2008 kl. 07:44]

Sæll Sigurjón.

Tek undir að þú átt verðskuldar mikið hrós fyrir að halda uppi umræðu um sjávarútveg, bæði í ræðu og riti.

Í sbdi við umræðu hér að ofan vil ég inna þig eftir fáeinum atriðum, en jafnhliða taka fram að ég rek smábátaútgerð með kvóta.

1) Frjálslyndir tala fyrir því að taka frá sérstakar úthlutanir á tugþúsundum tonna af bolfiski. Mig langar að heyra, nokkuð ítarlega, hvernig staðið yrði að skiptingu þessarra veiðiheimilda og hverjir kæmu þar að máli.

2) Núverandi kvótakerfi er staðreynd, allavega í bili. Brottkast er líka staðreynd sem ráðamenn leiða hjá sér. Einhverjar tillögur um að ná þeim fiski í land til vinnslu, t.d. á þessu fiskveiðaári?

3) Hefur þú eitthvert álit á þeirri vélvæðingu í línuveiðum sem átt hefur sér stað undanfarin ár? Á mannamáli, hvað eru allir þessir önglar að drepa á grunnslóð þegar stórir sem smáir vélabátar eru með línu í sjó allan sólarhringinn.

Með bestu kveðju, Vilhj

[Þorgeir Ragnarsson (IP-tala skráð) 9.12.2008 kl. 08:57]

"Guðrún Helgadóttir sagði fyrir mörgum árum þegar lífeyrissjóðirnir voru miklu minni að miðað við eignir þeirra þá gætu þeir ráðið nokkurnveginn öllu því sem þeir vildu ráða. Síðan þá hafa lífeyrissjóðirnir stækkað mikið."

Þórður, viltu þá hafa litla lífeyrissjóði? Ég fyrir mitt leyti vil hafa minn sjóð sem stærstan...

[Gunnlaugur B Ólafsson, 9.12.2008 kl. 16:25]

Ég hafði ekki litið inn á þessa góðu Samfylkingarsíðu hans Sigurjóns í tvo daga. Sé að Halla finnst að ég hafi ekki svarað nógu vel fyrir allt og alla í flokknum. Þar á meðal er einhver krækja yfir á Karl V Matthíasson. Þannig er nú að Karl ber ekki undir mig hvað hann skrifar eða að ég beri undir hann hvað ég skrifa. Þið berið heldur ekki allt undir Ástþór Magnússon.

En þetta er samt, finnst mér, hin þokkalegasta grein hjá klerkinum. Mér sýnist að Halli sé ósáttur við að hann leggur til að ef að fiskveiðiheimildir yrðu auknar að þá færu þær á frjálsan/opin markað. Það finnst mér grundvallarmál að auknar heimildir fari ekki til sægreifanna eða þeirra sem að voru búnir að fá áður gjafakvóta. Þar verður Samfylkingin að standa sig og ég veit hún gerir það.

Hinsvegar trúi ég að þegar mestu lætin út af efnahagsþrengingum verða gengin yfir þá trúi ég að farið verði í grundvallarbreytingar á fiskveiðikerfinu þannig að það standist úrskurð mannréttindanefndar SÞ. En nú eru að koma jól og því aðalmálið að vera elskuríkir og hjartahlýir. Snúa umræðunni svo að hún bygggi á meðmælum og þrám, fremur en angist og mótmælum. Óskiði ykkur einhvers fallegs!