Leita í fréttum mbl.is

Davíð Oddsson birtir nýjar tölur

Ég skrifaði grein í gær sem birtist í DV í dag þar sem ég greindi frá því að hrein staða bankanna við útlönd væri neikvæð um 2.190 milljarða, en í dag birti Seðlabankinn nýjar tölur þar sem fram kom að staða bankanna hefði versnað frá þriðja ársfjórðungi 2007 til þess fjórða um rúma 600 milljarða. Fram kemur sömuleiðis að hrein staða þjóðarbúsins við útlönd væri neikvæð um 1.845 milljarða og hafði hún versnað um tæpa 500 milljarða sem samsvarar fimm Kárahnjúkavirkjunum.

Þessar miklu breytingar má eflaust rekja að miklu leyti til breytinga á mörkuðum og gengi íslensku krónunnar. Þetta eru skuggalegar sviptingar. Hér er greinin sem birtist í DV í dag:

Burt með verðtrygginguna   Mikil umræða er um blikurnar í efnahagsmálum þjóðarinnar og þrönga stöðu bankanna. Á einu ári hefur dæmið heldur betur snúist til hins verra fyrir bankana þar sem bankastjórar náðu vart að lenda þotunum sínum í fjármálamiðstöðvum heimsins áður en þeir tóku sig á loft á ný í enn einn víkinginn. Oftar en ekki voru tignir gestir með í för, s.s. forsætisráðherra og bóndinn á Bessastöðum. Þessi staða kom ráðamönnum í opna skjöldu og hafa viðbrögð forsætisráðherra verið að gera ekki neitt. Það fór nokkuð fyrir brjóstið á ungum þingmönnum Sjálfstæðisflokksins, þeim Illuga og Bjarna sem tóku af skarið og lögðu fram krampakenndar tillögur í efnahagsmálum svo vægt sé til orða tekið. Þeir vildu leysa málin með  því að hleypa verðbólgunni á hraðara skeið. Hið helsta sem Samfylkingin hefur lagt í púkkið við lausn mála er að skipta um mynt þótt allir sem eitthvað kynna sér málið ættu að vita að ekki er í myndinni að taka upp evru nema ná fyrst efnahagslegum stöðugleika. Í fyrsta lagi er Ísland ekki í Evrópusambandinu sem er skilyrði fyrir upptöku evrunnar en þótt Ísland gerðist aðili að Evrópusambandinu væri björninn ekki unninn. Aðrar kröfur sem settar eru fyrir upptöku evru eru þær að verðbólga sé ekki 1,5% hærri en í þeim þrem löndum Evrópusambandsins þar sem verðlag er hvað stöðugast. Sömu sögu er að segja um vexti, að þeir séu ekki 2% hærri en í fyrrgreindum löndum.

Íslendingar eru langt frá því að uppfylla þessi skilyrði þar sem vextir hér eru þeir hæstu í Evrópu og verðbólga er enn nálægt 7% en þyrfti að vera í kringum 2,5%. Það skiptir afar miklu við lausn mála að átta sig á ástæðunni fyrir rót vandans. Ein þeirra er án nokkurs efa gríðarleg erlend lántaka bankanna en þeir hafa borið inn í íslenskt efnahagslíf gríðarlegar upphæðir og endurlánað innlendum markaði. Í lok árs 2003 var hrein staða bankanna við útlönd neikvæð um 471 milljarð en fjórum árum síðar hafði staða þeirra versnað um 1.718 milljarða og var orðin neikvæð um 2.190 milljarða. Þetta eru gífurlegar sviptingar á örfáum árum. Bankarnir höfðu greiðan aðgang að erlendu lánsfé á lágum vöxtum sem þeir endurlánuðu á hæstu vöxtum í Evrópu og voru þar að auki gulltryggðir fyrir gengisbreytingum þar sem lánin voru verðtryggð til íslenskra lántakenda. Verðtryggingin hefur því átt gríðarlega stóran þátt í að skapa þá stöðu sem bankarnir eru nú í þar sem lítt hefur verið hvatt til innlends sparnaðar, einungis slegin lán í útlöndum sem dælt hefur verið inn á markaðinn.     

Við afnám verðtryggingar gæti lánveitandi ekki varpað allri ábyrgð á verðbólguáhættu á lántakandann og það mundi ýta undir ábyrga efnahagsþróun. Við breytinguna mundi einnig skapast þrýstingur til lækkunar vaxtastigs í landinu þar sem lánveitendur og lántakendur yrðu að taka mið af raunhæfum vaxtakröfum. Seðlabanki Íslands sem hefur af einhverjum óskiljanlegum ástæðum látið hjá líða að setja þak á hreina erlenda skuldastöðu bankanna þarf að fara að negla upp þak. Bönkunum er nauðugur sá kostur að grípa til aðhalds í rekstri til þess að eiga þess kost að endurfjármagna skuldasúpuna á sæmilegum kjörum. Sömuleiðis þurfa stjórnvöld að grípa til raunverulegra aðgerða, s.s. að gæta aðhalds og hvetja til sparnaðar. Í sjálfu sér ætti að vera greið leið fyrir íslenskt efnahagslíf að vinna sig út úr stöðunni en það verður ekki gert með einhverju froðusnakki um evru eða að hleypa verðbólgunni af stað heldur raunverulegum aðgerðum.


mbl.is Skuldatryggingarálag allra bankanna lækkar
Tilkynna um óviðeigandi tengingu við frétt

« Síðasta færsla | Næsta færsla »

Athugasemdir

1 Smámynd: Jóhann Elíasson

Reyndar mætti lesa mest af minni gagnrýni á þessa vitleysu á:http://johanneliasson.blog.is/blog/johanneliasson/entry/464602/  Því er við þetta að bæta að ríkisstjórnin getur haft áhrif, til hins betra, með því að spara í ríkisútgjöldum, þar á ég ekki við að það eigi að spara í þeirri þjónustu, heilbrigðisþjónustu, félagsþjónustu eða menntamálum, HELDUR Í REKSTRI HINS OPINBERA en það er aldrei niðurskurður í rekstrinum heldur í þjónustunni sem ríkið veitir okkur skattgreiðendum sínum þessu þarf að breyta og viðskiptabankarnir þurfa að hreinsa upp eigin "skít" áður en er farið að tala um að bjarga þeim.  Hvað skyldu þessar ferðir hjá Geir Haarde, til London og New York til að bæta ímynd bankanna kosta og hver borgar?

Jóhann Elíasson, 4.3.2008 kl. 21:55

2 identicon

Varðandi verðbólgumarkmið v/ ESB aðildar, þá er rétt skv. Maastricht skilyrðunum svokölluðu að hún skuli ekki vera meira en 1,5 prósentustigum hærri en meðaltal verðbólgu þeirra tvegga ESB ríkja þar sem hún er næst.  Þetta þýðir m.ö.o. að verðbólgan á Íslandi hefði þurft að vera 3,1% á síðasta ári.  Þess í stað var hún 3,7% hér, eða 0,6 prósentustigum yfir því markmiði.

 NB:  Hér er miðað við samræmda vísitölu neysluverðs sem er hinn rétti mælikvarði á verðlagsbreytingu neyslu því fjárfestingar eru ekki neysla (húsnæðisliðurinn).

Ef haldið er fast í 2,5% verðbólgumarkmið Seðlabanka er rétt að fara að miða við réttar verðbólgumælingar, þ.e. samræmda vísitölu neysluverðs.  Það sjá líka allir að ólíkt betra er fyrir skuldara að sjá lánin hækka verðtryggð með lægri verðhækkanastuðli.

Verðbólguhækkanir hafa fram að þessu fyrst og fremst verið vegna húsnæðisliðarins.  Nú eru blikur á lofti og verðhækkanir eru fyrst og fremst á neysluliðum.  við þessu má spyrna ef stjórnvöld lækka t.a.m. tímabundið álögur á eldsneyti og aðrar neysluvörur.  En NB: hafa ber vökul augu á að ábatinn hverfi ekki í "ranga" vasa, líkt og þegar vsk á matvæli var lækkaður.

NN (IP-tala skráð) 5.3.2008 kl. 09:25

3 Smámynd: Sigurjón Þórðarson

NN, takk fyrir athugasemdina. Það má efast um að það sé vænlegt að taka húsnæðisliðinn út úr vísitölunni á þessum tímapunkti burtséð frá þeim gildu rökum hvort hann eigi að vera inni í vísitölunni eða ekki. Það er nefnilega ólíklegt að húsnæði hækki meira umfram almennt verðlag á næstu misserum og jafnvel eru meiri líkur á að þær hækkanir dragist aftur úr öðrum hækkunum. Með því að hafa húsnæðisliðinn áfram inn mun það eflaust sýna lægri verðbólgumælingu en ella.

Sigurjón Þórðarson, 5.3.2008 kl. 10:23

4 Smámynd: Baldur Fjölnisson

"""Vísitala neysluverðs er reiknuð samkvæmt íslenskum lögum (nr. 12/1995 og nr. 27/2007). Útreikningur vísitölunnar tekur hins vegar að verulegu leyti mið af aðferðum sem beitt er við útreikning á samræmdri vísitölu neysluverðs
sem reiknuð er fyrir EES ríki. Samræmda neysluverðsvísitalan er reiknuð í samræmi við ESB lög sem um hana gilda.




1.1 Efnislýsing

Vísitala neysluverðs er Lowe fastgrunnsvísitala, keðjutengd í mars ár hvert. Vísitalan hefur sterka drætti framfærsluvísitölu því í henni er leiðrétt fyrir staðkvæmni með því að nota margfeldismeðaltal í grunni. Keðjuvogir eru notaðar til að leiðrétta staðkvæmni milli verslana og gæðaleiðréttingum beitt til að leiðrétta staðkvæmni vegna innkaupa heimila. Þjónusta við búsetu í eigin húsnæði er reiknuð sem einfaldur notendakostnaður. Flokkun sem notuð er fylgir alþjóðlega flokkunarkerfinu COICOP (Classification Of Individual COnsumption expenditure by Purpose)."""

http://hagstofa.is/pages/1517/?src=../../vorulysingar/v_transporter.asp?filename=V01011.htm

Birt til fróðleiks, BF. 

Baldur Fjölnisson, 5.3.2008 kl. 15:02

5 Smámynd: Baldur Fjölnisson

"""Vísitalan hefur sterka drætti framfærsluvísitölu því í henni er leiðrétt fyrir staðkvæmni með því að nota margfeldismeðaltal í grunni. Keðjuvogir eru notaðar til að leiðrétta staðkvæmni milli verslana og gæðaleiðréttingum beitt til að leiðrétta staðkvæmni vegna innkaupa heimila."""

Fimmþúsundkall segir að innan við eitt prósent landsmanna skilji hvernig hið opinbera skilgreinir og hannar verðbólguna.  

Baldur Fjölnisson, 5.3.2008 kl. 15:04

6 Smámynd: Halla Rut

Góð grein hjá þér Sigurjón.

Halla Rut , 6.3.2008 kl. 09:34

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Bloggvinir

Innskráning

Ath. Vinsamlegast kveikið á Javascript til að hefja innskráningu.

Hafðu samband