Á drykkjuhneigð Íslendinga rót sína að rekja til lélegrar fæðu?

Um nokkurt skeið hef ég haft áhuga á náttúrulækningum og markast sá áhugi af því að bróðir minn hefur um árabil rekið fyrirtækið Eðalvörur sem flytur inn rautt Eðalginseng alla leið frá Kóreu. Svo hef ég einnig góða reynslu af vallhumalssmyrslum. Ég hef m.a.s. aðstoðað við gerð þeirra. Það er þó ekki vegna þess að ég lifi af baunaspírum sjálfur eða sé mikill meinlætamaður.

Einn merkasti brautryðjandi í þessum efnum, sá sem ruddi brautina í þessum náttúrulækningum, er Jónas Kristjánsson, stofnandi Náttúrulækningafélagsins. Jónas starfaði um árabil hér á Sauðárkróki, lungann úr starfsævi sinni þar sem skrifaði margan fyrirlesturinn um hugðarefni sín sem ég hef verið að kynna mér. Það má segja að kjarninn í þessum boðskap eigi aldrei betur við en einmitt núna. Hann leggur áherslu á að betra sé heilt en vel gróið. Hann bendir á mikilvægi fæðunnar og ábyrgð einstaklingsins á eigin heilsu.

Hann tekur líka á offóðrun eins og hann kallar það, er talsmaður hófsemdar í allri inntöku. Ég er á því að sá boðskapur eigi sérlega vel við nú.

Eins og sönnum hugsjónamanni sæmir hættir Jónasi til að ætla að skýra öll mannanna mein með hugðarefni sínu sem er rangt mataræði. Hann varpar t.d. fram þeirri spurningu hvort drykkjuhneigð Íslendinga stafi af „lífsnauðri“ fæðu sem landinn neytir í miklum mæli.

Alkóhólið er deyfilyf sem felur þreytu og þyngd til skamms tíma, segir Jónas. Það væri ekki úr vegi að kanna þessa kenningu Jónasar, nú vofir helgin yfir og miklir bjórsvelgir ættu að vita hvort ekki slægi á þorstann að koma við á grænmetisbarnum. 

Athugasemdir

[Eggert Vébjörnsson (IP-tala skráð) 9.11.2007 kl. 13:00]

Ja því ekki það Sigurjón.

Nú tek ég eftir að þú segir drykkjuhneygð en ekki drykkjusýki í þessu samhengi þannig að þú ert vafalaust að tala um þá sem drekka of mikið þrátt fyrir að vera ekki alkohólistar. Nú veit hver þokkalega stálpaður fullorðinn einstaklingur hvað gott mataræði, svefn og fleira hefur mikilvæg áhrif á andlega- sem líkamlega líðan.

Ef maður innbyrðir mikið rusl fæði þá er það fljótt að segja til sín svo ég tali fyrir mína parta allavega. Maður verður orkulaus og finnur fyrir ýmiskonar vanlíðan. Svoleiðis einkenni  eru ekki ólíkleg til þess að fólk helli í sig einum eða tveimur þannig að þessi rökfræði heldur alveg.

Svo nú sé ekki minnnst á offituvandamálið og aðra þá lífsstílssjúkdóma sem fylgja röngu og lélegu mataræði.

kær kveðja

Eggert 

[Jóhann Elíasson, 9.11.2007 kl. 15:37]

Mjög góðar pælingar Sigurjón.  Eggert Vésteinsson kemur með mjög skemmtilegan vinkil á þetta mál, þetta er nokkuð sem þarf að rannsaka.

[Guttormur Sigurðsson (IP-tala skráð) 9.11.2007 kl. 15:59]

Þegar ég var 27 ára lærði ég hugleiðslu af indverskum jóga. Á sama tíma fór ég á jurtafæði (borðaði reyndar einnig mjólkurvörur). Ég bæði reykti og drakk stundum vín á þessum tíma. Eftir að hafa tekið upp þennan nýja lífsstíl, hvarf fljótlega öll löngun mín í bæði tóbak og vín. Einnig fækkaði bíóferðum mínum um ca. 90 prósent. Ég held að þetta hafi meir með "fóður" handa huganum að gera heldur en mataræði. Ef löngunum hugans er ekki stýrt inn á fíngerðari svið getur fólk lent í allskyns neysluvandamálum. Ég gæti útskýrt þetta betur en læt þetta nægja.

[Aron Berg (IP-tala skráð) 9.11.2007 kl. 23:05]

Já ég held að ég sé sammála Eggerti með þessi offituvandamál.

og "Allt er gott í hófi"

 

T.d. ég er með mígreni svo ef ég er að borða mikið af óhollum mat eða mat sem inniheldur msg,þá verð ég bara fárveikur.

[Þorsteinn Ásgeirsson (Icerock), 9.11.2007 kl. 23:48]

Alveg laus við þessa vínlaungum enda aldrei verið svangur á ævinni, og nú hámar maður í sig grænmeti og líður miklu betur :)

[Guðrún María Óskarsdóttir., 10.11.2007 kl. 02:31]

Sæll Sigurjón.

Sjálfsagt að velta spurningum upp um þessi mál, maður er það sem maður borðar.

kv.gmaria.

[Guðjón Sigþór Jensson, 10.11.2007 kl. 08:29]

Einu má aldrei gleyma og það er umhverfið og áhrif þess á einstaklinginn. Óæskileg áhrif geta t.d. verið slæmur félagsskapur. Drykkjuskapur fyrrum var oft tengdur slæmum aðbúnaði, fátækt og lélegri atvinnu. Þannig voru búðirnar á þéttbýlisstöðunum oft þéttsetnar af körlum sem biðu eftir því að einhver átti leið framhjá og kaupmaðurinn bauð upp á staup.

Þegar boðskapur templara frá Bandaríkjunum barst hingað til lands upp úr 1880 varð hér nokkur breyting. IOGT (International order of good fellows minnir Mosa að eigi að lesa úr þessari skammstöfun) hafði miklar hugarfarsbreytingar. 

Mjög merkilegt er að verkalýðshreyfingin yfirtók furðumargt úr félagsskap templara. Þannig var rökstuðningur fyrir því að halda sér frá brennivíninu og öðrum áfengum drykkjum að neysla þeirra drægi stórlega úr fátækt og vesöld einstaklingsins. Neysla þessara drykkja ætti því stóran þátt í að halda fólki í fátæktargildrunni. Er þetta ekki sama uppi á teningnum í dag með eiturlyfjunum? 

Með templurum opnaðist nýr heimur fyrir fátækt fólk: það tók allt í einu þátt í formlegum félagsskap. Þegar verkalýðsfélögin voru stofnuð um og eftir aldamótin 1900 höfðu þau skipulag og fundarsköp templara til fyrirmyndar sínum félögum. Meira að segja var gjaldkeri Dagsbrúnar nefndur „fjármálaritari“ - nokkuð skemmtilegt orð - í lögum félagsins! Sennilega hefur þessu verið breytt og er eftirsjá að þessu orði sem komið er inn í íslenskuna frá templurum.

Annars er fróðlegt að skoða nýja fleti á hinum ýmsu málum.

Jú það sem þú Sigurjón beinir athygli a: auðvitað er það sem við etum og drekkum sem hefur bein áhrif á líf okkar og störf!

Bestu kveðjur norður heiðar! 

Mosi - alias 

[Hanna, 10.11.2007 kl. 09:53]

Það er alltaf jafn áhugavert að lesa skrifin þín Sigurjón.  Ekki bara vegna málefnanna heldur líka vegna þess að þú skrifar bæði einstaklega vel og skemmtilega.

Mér datt eitt í hug þegar ég las þetta og það er að þynnka kallar yfirleitt á ruslfæði.  Það er auðvitað afleiðing en ekki orsök og þó....   Það er örugglega heilmikið til í þessu hjá þér.

[Gunnlaugur B Ólafsson, 10.11.2007 kl. 15:05]

Sæll Sigurjón Gaman að sjá þig ræða eitthvað annað en um fjölda þorskhausa í sjónum og hver eigi þá.

Líkamsvitund og sjálfstjórn spila saman í að móta orkujafnvægi okkar og atferli.

Jónas hefur án efa verið á undan sinni samtíð að mörgu leyti.

[Guðrún Jóhannesdóttir, 10.11.2007 kl. 16:06]

Var að flakka í bloggveröld og rakst hér inn hjá þér, reyndar ekki í fyrsta sinn Sigurjón minn.

Bestu kveðjur 

Gunna

(Gunnukaffi Hvammstanga )

[Sigurjón Þórðarson, 10.11.2007 kl. 19:09]

Eggert: það er rétt að offita er vaxandi vandamál en afleiðingar hennar munu því miður nokkuð örugglega þjaka heilbrigðiskerfið í vaxandi mæli.

Guttormur: Ég hef aldrei reynt jóga en mér var ráðlagt á sínum tíma að fara í jóga en það er nú reyndar nokkuð langt að sækja jógatíma héðan frá Sauðárkróki.

Fullur: Hvernig er það er það ekki hluti af nautninni að verða svangur til þess að fá virkilega nautn út úr því að borða og verða vel saddur á ný?

Mosi: Þetta er afar athyglisvert innleg og það er eflaust vel þess virði að kynna sér sögu templarahreyfingarinnar.

Hæna: Maður fer eilítið hjá sér við að lesa þetta hól en varðandi þynnkuna þá á ég það að horfa á heila formúlu ef ég er þunnur en annars horfi ég gjarnan eingöngu á startið og lokin.

Gulli:  Þú skalt bara þakka fyrir að ég skirfa um þorskinn en ekki langa pistla um hin áhugamál mín sem eru sund og skólp.

Magga: Þú verður að koma aftur í mat og rifja þetta upp.

Gunna: Gaman að sjá þig hér og skilaðu endilega góðri kveðju til alls þíns fólks.

[Halla Rut , 10.11.2007 kl. 22:58]

Skemmtilegar pælingar hjá þér og fara vel við rauðvínsglasið úr beljunni sem ég keypti í mjólkurbúð ríkisins fyrir helgi.

[Guðrún Þóra Hjaltadóttir, 11.11.2007 kl. 16:54]

Trúlega hefur neysla fólks mikil áhrif á líf þess, bæði hvað varðar hegðan og líðan. Síðari tíma rannsóknir hafa leitt það í ljós að spenna og hraði sem að einkennir líf okkar hefur mjög mikil áhirf á neyslu okkar bæði hvað mat og drykk varðar. Ef vinfrumvarpið nær í gegn verður líka mikil breyting á víndrykkju fólks. Því það sem alltaf er fyrir augunum á fólki verður jú sjálfsagðir hlutur. Það vita aulýsendur, þess vegna hamra þeir á okkur stöðugt með myndum og orðum.