Mun stærra mál á Akureyri en tjaldstæðismálið ógurlega

Já, svo virðist sem Björn Ingi Hrafnsson, stjórnarformaður Faxaflóahafna, hafi verið að vísa til Brims þegar hann sagði í fréttum í gær að áfram yrði fiskvinnsla í húsakynnum HB Granda í Reykjavík. Og ef Guðmundur Kristjánsson flytur Brim og setur það niður við Norðurbakkann í Reykjavík verður það mun stærri skellur fyrir Akureyri og Eyjafjörð en þegar ungmennum á aldrinum 18-23 ára var meinað þar um tjaldstæði á eigin vegum um verslunarmannahelgina.

Hvað gera menn nú á Akureyri?

Athugasemdir

[Gísli Baldvinsson (IP-tala skráð) 11.8.2007 kl. 14:13]

Stutt svar yrði: Lengjum flugvöllinn strax enda mun hagkvæmara að fljúga fiski frá Akureyri. Þá þyrfti einnig að setja lög um "tollklareringu" á Akureyrarvöll. Í dag þarf að tollstimpla allan farm í Reykjavík.

Bendi þér á skoðanir mína á tjaldstæðamálinu ógurlega á minni bloggsíðu. Sem sagt ég er ekki viss að Guðmundur flytji. Frekar að hann stækki.

[Kolbrún Stefánsdóttir, 11.8.2007 kl. 20:40]

Eiga Akureyringar ekki nógan kvóta? Hafa þeir ekki verið að þurrka upp plássin í kringum sig og kaupa víða um landið?

Ég held að Guðmundur í Brim geri bæði. þ.e flytji og stækki.  ;)

[Úlfar Þór Birgisson Aspar, 12.8.2007 kl. 07:05]

Já þú segir nokkuð Sigurjón,spurning hvort hús Granda sé fullkomnara en hús Brims á Akureyri,Akureyringar hafa jú alltaf verið með góða vinnslu of framsæknir í vöruþróun.

En jú eins og við vitum þá vegna kvótastöðu mun jú nú verða hagrætt um land allt og næsta vor verður umhverfið fróðlegt svo ekki sé nú meira sagt,ég er ansi hræddur um að hart verði barist um eignastöðu næstu mánuði hér og þar og mest allir peningar vegna fiskveiða gufa síðan upp í verðbréfahruni.

Kveðja Úlli.

[Úlfar Þór Birgisson Aspar, 12.8.2007 kl. 07:06]

P.S ekki of framsæknir heldur og framsæknir

[Heimir Lárusson Fjeldsted, 12.8.2007 kl. 10:43]

Stórmál eiga á hættu að falla í skugga minni mála hjá norðlenskum, því miður.

[Sigurgeir Jónsson, 12.8.2007 kl. 12:16]

Bann við samþjöppun aflaheimila og krafa um að kvóta skuli skipt niður á sveitarfélög með handafli þýðir ekkert annað en stöðvun allrar famþróunar í sjávarútvegi og spillingu og tap.Byggðakvótinn er skýrasta dæmi um að útilokað er að láta pólitíkusa úthluta kvóta.Sveitarstjórnarmenn hafa úthlutað sjálfum sér kvótanum, í sumum tilfellum hafa verið nótulaus viðskipti með hann.Allt gert með samþykki sjávarútvegsráðherra.Á síðasta ári sendi umboðsmaður alþingis frá sér þrjú álit þar sem hann sagði að  lög hefðu verið brotin.Hann sendi frá sér eitt álit í viðbót fyrir mánuði síðan. Það var upp á tuttugu og átta síður.Byggða kvótanum fyrir árið 2006-2007 hefur enn ekki verið úthluta.Síðan dettur einhverjum kvótalitlum útgerðarmönnum,  eða mönnum sem vilja hefja útgerð, að hægt sé að láta sveitastjórnarmenn útdeila kvóta.Þing mönnum frjálslyndaflokksins var fullkunnugt um spillinguna með byggðakvótann á síðasta kjörtímabili, þar á meðal Sigurjóni Þórðarsyni.Hann gerði ekkert ,samflokksmenn hans á þingi ekki heldur. kanski málið hafi verið þeim tengt.

[Sigurjón Þórðarson, 12.8.2007 kl. 12:38]

Gísli það er ljóst á skrifum þínum að Samfylkingin stendur þétt á bak bæjarstjóra Sjálfstæðisflokksins í því að meina ungmennum að tjalda á Akureyri - Ég tel þetta vægast sagt vafasama og ómálefnalega ákvörðun. 

 Lagalega er þetta mjög vafasöm ákvörðun hjá Akureyrarbæ þar sem að sveitarstjórnir geta ekki endurskilgreint hvenær fólk er sjálfráða.  Ákvörðunin fól í sér að Íslendingar á aldrinum 18-23 ára var meinaður aðgangur nema í fylgd forráðamanna! Þetta gengur ekki upp.

Gísli ég tel vafasamt að það séu mörg útvegsfyrirtæki sem hyggja á stækkun í þessum niðurskurði á aflaheimildum sem Samfylking og Sjálfstæðisflokkur standa fyrir.  Flokkarninr sameinast ennfremur í að neita að fara yfir með gagnrýnum hætti yfir forsendur og veikan grundvöll þessara ákvörðunar.

 Það er rétt hjá Kolbrúnu að stærri útgerðir hafa keypt til sín aflaheimildir víða um land.  Hvað hefur það leitt af sér?  Stærri útgerðir hafa til umráða stærri hluta af veiðiheimildum landsmanna en tonnin sem þau fá að landa fækkar samt sem áður. Það gerist vegna þess að heildarúthlutunin hefur farið minnkandi.  Það eru sem sagt allir að tapa á óbreyttu kerfi.  Þeir sem áður töldu sig vera ofan á og "spiluðu með í kerfinu"  s.s. Akureyringar og Eskfirðingar horfa nú fram hættu á að aflaheimildiri hverfa úr byggðalögunum.  

Það er mikilvægt að horfa á heildarmyndina og viðurkenna að núverandi kerfi er ekki að ganga upp og það er nánast klám að halda því fram eins og Ingibjörg Sólrún Gísladóttir gerir að það ríkir einhver stöðugleiki í sjávarútvegi.

Úlli Það er margt spekúlerað og mörgu velt upp varðandi framtíð fiskvinnslunnar í Eyjafirði.  Einhver hélt því fram við mig að ein ástæðan fyrir því að Samherji hefði hætt við byggingu fiskvinnslu á Dalvík hefði verið sú að Samherja stæði til boða að kaupa fiskvinnslu Brims á Akureyri. 

[Sigurjón Þórðarson, 12.8.2007 kl. 12:50]

Hvernig er það Sigurgeir, mótast afstaða þín til kvótakerfisins ekki af þröngum persónulegum hagsmunum en þú leigir frá þér ófá tonn og halar inn milljónir úr vösum leiguliða sem þurfa að greiða þér fyrir að sækja í sameiginlega auðlind þjóðarinnir?

Kerfið hefur brugðist en það átti að leiða til uppbyggingar en ekki niðurskurðar á aflaheimildum. Veiðin á næsta ári verður um 1/3 af því sem hún var að jafnaði fyrir daga kvótakerfisins

[Fannar frá Rifi, 12.8.2007 kl. 13:47]

Þið þreytist seint á því að vera svartsýnir.

[Gísli Baldvinsson (IP-tala skráð) 12.8.2007 kl. 22:58]

1. "Akureyringar" eiga engan kvóta. 

2. "Ómálefnaleg" ákvörðun vegna aldurstakmarkana er hreinlega byggð á lögreglusamþykktum sem byggja á lögum.  Spurðu lögfræðingana. 

kv gb

[Sigurjón Þórðarson, 13.8.2007 kl. 01:50]

Gísli hér er lögreglusamþykktin.  Hvar stendur það í henni að það megi mismuna sérstaklega fólki á aldrinum 18 - 23 ára?   

I. KAFLI

Um reglu, velsæmi og almennt öryggi á almannafæri

Regla og næði




1. gr.Bannað er að aðhafast nokkuð það, sem veldur ónæði eða raskar næturró manna.
2. gr.Enginn má sýna öðrum áreitni á almannafæri eða sýna þar af sér ósæmilega hegðun.

Uppþot, áflog eða önnur háttsemi, sem raskar allsherjarreglu, má ekki eiga sér stað á almannafæri og ekki mega menn þyrpast þar saman, ef það truflar umferð eða veldur vegfarendum öðrum óþægindum.

3. gr.Lögreglustjóri getur bannað notkun hátalara, hljómflutningstækja, hljóðfæra eða annars þess háttar, á eða við almannafæri, ef ástæða er til að ætla að hún valdi ónæði eða truflun.
4. gr.Þegar fjölmenni safnast saman á almannafæri, við biðstöðvar almenningsvagna, miðasölur, skemmtistaði, verslanir og aðra afgreiðslustaði, skal fólk raða sér þannig að þeir, sem fyrstir koma, fái fyrst afgreiðslu.
5. gr.

Hver sá, sem staddur er á almannafæri, er skyldur að segja til nafns síns og heimilis, þegar lögreglan krefst þess.

Góðir umgengishættir og hreinlæti á almannafæri

6. gr.Öllum ber að gæta þess að ganga vel um á almannafæri og skemma þar ekki hluti eða færa þá úr stað, sem ætlaðir eru til almenningsnota eða prýði. Þetta á einnig við þann hluta af húsum og öðrum mannvirkjum, sem liggja að almannafæri.

Á slík mannvirki og hluti má ekki mála eða teikna og ekki festa auglýsingar, nema með leyfi eiganda eða umráðamanns, sbr. og reglur um skilti nr. 412/1993.

Þess skal gætt að troða ekki ræktaða bletti, grasreiti, blómabeð og limgerði á almannafæri og bannað er að slíta þar upp gróður.

7. gr.Enginn má án leyfis húsráðanda láta fyrir berast á eða í húsi hans, á lóðum eða á girðingum, sama á við um þessa staði og aðra sambærilega ef lögregla bannar það, enda verði það talið geta valdið óþægindum eða hættu.

Ekki má fara í híbýli manna í söluerindum, ef húsráðandi leggur við því bann.

8. gr.Í samræmi við ákvæði heilbrigðisreglugerðar, nr. 149/1990, er bannað að skilja eftir, flytja eða geyma úrgang á þann hátt að valdið geti skaða, mengun eða lýti á umhverfinu. Þetta gildir jafnt um smærri sem stærri hluti svo sem kerrur, bíla, bílhluta, skipsskrokka o.fl. Heimilt er að fjarlægja framangreinda hluti, þ.m.t. númerslausar bifreiðar og bílflök að undangenginni aðvörun, t.d. með álímingarmiða með aðvörunarorðum þar sem tiltekinn er ákveðinn frestur eiganda til úrbóta. Frestur þessi skal að jafnaði vera 7 dagar en þó skemmri ef hætta, mengun o.s.frv. stafar af.

Bílflökum og öðrum verðlausum hlutum er heimilt að farga strax að fresti loknum. Númerslausar bifreiðar sem þannig eru teknar, skulu vera í vörslu Akureyrarbæjar í 45 daga að fresti loknum, en þeim síðan fargað hafi eigandi ekki fyrir þann tíma leyst þær út gegn áföllnum kostnaði, svo sem dráttar- og geymslugjaldi. Liggi fyrir skrásetningar-númer bifreiðar, vélarnúmer eða annað sambærilegt, þannig að kunnugt sé um eiganda hennar skal honum tilkynnt um förgunina með tryggilegum hætti með 15 daga fyrirvara. Þá skal viðkomandi sýslumanni, eftir atvikum bifreiðaskrá, og veðhöfum, sé um þá kunnugt, gert viðvart um förgunina með 15 daga fyrirvara.

Áfallinn kostnað vegna töku og geymslu númerslausra bifreiða er heimilt að innheimta hjá eigendum bifreiðanna skv. ákvæðum laga um hollustuhætti og heilbrigðiseftirlit, nr. 81/1988, með áorðnum breytingum. Þá skal og heimilt að selja nýtilega hluti úr bifreiðum, sem fara skal með samkæmt framansögðu, til þess að mæta kostnaði vegna töku og geymslu þeirra.

9. gr.Bæjarstjórn getur sett umgengnisreglur um skemmtigarða, kirkjugarða, leikvelli, lystigarða og önnur opinber svæði, enda séu reglurnar festar upp við innganginn eða á öðrum áberandi stað.
10. gr.Enginn má raska friði fugla á fuglatjörnum í bænum eða annars staðar í lögsagnarumdæminu.

Óheimilt er að áreita dýr eða raska friði þeirra, svo hættu eða ónæði geti valdið. Ákvæði þetta á ekki við um meindýr, varg o.fl. er sér ákvæði gilda um. Að öðru leyti vísast til ákvæða laga um verndun dýra, nú lög nr. 16/1994, og laga um vernd, friðun og veiðar á villtum fuglum og villtum spendýrum, nú lög nr. 19/1994.

Almennar reglur um öryggi á almannafæri, skyldur húsráðenda o.fl.

11. gr.

Meðferð vatns, s.s. við þrif, er óheimil nema í frostlausu veðri, ef þrifin valda rennsli á gagnstétt eða götu eða geta valdið truflun á umferð á annan hátt. Haga skal þrifunum þannig að sem minnst ónæði stafi af þeim fyrir vegfarendur.

Í götubrunna og göturæsi má ekki hella mengandi efnum s.s. spilliefnum o.s.frv., sbr. og reglugerð um fráveitu á Akureyri nr. 87/1990.

Eiganda eða umráðamanni húss er skylt að fjarlægja af húsi sínu snjó og grýlukerti, sem fallið geta niður og valdið hættu fyrir vegfarendur.

Húseigendum er skylt að hlíta fyrirmælum bæjaryfirvalda um frágang girðinga o.þ.h. sem liggja að almannafæri. Einnig skal húsráðendum skylt að snyrta allan gróður, þ.m.t. trjágróður, sem liggur að almannafæri þannig að umferð vegfarenda sé óhindruð. Gróður, s.s. tré, runnar o.s.frv., skulu ekki skaga út í eða út yfir gangstéttar, gangstíga eða götur, þó er heimilt að þau skagi út yfir, ef hæð þeirra er a.m.k. 2,8 m yfir gangstétt eða gangstíg, en 4,0 m yfir götu. Nánari reglur um skerðingu gróðurs skulu settar af tækni- og umhverfisdeild Akureyrarbæjar og kynntar bæjarbúum með tryggilegum hætti. Hlíti húseigandi eða lóðarhafi ekki fyrirmælum bæjaryfirvalda um frágang samkvæmt þessari grein er heimilt að láta vinna verkið á hans kostnað enda sé honum tilkynnt um það með hæfilegum fyrirvara.

12. gr.Tilkynna skal lögreglustjóra um fyrirhugaðar hópgöngur, útifundi og því um líkt í því skyni, að hann geti gert viðeigandi ráðstafanir varðandi umferðarstjórn.
13. gr.Á almannafæri má ekki nota skotvopn, ganga með logandi blys eða kveikja í bálköstum, nema með leyfi lögreglustjóra. Einnig skal leita leyfis lögreglustjóra til að halda flugeldasýningar, nema ef sérstaklega stendur á, s.s. um áramót eða á þrettándanum.
14. gr.Lögreglustjóra er heimilt að banna öllum óviðkomandi, sem ekki eiga brýnt erindi, umferð út í skip, sem liggja í höfninni.
15. gr.Ef ís á Pollinum er ótryggur, getur lögreglustjóri bannað að farið sé út á hann eða sett upp viðvörunarmerki.
16. gr.Ekki má gera jarðrask, s.s. skurði í gangstéttir, götur eða torg bæjarins né raska þeim á annan hátt, nema með leyfi bæjaryfirvalda. Að verki loknu skal færa það í samt lag, sem raskað var. Þegar gerður er skurður í gangstétt, skal sá, sem verkið vinnur, sjá um að tryggja öryggi gangandi vegfarenda og annarra, s.s. með því að sjá fyrir göngubrautum og tryggja að vegfarendur séu aðvaraðir um farartálmann, s.s. með ljósum, glitmerkjum o.þ.h., þegar dimmt er. Slík verk skulu unnin þannig, að sem minnstur farartálmi verði. Lögreglustjóri gerir þær ráðstafanir, er honum þykir þurfa til að afstýra hættu fyrir vegfarendur. Getur hann bannað umferð um götur að nokkru eða öllu leyti, meðan á verki stendur, eða skipað fyrir um, hvernig umferðinni skuli hagað. Einnig getur hann ákveðið að skurðir í götur séu byrgðir og upp-gröftur fjarlægður, þannig að umferð sé óhindruð um göturnar á þeim tíma, sem ekki er unnið, svo sem að næturlagi og um helgar. Þá getur lögreglustjóri, ef hann telur framkvæmdir dragast um of, látið setja í samt lag það, sem raskað var, á kostnað þess, sem verkið átti að vinna.
17. gr.Þegar hús er byggt, rifið, endurbyggt eða flutt, er eiganda eða verktaka skylt að leita eftir fyrirmælum lögreglustjóra, til að forðast farartálma, hættu eða óþægindi fyrir vegfarendur.

Girðingar, sem hafa verið reistar vegna mannvirkjagerðar, skal fjarlægja, þegar þeirra er ekki lengur þörf.

Þegar hús eða annað mannvirki brennur, það fjarlægt eða rifið burt, án þess að annað sé byggt í staðinn, er eiganda skylt að ganga svo frá hússtæðinu, að ekki stafi af því hætta, óþrifnaður eða óprýði.

18. gr.Óheimilt er að grafa grunn, reisa hús, rífa hús eða breyta því eða notkun þess eða gera önnur þau mannvirki, sem áhrif hafa á útlit umhverfis, nýtingu lóða, grundvöll gjaldtöku og skatta o.s.frv., nema að fengnu leyfi bygginganefndar, sbr. 9. gr. byggingalaga nr. 54/1978.

Framangreint bann tekur til hverskonar mannvirkja og hluta sem nýttir eru sem mannvirki eða hús. Bann þetta tekur því til lausra húsa, skúra, gáma o.s.frv., þegar notkun þeirra er augsýnilega ekki í samræmi við eðlilega notkun og tilgang þeirra eða þeirra svæða, þar sem þeim hefur verið komið fyrir.

Heimilt er að láta farga slíkum hlutum eða fjarlægja þá, á kostnað eigenda og / eða lóðarhafa, ef hann sinnir ekki fyrirmælum byggingayfirvalda um að fjarlægja þau mannvirki eða hluti, sem um ræðir í þessari grein.

II. KAFLI

Um ökutæki, umferð o.fl.

19. gr.Vörubifreiðum, sem eru meira en 3,5 tonn að leyfðri heildarþyngd og hópbifreiðum sem eru meira en 5 tonn að leyfðri heildarþyngd, má ekki leggja á götum, einkalóðum í íbúðahúsahverfum eða almennings-bifreiðastæðum bæjarins, nema þau séu til þess ætluð. Bann þetta gildir einnig um hvers konar vinnuvélar og dráttarvélar, án tillits til þunga þeirra. Bæjarstjórn getur veitt undanþágu frá banni þessu og skal þá afmarka og merkja sérstaklega þá staði, sem undanþágan nær til. Undanþágan getur auk staðsetningar tekið til ákveðinna tímabila.

Lögreglustjóri getur bannað stöður hjólhýsa, húsbíla, báta, flutningavagna og þess háttar tækja á götum og almennings-bifreiðastæðum, ef þau þykja valda íbúum ónæði.

20. gr.Lögreglustjóri eða bæjarstjórn getur takmarkað eða bannað umferð stórvirkra vinnuvéla, vörubifreiða eða annarra bifreiða á einstökum götum, ef slík umferð er álitin hættuleg eða til sérstakra óþæginda fyrir aðra umferð.
21. gr.Umferð torfærutækja s.s. vélsleða, snjóbíla o.þ.h., innan lögsagnarumdæmis Akureyrar, skal háð fyrirmælum umferðarlaga.
22. gr.Aflvélar kyrrstæðra bifreiða og vinnuvéla sem ekki eru í annarskonar notkun, er óheimilt að hafa í gangi eða skilja eftir í gangi lengur en tvær mínútur, svo komast megi hjá ólofti og hávaða á almannafæri og annars staðar þar sem ætla má að slíkt valdi óþægindum.
23. gr.Almennur hámarkshraði í lögsagnarumdæmi Akureyrarbæjar skal vera 50 km á klst. Utan þéttbýlis og á einstökum götum eða bæjarhverfum getur lögreglustjóri, að fengnum tillögum bæjarstjórnar, ákveðið annan hámarkshraða.
24. gr.Þeir, sem flytja hvers konar farm um götur bæjarins, skulu gæta þess vandlega að ganga þannig frá honum, að ekki valdi óþrifnaði eða hættu. Ef eitthvað slæðist eða hrynur niður á almannafæri við flutninginn, fermingu eða losun, er stjórnanda flutningstækisins skylt að hreinsa það upp þegar í stað.
25. gr.Afgreiðslu fyrir þjónustubifreiðir eða bifreiðasölur má einungis hafa í því húsnæði eða á þeim stað, sem bygginganefnd hefur samþykkt til slíkra afnota. Bygginganefnd getur takmarkað leyfið við tiltekinn tíma og tiltekinn fjölda bifreiða og sett önnur þau skilyrði, sem þurfa þykir.
26. gr.Börn yngri en fjórtán ára, sem fara um á reiðhjólum, hjólabrettum, hjólaskautum, renna sér á skíðum, sleðum, skíðabrettum o.þ.h., skulu nota hlífðarhjálma og viðeigandi hlífðarbúnað.

 

III. KAFLI

Um götuspjöld og húsnúmer

27. gr.Bæjarstjórn ákveður nöfn á götum og lætur festa upp skilti með þeim, þar sem þurfa þykir, s.s. við gatnamót og á fasteignir.

Húseigendur skulu merkja hús sín með húsnúmeri og eftir atvikum bókstöfum, á götuhlið eða öðrum áberandi stað, vegfarendum og þjónustuaðilum til glöggvunar.

IV. KAFLI

Um verslun, veitingahús, skemmtanahald og knattborðs- og leiktækjastofur

28. gr.Utan sölubúða er sala á hvers konar varningi bönnuð með þeim undanþágum, sem hér greinir: Blöð, bæklinga, aðgöngumiða, happdrættismiða, merki og annað þessu skylt má selja á almannafæri. Bæjarstjórn getur veitt leyfi til vörusölu á torgum og öðrum stöðum, enda séu fyrirmæli um verslunarleyfi og önnur ákvæði laga því ekki til fyrirstöðu, að slík leyfi séu veitt. Skal leyfi bæjarstjórnar bundið við ákveðnar vörutegundir og er heimilt að setja leyfinu þau skilyrði, sem talin eru nauðsynleg.
29. gr.Veitingastaði er heimilt að hafa opna frá kl. 06.00 til 03.00. Allir gestir skulu hafa farið út eigi síðar er 1/2 stundu eftir að lokað er, nema gestir á hótelum og öðrum gististöðum, sem hafa þar náttstað eftir lokunartíma.

Dómsmálaráðherra getur heimilað að skemmtanir megi standa lengur en að framan greinir, ef sérstaklega stendur á. Hið sama gildir um einkasamkvæmi á umræddum stöðum.

Bæjarstjórn getur ákveðið annan afgreiðslutíma en um ræðir í 1. mgr., til lengingar eða til styttingar.

Heimilt er að reka heimsendingarþjónustu allan sólarhringinn.

Á veitingastað með reglubundna skemmtistarfsemi þar sem heimilt er að sýna nektardans (næturklúbbar), er lagt bann við hverskonar einkasýningum og einkadansi. Dansatriði skulu einungis fara fram á einu afmörkuðu svæði í veitingasal þar sem tryggt er að fjarlægð milli dansara og áhorfenda sé a.m.k. 4 metrar. Dönsurum er óheimilt að fara um á meðal áhorfenda.

30. gr.

Óheimilt er að selja börnum innan 14 ára aðgang að leiktækjum. Miðað skal við fæðingarár. Starfsmenn leiktækja- og spilastofa skulu ekki vera yngri en 18 ára. Leiktækja-spila- og knattborðsstofur má reka frá kl. 12.00 - 23.30 daglega.

V. KAFLI

Um staðgildi samþykktarinnar, hegningarákvæði o.fl.

31. gr.Samþykkt þessi gildir fyrir lögsagnarumdæmi Akureyrar. Hana ber að túlka með hliðsjón af gildandi lögum og reglum hverju sinni, s.s. hegningarlögum, byggingalögum, umferðarlögum o.s.frv.
32. gr.Brot gegn samþykkt þessari varða sektum, ef ekki liggur við þyngri hegning að lögum og skulu refsimál rekin að hætti opinberra mála

Hagnaður sá, sem sökudólgur kann að hafa haft af athæfi sínu og enginn einstakur maður eða lögpersóna á löglegt tilkall til, skal gerður upptækur og renna, auk sekta, í ríkissjóð.

33. gr.Lögreglusamþykkt þessi, sem bæjarstjórn Akureyrar hefur samið og samþykkt samkvæmt lögum um lögreglusamþykktir nr. 36, 18. maí 1988, staðfestist hér með til að öðlast þegar gildi og birtist til eftirbreytni öllum þeim, sem hlut eiga að máli.

Jafnframt er numin úr gildi lögreglusamþykkt fyrir Akureyri, nr. 44, 28. apríl 1954, með áorðnum breytingum.

Samþykkt á fundi bæjarstjórnar Akureyrar 21. maí 1996.

Dóms- og kirkjumálaráðuneytið 19. ágúst 1996.
Breyting á 21. grein staðfest af Dóms- og kirkjumálaráðuneytinu 4. des. 2001.

Breyting á 29. gr. staðfest af Dóms- og kirkjumálaráðuneyti 16. júlí 2002.