Mörg þúsund hamborgarar afgangs á Akureyri

Á forsíðu DV í dag var greint frá því að mörg þúsund hamborgarar hefðu gengið af á Búllunni sem er afar góður skyndibitastaður á Akureyri. Ég verð að játa að ég lét ekki mitt eftir liggja og keypti þó nokkra hamborgara á Búllunni í fyrradag, á frídegi verslunarmanna, en það var að sönnu óvenju fámennt á Akureyri þessa verslunarmannahelgi.  

Raddir hafa verið háværar um að tjaldstæðamálið hafi verið mest afgerandi þátturinn í því þar sem sjálfráðu fólki var meinaður aðgangur á ómálefnalegan hátt. Það er skoðun mín að tjaldstæðamálið sé ekki meginorsök þess að fólk setti ekki stefnuna á Akureyri, heldur slæm veðurspá og ákaflega neikvæð umræða um útihátíðir þar sem öll áhersla er lögð á hert eftirlit á öllum sviðum. Tjaldstæðamálið var dropinn sem fyllti mælinn.

Langflestir Íslendingar eru ekki í fíkniefnum eða ofbeldi og sækjast ekki eftir því að hafa fíkniefnahunda snuðrandi þar sem þeir ætla að gera sér glaðan dag. Sömuleiðis eru langfæstir karlmenn nauðgarar sem þurfa á stöðugri áminningu að halda um að níðast ekki á næstu manneskju.

Umræðan um bíladagana var líka alltof neikvæð fyrr í sumar. Þar fór aftur bæjarstjórinn fremst í flokki í gagnrýni sinni á samfélagið og vildi að gagnger endurskoðun færi fram. Það má eflaust taka undir með henni um að einhver naflaskoðun þurfi að eiga sér stað en hún verður þá að vera með uppbyggilegri nálgun. 

Athugasemdir

[Janus, 9.8.2007 kl. 01:29]

Heyr, heyr!!!!

[Guðrún María Óskarsdóttir., 9.8.2007 kl. 01:57]

Þarna held ég Sigurjón minn að þú hafir rangt fyrir þér varðandi það atriði að sá stóri þáttur að meina fólki frá 18 - 23 ára aðgangi að hátíðahöldum alveg sama hvar sem er á landinu, útilokar afskaplega stóran hóp fólks frá þáttöku í slíku. Sem er að mínu viti ekki rétt aðferð í þessu sambandi alveg sama hvernig á það er litið.

kv.gmaria.

[Agný, 9.8.2007 kl. 10:58]

Kveðja frá kongens Köben í 25 stiga hita og sól.....

[Hafsteinn Viðar Ásgeirsson, 9.8.2007 kl. 17:08]

Þett er örugglega rétt hjá þér með að veðrið var aðalástæða þess að fólk ekki streymdi á hátíðir út og suður. Þetta mál með aldursmörkin var svo það sem kláraði að ekki kom unga fólkið...

[Akureyringur (IP-tala skráð) 9.8.2007 kl. 18:34]

Ég er 100% sammála þér Sigurjón. Ég held að það hafi fyrst og fremst verið veðrið sem spilaði inn í en auðvitað hafa einhverjir kosið að koma ekki vegna aldurstakmarkanna. En ég held að veðurspáin hafi spilað stærri rullu.

Ég er einnig sammála þér að það þarf að gera eitthvað í þessum málum. Það þarf að finna aðra lausn á þessu. Mér finnst það ekki ganga að banna bara einum hópi að koma, held að það leysi nú engan vanda til lengdar.  Ég er samt ekki hlynnt því að ákveðnir hópar (dæmi engan hóp umfram annan), fái að gera nákvæmlega það sem þeir vilja. Eins og t.d. að skila því sem þeir hafa látið ofan í sig í garða hjá fólki eða á götur bæjarins.  Þar liggur vandinn. Rusl og slæm umgengni er aðalvandinn. Það þarf að taka á því. Það myndi leysa hluta af vandanum bara með því að fjölga ruslatunnum og almenningssalernum þegar svona hátíðir fara fram en ég held það þurfi samt töluvert meira til.

[Ragnheiður Ástvaldsdóttir (IP-tala skráð) 10.8.2007 kl. 19:11]

Held að tjaldstæðismálið sé ekki eina ástæðan fyrir því að svo fór sem fór. Heldur nokkrir samverkandi þættir, eins slæm veðurspá, umræða um útihátíðir og breytt útilegumynstur fólks. Svo er það líka að aukast að fjölskyldur taki sig saman og fari erlendis um þessa helgi. Þegar ég er að tala um breytt útilegumynstur fólks þá er ég að meina að fólk er á ferðini flestar helgar yfir sumartímann. Sumarið er einnig þéttsetið af  bæjarhátíðum sem eru oft fjölmennar. T.d. humarhátíð á Höfn, írskir dagar á Akranesi, bryggjuhátíð á Stokkseyri, goslokahátíð í Eyjum, menningarnótt í Reykjavík o.fl. Umræðan um slæmu hliðarnar á útihátíð er öll af hinu góða en þessi umræða mætti heyrast oftar en eina helgi á ári. Af hverju er þessi umræða t.d. ekki í tengslum við menningarnótt?