Gangið í Frjálslynda flokkinn

Frjálslyndi flokkurinn er mikilvægt afl í íslenskum stjórnmálum sem setur á dagskrá og leggur fram tillögur í málum sem önnur stjórnmálaöfl forðast að ræða, s.s. sjávarútvegmálum og innflutningi á ódýru vinnuafli.

Ráðandi öfl og stjórnmálaflokkar hafa reynt að útmála nauðsynlega umræðu og úthrópa hana jafnvel sem ógeðfellda. Fyrsta verk utanríkisráðherra, Ingibjargar Sólrúnar Gísladóttur, var að reisa skorður við innstreymi fólks frá Rúmeníu og Búlgaríu.

Vond stefna í sjávarútvegsmálum brennur á þjóðinni og farin er af stað umræða um að stofna þverpólitísk samtök til að þrýsta á um réttláta og skynsamlega stefnu í sjávarútvegsmálum. Í sjálfu sér er það góðra gjalda vert en lykillinn að breytingum í þessum málaflokki er að Frjálslyndi flokkurinn fái góðan byr í seglin, og segir mér þá hugur um að önnur stjórnmálaöfl fari að setja þessi mál á dagskrá í stað þess að reyna að þagga þau niður, eins og Samfylkingin reynir þessa dagana.

Frjálslyndi flokkurinn stendur afar vel málefnalega og hefur innan sinna raða hugsjónafólk og duglega sjálfboðaliða sem vilja láta gott af sér leiða. Frjálslyndi flokkurinn stendur hins vegar ekki vel fjárhagslega eftir kosningabaráttu sem fram fór í kjölfar erfiðs uppgjörs nokkrum vikum fyrir kosningar. Það ríður því á að landsmenn gangi til liðs við Frjálslynda flokkinn og bjóði fram krafta sína við að rétta skútuna af. Fyrir höndum er mikið starf við að skipuleggja starf í sveitarfélögum landsins og undirbúa sveitarstjórnarkosningar eftir tæp þrjú ár. Til þess að svo megi verða þarf að fjölga félögum í Frjálslynda flokknum og hægt er að ganga í flokkinn á heimasíðunni www.xf.is

Fyrir Ísland framtíðarinnar er nauðsynlegt að skapa sátt um árangursríka og sanngjarna stjórn fiskveiða og lykillinn að því er að Frjálslyndi flokkurinn komist til valda.

Athugasemdir

[Ólafur Ragnarsson, 9.6.2007 kl. 20:51]

Svo maður snúi svolítið út úr orðum Benedikts og geri sér mat úr prentvillu(allir geta skrifað rangt) sem ég held að sé í athugasemd hans,þá væri það bölv.... "gan"að frjálslyndir gengu í Samfylkinguna.Ég sé málefnaágreining t.d sjávarútvegsmálum.En ég er sammála þér Sigurjón um mikilvægi FF sem afls í þjóðfélaginu.

[Gunnar Skúli Ármannsson, 10.6.2007 kl. 01:04]

Gott innlegg hjá þér Sigurjón. Það má vera hverjum manni augljóst sem fylgst hefur með stjórnmálum undanfarin ár að FF hefur sérstöðu í íslenskri pólitík. Ef einhver vill snúa við ríkjandi stefnu í sjávarútvegsmálum þá er FF algjör nauðsyn. Við þurfum ekki að örvænta um framtíðina því þú ert þegar farinn að fylkja liði fyrir FF.

[Halla Rut , 12.6.2007 kl. 02:33]

Hver er ykkar stefna varðandi innstreymi fólks frá Rúmeníu og Búlgaríu? Samanber bogg þitt.

[Sigurður Þórðarson, 12.6.2007 kl. 08:25]

Halla, fyrsta verk ríkisstjórnarinnar var að framfylgja stefnu Frjálslyndra.