Þakkir til oddvita Sjálfstæðisflokksins í Skagafirði

Mér er ljúft að þakka einlægar hamingjuóskir oddvita Sjálfstæðisflokksins í Skagafirði í ágætri grein á feyki.is, til mín vegna formannskjörs í Frjálslynda flokknum. Frjálslyndi flokkurinn er það afl í íslenskum stjórnmálum sem hefur borið hag almennings fyrir brjósti. Ekki verður á móti mælt að ef stefna flokksins hefði orðið ofan á við stjórn landsins á síðasta áratug stæði þjóðin nú í allt öðrum og miklu betri sporum. Frjálslyndi flokkurinn barðist gegn einkavinavæðingunni,
verðtryggingunni, skuldsetningu þjóðfélagsins, illræmdu kvótakerfi og hér í Skagafirði fyrir ábyrgari fjármálastjórn.

Ég þakka einnig nokkur vel meint heilræði um hvað eigi að ræða og þó sérstaklega yfir hverju eigi að þegja. Mér finnst sömuleiðis þakkarverð hreinskilni hjá leiðtoganum að greina kjósendum opinberlega frá þeirri skoðun sinni að það hafi verið fyrir styrk og stjórnvisku Sjálfstæðisflokksins í aðdraganda hrunsins sem þjóðin hafi bjargast frá alþjóðlegu bankahruni! Ég er þessu ekki sammála og er sannfærður um að skýrsla Rannsóknarnefndar Alþingis muni staðfesta sök Sjálfstæðisflokksins og samstarfsflokka hans á liðnum árum. Ég óttast þó að skoðun oddvitans á stjórnarfari liðinna ára breytist lítið sem ekkert við lesturskýrslu Rannsóknarnefndarinnar, hvað þá að hann telji sér þarft að horfast í augu við þær staðreyndir að hér er landið undir stjórn Alþjóðgjaldeyrissjóðsins, þrjú af tíu stærstu gjaldþrotum heims eru íslensk og öll fjármálafyrirtæki landsins eru hrunin, eignir lífeyrissjóða stórlaskaðar og sveitarfélög stórskuldug. Mörg stórfyrirtæki eru komin í faðm í ríkisreksturs eða á leiðinni þangað. Það er kannski lítið við þessu að segja, sumt breytist ekki og það er einfaldlega eins og það er. Og oddviti Sjálfstæðisflokksins vill síður að við ræðum vandann.

Athugasemdir

[Gunnar Skúli Ármannsson, 5.4.2010 kl. 22:05]

Mjög góð færsla, nema full hógvær, allt að því kurteis.

[JR (IP-tala skráð) 5.4.2010 kl. 22:18]

,,...sumt breytist ekki og það er einfaldlega eins og það er."

 Pólitískir flokkar og fólkið sem þar starfar breytist ekki , því miður !

Frjálslyndi flokkurinn er ekkert öðruvísi en aðrir slíkir flokkar !

Innan fólks sem starfar í pólitík er bara ein skoðun , það er mín skoðun sem er rétt !

[Brattur, 5.4.2010 kl. 22:23]

Jón þessi Magnússon Sjálfstæðismaðurinn sem skrifar greinina í Feyki þakkar Sjálfstæðismönnum að landið var betur búið undir hrunið en margar aðrar þjóðir !!!

Já, góðan daginn !

Hann hefði alveg eins geta sagt að bananar væru bláir...