95% óréttlæti njörvað niður til ársins 2047! Samið fyrir Samherja

Frumvarp Steingríms J. Sigfússonar og Jóhönnu Sigurðardóttur um stjórn fiskveiða er komið fram og felur það í sér í stuttu máli að verið er að festa núverandi óréttlæti og mannréttindabrot í sessi a.m.k. til ársins 2047. Frumvarpið er alls ekki samið fyrir almenning í landinu heldur Samherja og útgerðaraðalinn sem skuldsetti flest upp fyrir rjáfur í aðdraganda hrunsins og flaug um á þyrlum. Græðgin virðist vera svo mikil að grunur er uppi um að svindlað sé á gjaldeyrishöftunum á sama tíma og Steingrímur j. er að sérsníða löggjöf un stjórn fiskveiða fyrir Samherja.

Frumvarpið felur ekki í sér að jafnræði muni ríkja í auknum mæli til ýsu eða þorskveiða umfram það sem sem nú er þegar til staðar í kerfinu í gegnum strandveiðar og byggðakvóta. Megnið af því lítilræði sem kemur til aukningar á aflaheimildum sem jafnræði mun gilda um kemur úr veiðiheimildum annarra tegunda s.s á uppsjávartegundum. Þetta frumvarp er fáránleikinn einn og það verður fróðlegt að sjá Ólínu Þorvarðardóttur mæla fyrir því sem hún barðist gegn fyrir síðustu kosningar. Maðu spáir óneitanlega í það hvort að þingmenn Samfylkingarinnar og Vg hafi enga sómatilfinningu eða þá hitt sem er heldur skárra að þeir hafi ekkert vit á því sem þeir eru að tjá sig um?

Húsleit hjá Samherja

Athugasemdir

[Jón Ingi Cæsarsson, 27.3.2012 kl. 10:44]

Sigurjón virðist ekki átta sig á að ef keyrð er öfgastefna í fiskveiðistjórnunarmálum þokast mál ekkert. Það er skynsemi að hafa ramma rúma og reyna að nálgast sátt í stað þess að berja hausnum við steininn og sprengja hann. Hvort það gengur svo hvort sem er veit maður ekki því kvótakóngar vilja hafa sitt og engu breyta.

[Sigurjón Þórðarson, 27.3.2012 kl. 10:59]

Varla felst sátt í því að festa óbreytt kerfi í sessi til margra áratuga.  Kerfi sem hefur brugðist öllum upphaflegum markmiðum sínum eða hvað. Að kalla það öfgar að mótmæla því að mannréttindabrot og misrétti sé fest í sessi næstu áratugina finnst mér að hafa endaskipti á hlutunum.  Þetta er allt annað en Samfylkingin lofaði fólkinu og þess vegna finnst mér að þú og fleiri ágætir liðsmenn á þeim bænum ættu að reyna að vinda ofan af þessari ófæru sem flokkurinn er að fara í.

[Árni Gunnarsson, 27.3.2012 kl. 13:41]

Það er nú þrátt fyrir allt rátt hjá Jóni Inga að öfgastefna í stjórn fiskveiða leiðir til ófarnaðar.

Halldór Ásgrímsson seildist full langt þegar hann tryggði sinni fjölskyldu forgang ásamt allnokkrum öðrum reyndar, forgang að auðlindinni sem talið var á þeim tíma að væri ofnýtt. Líklega var það rangt þá og er það enn.

Það var líka full langt gengið að slátra í rólegheitum þeim sjávarplássum sem byggst höfðu upp af sjávarafla, slátra þeim rólega með því að setja líf og lífsafkomu íbúanna á uppboðmarkað sægreifanna sem búnir voru að mynda okurverð á takmörkuðu aðgengi.

Þessi öfgastefna sem Jón Ingi bendir réttilega á er búin að skaða samfélag okkar illa og mikið. Hún hefur eflt hatur, tortryggni og heift milli fólks, fyrirtækja og stjórnmálamanna,- heift sem er líklegt að muni aukast við þetta skelfilega frumvarp sem leysir ekkert nema vind framan í fólkið í þessu landi.

[Halldór Guðmundsson (IP-tala skráð) 27.3.2012 kl. 14:51]

Það hefur greinilega alveg gleymst að hugsa fyrir nýliðun í makrílveiðum, loðnuveiðum, og síldveiðum.

Í sambandi við Strandveiðarnar er mjög jákvætt að ráðherra getur sett lágmarksdagafjölda fyrir hvert fiskiskip í Strandveiðum, til að auka öryggi fyrir smæstu trillurnar, en afhverju það gildir aðeins fyrir maí og júní mánuð, er mér hulin ráðgáta, auðvitað á þetta líka að gilda um júlí og ágústmánuð.

Best væri að setja allan Strandveiðiflotan á daga,þannig að þeir fái að ráða því sjálfir hvenær þeir róa,því veður við Íslandsstrendur eru viðsjálverð eins og landinn veit.

Að banna Strandveiðiflotanum, allar aðrar veiðar yfir sumarið, er náttúrlega fullkomlega galið þegar allir fyrðir eru fullir af makríl.

[Guðmundur (IP-tala skráð) 27.3.2012 kl. 21:13]

aumingja karlarnir á strandveiðinni, allir sem stunda strandveiðar í minni heimabyggð eru búnir að selja kvótann sinn og verða bara að sitja heima og glugga í bankabækurnar til afþregingar.