Stjórnarandstaðan blæs lífi í dauðvona ríkisstjórn

Við öllum blasir klúður ríkisstjórnarinnar í stjórnlagaþingsmálinu. Óvart var sú framkvæmd á ábyrgð vinsælasta ráðherra landsins í seinni tíð, sem rætt hefur verið um að eigi eftir að verma forsetastól Íslands. Eflaust hafa pappakassarnir og ódýru skilrúmin verið liður í að gera framkvæmdina eins ódýra og kostur var en hörð gagnrýni var uppi í samfélaginu á kostnað við stjórnlagaþingið, á niðurskurðartímum.

Nú liggur niðurstaða Hæstaréttar fyrir og framkvæmdin fékk falleinkunn.  Í stað þess að þingmenn Framsóknar og Sjálfstæðisflokks bjóðist til þess að lappa upp á stjórnarskrána eða þá að aðstoða ríkisstjórnina við að standa sæmilega að framkvæmd kosninga þar sem kosið yrði í leiðinni um Icesave, þá eru þingmennirnir komnir í gamla góða sandkassann. 

Framsóknarmenn gleðjast mjög yfir rándýru klúðri við að framkvæma eitt af forgangsverkefnum formanns Framsóknarflokksins. Heldur reiðilega bergmálar varaformaður Sjálfstæðisflokksins málflutning Framsóknar - ekki er boðið upp á neinar lausnir frekar en hjá systurflokknum.  Sama má segja um málflutning þægs kjölturakka kerfisins, Einars K. Guðfinnssonar sem skrifar á bloggsíðu sína um svipað leyti og landsleik Íslands og Frakklands lauk, grein undir fyrirsögninni; Áfall fyrir lýðræðisríkið Ísland.

Báðir hrunaflokkarnir Framsókn og Sjálfstæðisflokkur leggja algjöra ofuráherslu á að breyta helst ekki einu né neinu af þeim kerfum sem ollu hruninu og alls ekki illræmdu kvótakerfi sem brýtur í bága við álit Mannréttindanefndar Sameinuðu þjóðanna.  Engu líkara er að forystumenn Sjálfstæðis og Framsóknarflokks átti sig ekki á því að með þessum málflutningi eru þeir að blása af kappi lífi ónýta og dauðvona ríkisstjórn.

Meiriháttar áfall fyrir Ísland

Athugasemdir

[Jakobína Ingunn Ólafsdóttir, 26.1.2011 kl. 00:07]

Takk fyrir pistilinn. Ég skrifa undir þetta.

[Pétur Harðarson, 26.1.2011 kl. 01:03]

Ég get skrifað undir fyrstu setninguna. Algjört klúður. Það verður æ augljósara að allt tal um að þingmenn þurfi að axla oftar ábyrgð eða að við þurfum breytta stjórnarhætti virðist eingöngu snúa að þeim stjórnum sem ekki eru lengur til. Var það lokaútspil þingsins að senda Geir Haarde fyrir landsdóm þegar kemur að aukinni ábyrgð á þingi. Það þarf eitthvað verulega mikið að gerast til að ég myndi hugsa mér að kjósa Sjálfstæðisflokkinn en það getur enginn verið stoltur af því sem fram fór á alþingi í dag.

Forsætisráðherra hefði átt að byrja á því að viðurkenna mistök og sýna smá iðrun. Það hefði verið kærkomin nýjung á alþingi.

[Sigurjón Þórðarson, 26.1.2011 kl. 01:18]

Nei það er rétt Pétur forsætisráðherra var herpt og sló vissulega tóninn í umræðunni.

[Jóna Kolbrún Garðarsdóttir, 26.1.2011 kl. 01:52]

http://www.youtube.com/watch?v=6XLOP2rMH5U&feature=related   Það er nú gott að sjallarnir eiga fiskinn í sjónum...

[Jón Steinar Ragnarsson, 26.1.2011 kl. 02:57]

Sigurjón, þessi stjórnlagaþingssirkus var eingöngu settur á svið til að liða í sundur grundvallaratriði stjórnarskrárinnar. Lestu lögin um stjórnlagaþing.

Þar er fyrirfram útbúinn listi frá Jóku um hvað ræða skal og breyta.  Liður 7, er eftir forskrift frá Brussel og kveður á um afsal fullveldis til erlendra ríkja og stofnana. Um þennan lið snýst þetta í hugum Jóku og Össurar og ekkert annað. Þetta er lykilatriði í innlimun okkar í ESB og Össur er búinn að lofa þessu.

Í skýrslu um Ísland frá í sumar, sem Brusselelítan gerði er  minnst á þessi lög og eingöngu minnst á þetta atriði. Sennilega vegna lofsverðrar viðleitni ríkistjórnarinnar til landráða.

Vissulega þarf að halda stjórnlagaþing og festa í lög að það verði gert eftir svona 2-3 ár, þegar ESB martröðin er farin að fjara út.

Varðandi það að setja auðlindir í almannaeign, er í raun bara spurning um lagasetningu fyrst og síðan sjálfkrafa stjórnarskrárbreytingu.

Þetta kvótafyrningarmál er bara gulrót til að fá fylgi við gerning, sem er eingöngu ætlað að ræna okur fullveldinu. Núna er ekki staður né stund til að taka á þessu. Burt verður þetta ESB hyski að fara fyrst með allan sinn spuna og blekkingar.

[Jón Steinar Ragnarsson, 26.1.2011 kl. 03:00]

Taki Jóka út lið 7, þá wr ég til í að greiða þessu atkvæði mitt á morgun. Fyrr ekki. Við skulum sjá hvað hún er viljug til þess og hvort óðagotið sjatnar ekki eitthvað.

[Jón Steinar Ragnarsson, 26.1.2011 kl. 03:03]

Þú metur þetta rangt. Þetta er banabiti þessarar ríkistjórnar. Tilgangurinn og markmiðin að engu orðin. Ekkert ESB.

Hér er svo linkur á lögin.