Stjórnvöld veittu fjármálafyrirtækjum heimild til tuddaskapar og dólgslegrar innheimtu

Við hrunið var tjón fjármagnseigenda að mestu tryggt á einni nóttu en skuldugur almenningur var látinn dingla hálfkæfður í skuldasnöru. 

Umræðunni var snúið algerlega á hvolf þar sem almenningur sem skuldaði ólögleg gengistryggð lán var settur í stöðu betlara sem þurfti úrlausn sinna vandamála. Bankastjórarnir sem veittu lánin voru í hlutverki höfðingja sem gátu af rausnarskap sínum gefið eftir einhvern hluta lána.

Það voru  höfð ósvífin endaskipti á hlutunum, bankarnir sem enn hafa sömu kúlulánastjórnendur í forsvari lánuðu nytsömum sakleysingjum, veðjuðu síðan gegn íslensku krónunni og grófu undan virði hennar og forsendum lánanna. Í siðuðu samfélagi hefði almenningur ekki verið látinn hanga í snörunni heldur bankamennirnir.

Stjórnvöld gátu á sínum tíma leyst úr vanda gengistryggðra lána með almennum hætti í stað þess að vísa almenningi á dómstóla, til að verja sig fyrir tuddaskap fjármálafyrirtækja.  Núna þegar dómur Hæstaréttar liggur fyrir sem virðist stjórnvöldum ekki að skapi, þá heyrist í ríkisstjórn Vg og S  að óásættanlegt sé að farið verði að dómnum og veita lántakendum vildarkjör en það var í góðu lagi að beita sama fólk hörðu og dólgslegum innheimtuaðgerðum.

Efast um íslenska lögfræði

Athugasemdir

[Kristján H Theódórsson, 29.6.2010 kl. 11:25]

Já Sigurjón, þeir láta ekki að sér hæða "félagshyggjuflokkarnir" !

Mann langar til að segja ljótt, en verður að stilla sig!

[Hafþór Baldvinsson, 29.6.2010 kl. 13:35]

Sæll Sigurjón. Mig langar að spyrja þig hvernig standi á því að Frjálslyndi flokkurinn sem hafði það stefnumál að afnema verðtryggingu skuli ekki hafa áttað sig á þessum galla í meðferð gengistryggðra lána?

Ég hefði haldið að flokkurinn hefði lagt sig í líma við að kynna sér öll þau lög sem snertu verðtryggingu hvort sem hún var vísitölubundin eða gengisbundin.

[Sigurjón Þórðarson, 29.6.2010 kl. 15:35]

Kristján, það er erfitt að átta sig á því hvað þessar deildir Vg og S sem kenna sig við félagshyggju ætla að bera næst á borð fyrir kjósendur.

Hafþór, það er rétt að við í Frjálslynda flokknum vorum framsýn um hvert verðtryggingin og skuldsetning þjóðarbúsins myndi leiða en okkur yfirsást vissulega það sem vissulega hefði átt að vera augljóst þ.e. ólögmæti gengistryggðra lána. 

[Hafþór Baldvinsson, 30.6.2010 kl. 01:20]

Sigurjón. Gengistryggð lán eru ekki ólögleg ef viðmiðið eru hlutabréfavísitölur og þar held ég að fjármálastofnanir hafi flaskað allverulega á þeim mun og því að verðtryggja lán miðað við gengi einstakra gjaldmiðla. Á því er allnokkur munur.

Já þið börðust fyrir afnámi verðtryggingar og þar er ég sannarlega í flokki með ykkur þótt ég sé ekki og vilji ekki vera í Flokknum. :)

[Guðmundur Ásgeirsson, 30.6.2010 kl. 15:49]

Verðtrygging á skuldabréfi = afleiðusamningur ?

Höfðu fjármálafyrirtækin starfsleyfi til afleiðuviðskipta? Ekki öll a.m.k.!